U Bufaransa bugiye kugerageza kuvura Coronavirus bukoresheje gusimbuza amaraso

Yanditswe na IGIHE
Kuya 7 Mata 2020 saa 04:54
Yasuwe :
0 0

U Bufaransa bwatangaje ko bugiye gutangira igerageza ryo kuvura COVID-19 iterwa na Coronavirus, hakoreshejwe uburyo bwo guterwa amaraso y’umuntu wakize iki cyorezo, hagamijwe kureba niba byakorohereza umuntu cyazahaje.

Ibigo bikora imiti bikomeje gusiganwa n’iminsi bigerageza kuvumbura umuti n’urukingo bya COVID-19, imaze guhitana abantu ibihumbi 76 uhereye igihe yavumburiwe mu Bushinwa, mu mpera z’umwaka ushize.

U Bufaransa butangiye igerageza ku buryo bwo gufasha abanduye icyo cyorezo bamerewe nabi, hakoreshejwe uburyo bwo guhindura plasma, igice cy’amaraso kigizwe n’amazi ari nacyo gitwara abasirikare barwanya indwara. Ni nyuma y’uko inyigo nto yerekanye ko byatanze umusasuro ku ndwara ya Ebola na SARS.

Igerageza ryatangiye kuri uyu wa Kabiri nk’uko bigaragara mu itangazo rihuriweho n’ubuyobozi bw’ibitaro bya Paris, ikigo cy’u Bufaransa gishinzwe ubushakashatsi n’Ikigo gishinzwe amaraso mu Bufaransa.

Iryo tangazo rikomeza riti “Iri gerageza rizibanda ku kuvana plasma mu muntu wakize COVID-19, zirimo abasirikare babashije kurwana n’iyo virus, ku buryo bashobora gushyira ubwo budahangarwa mu muntu urwaye COVID-19,"

“Plasma zo mu muntu wakize ziba zirimo abasirikare umubiri wabo wubatse. Abo basirikare bashobora gufasha umurwayi ugeze mu bihe bikomeye guhangana n’iyo virus.”

Iri gerageza rizakorerwa ku barwayi 60 mu bitaro byo mu murwa mukuru Paris, kimwe cya kabiri cyabo bakazahabwa plasma zo mu bantu bakize. Byemejwe ko ibisubizo bya mbere by’igerageza bizajya ahabona nibura nyuma y’ibyumweru bitatu.

Kugeza ubu mu Bufaransa abamaze kwandura Coronavirus ni 98 010 mu gihe abo imaze guhitana muri icyo gihugu ari abantu 8911.

Ikigo cya Leta Zunze Ubumwe za Amerika gishinzwe kugenzura ibiribwa n’imiti giheruka kwemerera abaganga kugerageza ubu buryo mu kuvura Coronavirus. Igerageza kandi ririmo no gukorerwa mu Bushinwa.

Uburyo bwo gusimbuza amaraso bugiye kwifashishwa mu kuvura Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .