RDC: Abarwanyi 205 ba FDLR bafungiye muri gereza ya gisirikare bashobora gufungurwa kubera Coronavirus

Yanditswe na IGIHE
Kuya 24 Gicurasi 2020 saa 10:38
Yasuwe :
0 0

Abarwanyi 205 b’Umutwe witwaje Intwaro wa FDLR bafungiye muri Gereza ya Gisirikare ya Angenga muri Repubulika Iharanira Demokarasi ya Congo bashobora gufungurwa kubera icyorezo cya COVID-19 giterwa na Coronavirus.

Ubusabe bwo gufungura aba barwanyi bwatanzwe n’Umuryango udaharanira inyungu wa AJBS (Action des Jeunes pour le Bien-Etre Social).

AJBS yagaragaje ko abarwanyi 205 ba FDLR bari muri Gereza ya Gisirikare ya Angenga, iri mu bilometero 25 uvuye mu Mujyi wa Lisala mu Ntara ya Mongala, aho bafungiye kuva mu 2016 bararekurwa bwangu.

Mu kiganiro Umuhuzabikorwa wa AJBS, Roger Nzumbu, yahaye Radio Okapi, yavuze ko bikenewe ko bahita boherezwa mu Rwanda.

Yagize ati ‘‘Impamvu ni uko mu 2016, abaturage bigaragambije bagaragaza ko batabashaka ku butaka bwa Kisangani. Niyo mpamvu Guverinoma yafashe icyemezo cyo kubimurira muri Gereza ya Gisirikare ya Angenga kugeza uyu munsi, nta dosiye bakorewe.’’

Nzumbu avuga ko kuba buzuye muri gereza bishobora kongera ibyago byabo bwo kwandura Coronavirus.

Ati “Nk’umuntu uharanira uburenganzira bwa muntu, ntitwemera ko umuntu ashyirwa muri gereza nta dosiye yakorewe. Iryo fungwa rinyuranye n’amategeko. Kubera inyungu z’ubuzima bwabo, ni ingenzi kubakura muri Gereza ya Gisirikare ya Angenga. Niyo mpamvu dusaba ko bahavanwa, bakoherezwa mu gihugu cyabo cy’amavuko.’’

Umutwe w’inyeshyamba wa FDLR ugizwe n’abasize bakoze Jenoside yakorewe Abatutsi mu 1994 mu Rwanda, bahise bahungira mu mashyamba ya RDC bakagerageza kwisuganyirizayo bashaka guhungabanya umutekano w’igihugu.

Muri Repubulika Iharanira Demokarasi ya Congo ho imibare y’abamaze kwandura ni 2141, abapfuye ni 63 mu gihe abamaze gukira ari 317. Iki gihugu nicyo cyibasiwe cyane n’icyorezo cya Coronavirus mu bihana imbibi n’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .