Iya 25 Mata 1994: Umunsi hishwe Abatutsi bagera 40000 bahungiye kuri Parurwasi ya Mugina

Yanditswe na IGIHE
Kuya 25 Mata 2019 saa 07:00
Yasuwe :
0 0

Tariki ya 25 Mata 1994 ni bwo Abatutsi bari bahungiye muri Kiliziya ya Paruwasi ya Mugina mu Karere ka Kamonyi bishwe n’abasirikare, abajandarume n’interahamwe.

Komini Mugina yahoze muri Perefegitura ya Gitarama, kuri iyo tariki ni bwo Abatutsi bagera ku 40,000 bari bahungiye mu Kiliziya ya Paruwasi Mugina no mu nkengero zayo, Interahamwe, abasirikare, abajandarume babishe bafatanyije n’impunzi z’Abarundi zabaga i Nyagahama muri Segiteri ya Gisera, muri Komini Ntongwe.

Nyuma yo kugambanirwa, Ndagijimana Callixte wari Burugumesitiri wa Mugina yishwe n’Interahamwe zari kuri bariyeri ku Ruhuha zirimo abitwa Nsanzimfura na Nsanzineza Emmanuel (Buzura), ziri kumwe na Mukeshimana Emmanuel, Kadende, Gahakwa, Ndahayo, Emmanuel, Mudakenwa Paul wari Konseye wa Kinazi, Rutaremara na Mutarambirwa David. Bamwishe babanje kumugaragura mu cyondo ndetse bashinyagurira n’umurambo we bamuhora ko yanze gutanga abatutsi ngo bicwe.

Ku munsi wakurikiyeho ni bwo Burugumesitiri wa Komini Ntongwe Kagabo Charles yaje gushimira abishe Ndagijimana.

Nk’uko tubikesha CNLG, kuva ubwo, bariyeri zarakajijwe kugira ngo abatutsi badahunga. Hashinzwe bariyeri ku Ruhuha, Mukunguri, Ntongwe, Nyirakagengeri muri Kanaba, Bibungo, kuri Selire, mu Byapa, Nyaruhengeri, Mataba, Iramba, Kavumu, Kamabuye n’ahandi, zabaga ziyobowe n’umucuruzi Habarugira.

Ubuhamya bwa bamwe mu bagize uruhare mu bwicanyi muri Mugina ari bo Vedaste Ngendahimana, Nteziyaremye Faustin, Antoine Bisanihene, Kamanzi Athanase na Habarugira ndetse n’ubuhamya bw’uwarokotse ubwicanyi mu Kiliziya ya Mugina, Marcel Rutagarama bugaragaza ko kuva ku itariki ya 14 Mata 1994, ku Kiliziya ya Mugina no mu nkengero zayo hari hateraniye impunzi z’Abatutsi zaturutse muri komini Kanzenze (Bugesera), Ntongwe, Kigali, Musambira, Runda no mu masegiteri yose ya Komini Mugina, barenga 40,000.

Nubwo izo mpunzi zamaze iminsi itandatu zirwanaho, zigasubiza inyuma ibitero by’Interahamwe zabaga zije kubica, ku itariki ya 25 Mata 1994, ni bwo bagabweho igitero simusiga kiyobowe na Major Karangwa, afatanyije n’Interahamwe, abajandarume, abasirikare, abapolisi, impunzi z’Abarundi n’abaturage b’abahutu, bamennye umuryango wa Kiliziya, babateramo gerenade, amasasu, babicisha ubuhiri, udufuni, imihoro n’ibyuma. Abashatse guhunga bakabica bakabajugunya mu Kanyaru.

Kuri uwo munsi kandi Abatutsi bari hagati ya 10 na 20 gusa ni bo barokotse ubwo bwicanyi.

CNLG ivuga ko abari ku isonga mu bwicanyi muri Mugina ari Major Karangwa Pierre Claver, Batakanwa na Ndabaga abasirikare bari baratorotse urugamba, Mayumba Philemon wari umupolisi wigisha Interahamwe kurasa, Habimana n’umuhungu we Mbabariye, Karekezi watwaraga abicanyi mu mudoka ye, Twagiramungu, Kanyanzira Boniface wari agoronome, Kalisa Felix, Ngiruwonsanga Onesphore wigeze kuba Burugumesitiri wa Mugina akaba yari Perezida wa MDR muri Mugina n’abandi.

Ahandi hiciwe abatutsi muri Komini Mugina ni muri Jenda, Bibungo, Mukinga, Ngoma n’ahandi henshi.

Ibindi biri mu byaranze uyu munsi

Abatutsi benshi bari bahungiye ku Kigo Nderabuzima cya Gatovu, bishwe n’Interahamwe ziturutse ku Gikongoro zifatanyije n’izo muri Komini Maraba na Rusatira ku buryo abagerageje guhunga biciwe muri ISAR Isonga.

Icyo gihe kandi Abatutsi benshi bari bahungiye kuri Komini Muyira (ubu ni mu Murenge wa Muyira) n’abandi bagera ku 100 biciwe kuri Nkomane (mu Murenge wa Ntyazo) mu Karere ka Nyanza, bashaka kwambuka Akanyaru ngo bahungire i Burundi.

Muri Komini Kigoma, Abatutsi bo mu Butansinda, biciwe mu irimbi ryari hafi ya komini.

Abatutsi bo muri Murinja, ubu ni mu Murenge wa Kigoma, mu Karere ka Nyanza, Interahamwe zabakusanirije mu nzu imwe, zirabica bose.

Kuva tariki ya 25-26 Mata 1994, ahitwa mu Nkomero, ubu ni mu Murenge wa Mukingo mu Karere ka Nyanza, hiciwe abatutsi benshi cyane, bari bahateraniye baturutse mu duce dutandukanye, bahahungiye kuko ho Jenoside yahageze nyuma. Aha hakaba harahoze ari muri Komini Murama, Perefegitura ya Gitarama.

Muri Komini Masango, Abatutsi benshi biciwe ku musozi wa Muyunzwe, ubu ni mu Murenge wa Kinihira mu Karere ka Ruhango.

Kuri uwo munsi ni na bwo Abatutsi bagera 76 bari baturutse mu duce twa Mugina na Runda bahunga, biciwe Cyobe, mu Murenge wa Mbuye, mu Karere ka Ruhango.

Abatutsi bagera kuri 38, biciwe i Kinyinya, mu Murenge wa Mbuye, mu karere ka Ruhango.

Kuri uwo munsi kandi ni bwo Ikigo Mpuzamahanga gishinzwe indege za gisivili cyanze gushyira mu bikorwa, ibikorwa by’iperereza ku cyahanuye indege yari itwaye Perezida Habyarimana Juvenal, bikaba urwitwazo rwo gukora Jenoside yibasiye Abatutsi.

Hishwe Abatutsi bari bahungiye kuri Komini Muko, hishwa, abagore n’abana b’abakobwa batari bishwe ku wa 19 Mata 1994, hakaba hari muri Perefegitura ya Gikongoro.

Hanishwe Abatutsi 15 kuri Komini Karago muri Perefegitura ya Gisenyi, ubu ni mu Karere ka Nyabihu bajugunywe mu musarane umwe.

Icyapa cy'Urwibutso rwa Jenoside yakorewe Abatutsi rwa Mugina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza