Umugabo w’Umwamikazi Elizabeth yiyambuye uruhushya rwo gutwara nyuma yo kurokoka impanuka y’imodoka

Yanditswe na Ishimwe Israel
Kuya 10 Gashyantare 2019 saa 02:25
Yasuwe :
0 0

Igikomangoma Philip [Duke of Edinburgh], umugabo w’Umwamikazi w’u Bwongereza, Elizabeth II, yahagaritse uruhushya rwe rwo gutwara ibinyabiziga nyuma y’ibyumweru bisaga bitatu, arokotse impanuka y’imodoka.

CNN yanditse ko itangazo ryavuye mu Ngoro y’i Bwami ya Buckingham ryo ku wa 9 Gashyantare 2019, rigaragaza ko ari umwanzuro nyir’ubwite yafashe.

Rigira riti “Nyuma y’ubushishozi bwimbitse, Duke of Edinburgh yafashe icyemezo cyo gutanga uruhushya rwe rwo gutwara ibinyabiziga.’’

Polisi yo mu Bwongereza yoherereje Urwego rw’Ubushinjacyaha rwo mu Bwongereza (British Crown Prosecution Service/CPS) amakuru yavuye mu iperereza ry’ahabereye impanuka, rwiga niba azaregwa mu rukiko.

Umuvugizi wa CPS yatangaje ko icyemezo kizafatwa nyuma yo gusuzumana ubushishozi amakuru yatanzwe ndetse bazanazirikana icyemezo cy’Igikomangoma Philip cyo gutanga uruhushya.

Igikomangoma Philip cy’imyaka 97 cyarokotse impanuka y’imodoka yabereye hafi y’inyubako y’Umwamikazi iri i Sandringham mu gace ka Norfolk.

Imodoka ya Land Rover yari itwawe n’Igikomangoma Philip yagonganye n’indi mu mpanuka yakomerekeyemo umushoferi w’umugore.

Nyuma yiseguye kuri Emma Fairweather wakomeretse akaboko, anicuza uruhare rwe muri iyo mpanuka.

Philip yanenzwe na benshi nyuma y’amashusho yamugaragaje atwaye imodoka atambaye umukandara, nyuma y’amasaha 48 arokotse impanuka.

Fairweather yatangarije Mirror ko yishimiye cyane icyemezo cya Philip cyo gutanga uruhushya rwe rwo gutwara.

Ati “Yafashe icyemezo gikwiye, biteye isoni ko atahise abikora ariko ni ikintu cy’ingenzi yakoze.’’

Iyi mpanuka yavuzweho cyane ndetse bamwe batangira kwibaza niba iki gikomangoma kibura amezi make ngo cyuzuze imyaka 98 cyagakwiye kuba kigitwara imodoka.

Amabwiriza agenga umutekano wo mu muhanda mu Bwongereza ateganya ko umuntu wese uri hejuru y’imyaka 70 agomba guhora ahinduza uruhushya rwo gutwara ibinyabiziga buri myaka itatu.

Igikomangoma Philip cyatwaye Barack Obama wayoboye Leta Zunze Ubumwe za Amerika n’umugore we Michelle Obama, ubwo bari mu ruzinduko bagiriye mu Bwongereza mu 2016. Icyo gihe Umwamikazi Elizabeth na we bari kumwe.

Mu 2017 nibwo Philip washakanye n’Umwamikazi Elizabeth II mu 1947 yagiye mu kiruhuko cy’izabukuru. Mu myaka ibiri ishize, yagaragaye mu bikorwa bike byiganjemo ibifitanye isano n’umuryango we birimo ubukwe bw’umwuzukuru we Igikomangoma Harry na Meghan Markle.

Nyuma y'ibyumweru bisaga bitatu arokotse impanuka y'imodoka yiyambuye uruhushya rwo gutwara ibinyabiziga
Igikomangoma Philip cyarokotse impanuka y’imodoka muri Mutarama 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza