Vietnam: Umuntu wa mbere yishwe na COVID-19

Yanditswe na IGIHE
Kuya 31 Nyakanga 2020 saa 10:00
Yasuwe :
0 0

Umugabo w’imyaka 70 wo mu Mujyi wa Hội An muri Vietnam yabaye uwa mbere wahitanywe n’icyorezo cya COVID-19 muri iki gihugu.

Urupfu rwa mbere rw’umurwayi wa Coronavirus rwatangajwe mu gihe hari hamaze amezi agera kuri atatu kuva muri Mata nta bwandu bushya bw’iki cyorezo buboneka mu gihugu.

Igitangazamakuru cya Leta ya Vietnam cyatangaje ko kugeza mu ntangiriro aribwo hari abanduye babonetse mu Mujyi wa Da Nang.

Vietnam iherereye muri Aziya y’Epfo ituwe n’abaturage barenga miliyoni 95, kuva COVID-19 yagera muri iki gihugu hatangajwe abantu 546 bayanduye.

Minisitiri w’Intebe wa Vietnam, Nguyễn Xuân Phúc, ku wa Gatatu yatanze umuburo ko buri ntara ishobora kwibasirwa n’ubwandu bushya nyuma y’abarwayi bakuwe muri Da Nang. Yavuze ko leta igiye kongera imbaraga mu kurwanya COVID-19. Ntibizwi neza uburyo iyi virusi yongeye kuboneka muri Da Nang.

Leta ya Vietnam yabanje guhagarika ubukerarugendo muri Da Nang, mbere y’uko ku wa Gatatu hatangwa itegeko rigumisha mu rugo abatuye uyu mujyi.

Bitandukanye n’ibindi bihugu byinshi, Vietnam yafashe ingamba itaragira umuntu wanduye iki cyorezo, ifunga imipaka ku bagenzi hafi ya bose, uretse abanyagihugu bagaruka iwabo.

Buri wese winjiraga muri iki gihugu leta yamushyiraga mu kato k’iminsi 14 ahateguwe na leta, akanapimwa.

Umuntu wa mbere wabonyweho iyi ndwara muri iki gihugu ntabwo yari aherutse kugisohokamo.

Umupilote ukomoka muri Écosse wamaze amezi abiri ari ku mashini ifasha guhumeka, yamenyekanye cyane muri iki gihugu nk’umuntu urembye kurusha abandi, mbere y’uko asubira mu gihugu cye hagati muri Nyakanga 2020.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .