USA: Abantu barenga 1300 bapfuye ku munsi umwe bazize Coronavirus

Yanditswe na IGIHE
Kuya 5 Mata 2020 saa 05:10
Yasuwe :
0 0

Abantu 1344 bapfuye kuri uyu wa Gatandatu muri Leta Zunze Ubumwe za Amerika, nibo benshi bishwe na Coronavirus muri iki gihugu ku munsi umwe nyuma y’uko undi munsi byabayeho hari harapfuye 1169.

Ubwiyongere bw’impfu z’abahitanwe na Coronavirus muri Leta Zunze Ubumwe za Amerika bukomeje gutumbagira umunsi ku wundi. Magingo aya, harabarurwa abantu 8503 bamaze kwicwa n’iki cyorezo. Abanduye ubu bamaze kuba 312249.

Kuri uyu wa Gatandatu, niwo munsi hapfuye abantu benshi ku munsi umwe kuko bageze ku 1344; ni mu gihe ku wa Kane w’iki cyumweru hari hapfuye 1169.

Mu Butaliyani, nk’igihugu cyibasiwe cyane n’iki cyorezo, umunsi hapfuye abantu benshi bari 969.

Hari ubwoba bwinshi muri Amerika ko Coronavirus ishobora guhitana abantu benshi kurusha ibindi bice byose by’Isi. Imibare itangwa n’inzego z’ubuzima muri iki gihugu ni uko abari hagati y’ibihumbi 100 na 240 aribo bashobora kuzapfa.

Ni mu gihe Perezida Donald Trump amaze iminsi aburira abaturage be ko mu cyumweru gitaha impfu zishobora kuba nyinshi kurusha indi minsi yose yabanje.

Leta Zunze Ubumwe za Amerika zatangiye no gutekereza uko zabyitwaramo mu gihe impfu zaba nyinshi, isaba Minisiteri y’Ingabo ko yayifasha kubona amashashi atwarwamo imirambo, nayo yemera gutanga amashashi ibihumbi 100.

Abahitanwa na Coronavirus bakomeje kuba benshi muri Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .