Ingorane ku bakomoka mu Bugoyi ubwo Col Lizinde uhakomoka yashinjwaga guhirika Habyarimana

Yanditswe na Ferdinand Maniraguha
Kuya 31 Nyakanga 2020 saa 07:28
Yasuwe :
0 0

Aho inzovu zirwaniye, ibyatsi birahabarira uko byagenda kose, niko abanyarwanda baciye umugani. Inkundura ya Perezida Juvénal Habyarimana na Colonel Lizinde Théoneste wari ukuriye iperereza mu 1980, yazengereje abaturage bo mu Bugoyi kugeza ubwo butegetsi buhirimye mu 1994.

Kuwa Gatatu tariki 23 Mata 1980, nibwo hasohotse amakuru atunguranye ko Lizinde wari ukuriye iperereza yafatanywe n’abandi basaga 40 bakekwaho gutegura umugambi wo guhirika Habyarimana.

Kugeza n’ubu ntawe urabasha gusobanura neza icyo Habyarimana na Lizinde bapfaga nyuma y’imyaka irindwi bafatanyije guhirika Perezida Grégoire Kayibanda ariko icyizwi ni uko ifungwa rye ryakurikiwe n’itotezwa ry’abari batuye mu Bugoyi cyane cyane muri Komine Rwerere aho Lizinde yakomokaga.

Uretse abantu bakuze basigaye muri ako gace, ibimenyetso by’ayo mateka bisigaye ni inzu ya Lizinde iri hepfo gato y’ibiro by’Umurenge wa Busasamana nayo yashaje kuko imaze igihe ntawe uyituyemo

Sebikari Félicien, ni umusaza utuye mu Murenge wa Busasamana mu Karere ka Rubavu hafi y’aho Lizinde yavukiye.

Yavuze ko yari amuzi nk’umusirikare mukuru wavukaga muri ako gace, akamwibukira ku buryo yakundaga kuza muri kajugujugu aje gusura iwabo no kwitabira ibirori by’inshuti.

Mu 1980 ubwo Lizinde yafatwaga, Sebikari yakoraga muri Gishwati mu mushinga witwaga GBK Gishwati ashinzwe gupima ubutaka.

Mu kiganiro na IGIHE, Sebikari watahaga iwe i Busasamana buri wa Gatanu yibuka ko ubwo Habyarimana yafungaga Lizinde, batangiye kubona abantu benshi bakoreraga i Kigali birukanywe.

Ati “Tukumva ngo babirukanye kubera ko ari ab’iwabo wa Lizinde. Hari abacuruzi yari aziranye nabo inaha babigizemo ikibazo kubera ko twabonaga babirukaho babishyuza amafaranga y’inguzanyo bafashe.”

Sebikari ntabwo muri icyo gihe we yirukanywe mu kazi kuko batari bazi neza ko akomoka hafi yo kwa Lizinde, icyakora ngo baje kubimenya mu 1989 aza kuba mu ba mbere bagabanyijwe mu bakozi we na bagenzi be bo mu Bugoyi.

Ati “Haje ibintu byo kugabanya abakozi ariko mu bagabanyijwe mbere nari ndimo. Ntabwo bavugaga ngo tubagabanyirije iki, nakoraga neza ariko nagiyemo. Ni abantu bakomokaga mu Bugoyi batashye. Batubwiraga ko igihe nikigera bazadutumaho, ariko ntawadutumyeho.”

Dusabemungu Anastase ni umusaza winjiye mu gisirikare cy’u Rwanda mu 1977, asezerewa mu 2002 afite ipeti rya Caporal.

Yemeza ko mu gihe cye, abasore benshi bo mu Bugoyi binjiraga igisirikare bakurikije Lizinde wahavukaga ndetse hakaba abinjijwe mu ishuri rikuru rya gisirikare kuko bakomoka hamwe na we.

Icyakora ubwo yari amaze gushinjwa gushaka guhirika Perezida ibintu byahinduye isura, abari abasirikare bakuru bagerwaho n’ingaruka zirimo no kwirukanwa.

Yagize ati “Nk’ufite guhera kuri sergeant kuzamura babigiriyemo ingorane, barirukanywe. Bati ni ab’iwabo, gahunda yategurwaga babigizemo uruhare. Hari abo nzi rwose birukanye.”

Inzu ya Colonel Lizinde yubatse munsi y'ibiro by'Umurenge wa Busasamana, ni kimwe mu bimenyetso by'ayo mateka bikigaragara muri ako gace

Lizinde yaje gutorokeshwa n’ingabo z’Inkotanyi muri Mutarama 1991, akurwa aho yari afungiye muri gereza ya Ruhengeri ajyanwa hanze y’igihugu.

Dusabemungu avuga ko byarushijeho kuba bibi ku basirikare baturuka mu Bugoyi iyo babaga bavuye ku rugamba kurwana n’ingabo za FPR Inkotanyi, bakaza batsinzwe.

Ati “Twajyaga ku rugamba tuzi ko twese tugiye kurwanya umwanzi ariko noneho hakabaho kuvuga ngo niba urugamba rw’uwo munsi twaneshejwe, bati impamvu baneshejwe ni umuyobozi mubi, yicishije abasirikare kuko ari kurwanira ishyaka rya Lizinde.”

Muzehe (rtd) Sergeant Major Nkurunziza Athanase na we ni umwe mu bavuka mu gace kamwe na Lizinde. Yinjiye mu gisirikare mu 1971 afite ishema ry’uko mu gace avukamo haturuka umusirikare mukuru.

Ubwo Lizinde yafungwaga mu 1980, Nkurunziza yari yaragiye kwihugura mu by’amashanyarazi i Tripoli muri Libya. Ku ruhande rwe nta kibazo yagize kuko atari ahari ariko yemeza ko hari bagenzi be avuga n’amazina birukanywe. Yagarutse mu gihugu nyuma y’umwaka umwe.

Nk’abasirikare cyangwa abakozi ba Leta babaga bafite imiryango, ngo bapakirwaga imodoka bagasubizwa iyo bavuka.

Ati “Bagiye babirukana, abari bafite abagore bakabapakira n’abana babo n’amasafuriya na za matola, imodoka ikabavana mu kigo ikagenda ibashyira iwabo. Twe dukizwa nuko tutari mu Rwanda.”

Nyuma yo kugaruka mu gihugu, Nkurunziza avuga ko nabwo batangiye kujya bigengesera ngo barebe ko bucya kabiri ariko icyitwa kuzamurwa mu ntera ku musirikare uturuka mu Bugoyi cyari kigoye.

Ati “Abirukanywe mu gisirikare baraje abenshi bibaviramo ubukene no gupfa kubera imibereho mibi.”

Ingaruka kandi zakurikiranye umuryango wa Lizinde kuko abari bafite akazi bakirukanyweho cyangwa bakamanurwa mu ntera.

Batanga ingero za baramu be nk’uwari Burugumesitiri wa Komine Mutura n’uwari umuganga i Kigali n’imiryango yabo bishwe mu 1994.

Sebikari avuga ko mu 1994 hari itsinda ry’Interahamwe zo muri Karago zari zahawe inshingano zo guhiga umuryango wa Lizinde bakawutsemba.

Nkurunziza Athanase yavuze ko abari batuye mu yahoze ari Rwerere ariho hari imirenge ya Bugeshi na Busasamana ubu, nyuma y’ibibazo bya Lizinde na Habyarimana nta bikorwa by’iterambere bongeye kugira.

Ati “Kuva yafatwa nta terambere na busa, nta mwana wongeye kujya muri Kaminuza, nta dusantere twigeze twubakwa, abantu bagumye muri nyakatasi. Ubucuruzi ntibwonegeye gutera imbere.”

Urubanza rwa Lizinde na bagenzi be rwatangiriye mu Ruhengeri muri Nzeli 1980, rusomwa tariki 25 Ugushyingo 1981. Mu baregwaga, 23 bahamijwe ibyaha naho 24 bagirwa abere.

Bamwe bakatiwe igifungo kiri hagati y’imyaka ibiri na 20, naho Major Lizinde na Alphonse Kagenza bari ku isonga y’umugambi wo guhirika Perezida bakatirwa urwo gupfa.

Ku munsi w’ubwigenge mu 1982, Perezida Habyarimana yababariye imfungwa, Lizinde na Ndegeya bagabanyirizwa igihano, bahabwa igifungo cya burundu.

Nyuma yo kubohora igihugu, Lizinde yaje guhungira muri Kenya umurambo we uza kugaragara tariki 23 Ukwakira 1996 yishwe arashwe.

Sebikari Félicien, ni umusaza utuye mu Murenge wa Busasamana mu Karere ka Rubavu hafi y’aho Lizinde yavukiye
Dusabemungu Anastase avuka i Busasamana aho Lizinde akomoka. Yinjiye mu gisirikare mu 1977
Muzehe (rtd) Sergeant Major Nkurunziza Athanase yinjiye mu gisirikare mu 1971. Yemeza ko ifungwa rya Lizinde ryatumye benshi mu basirikare bakuru bakomoka mu Bugoyi bibasirwa
Lizinde yashinjwaga gushaka guhirika Habyarimana ariko icyo bapfaga n'ubu ntikiramenyekana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .