Burundi: Umunyamakuru yafunzwe azira inkuru itarashimishije ubuyobozi

Yanditswe na IGIHE
Kuya 19 Mutarama 2020 saa 09:08
Yasuwe :
0 0

Umunyamakuru wa Radiyo Isanganiro yo mu Burundi, Blaise-Pascal Kararumiye yatawe muri yombi kubera amakuru yatangaje ku bayobozi bo mu ntara ya Karusi, ntibayishimire.

Yatawe muri yombi kuwa 16 Mutarama 2020 nyuma yo gukora inkuru ku micungire y’amafaranga ya za koperative zitwa Sangwe ziri hirya no hino mu ntara ya Karusi iri rwagati mu gihugu.

Izi koperative zashyizwe mu duce dutandukanye tw’igihugu bikozwe n’ishyaka riri ku butegetsi CNDD FDD.

Inkuru ya Kararumiye yavugaga ku micungire y’amafaranga miliyoni 10 z’amarundi Leta yagiye iha izo koperative ngo ziteze imbere abaturage.

Hari inama yari yabaye ihuza Guverineri wa Karusi n’abandi bayobozi bo mu nzego z’ibanze, uwo Guverineri asaba abayobozi guhagarika kwivanga mu micungire yak operative Sangwe. Inkuru ivuga kuri iyo nama yatambutse ku Isanganiro kuwa Kane.

Umuyobozi wa Radiyo Isanganiro, Sylvère Ntakarutimana, yavuze ko umunyamakuru we yahise atabwa muri yombi kubera iyo nkuru. Yasabye ko umunyamakuru we arekurwa kuko inkuru yakoze, ngo yujuje amahame yose y’umwuga.

Ikinyamakuru Iwacu Burundi cyatangaje ko ubuyobozi bwa Radiyo Isanganiro bwamaze gusaba Komisiyo ishinzwe uburenganzira bwa muntu mu Burundi kubafasha gukurikirana ikibazo cy’umunyamakuru wabo.

Tariki 16 Mutarama, Inteko Ishinga Amategeko y’Ubumwe bw’u Burayi yatoye umwanzuro isaba Guverinoma y’u Burundi kurekura abanyamakuru bane b’Ikinyamakuru Iwacu bafunzwe guhera tariki 22 Ukwakira 2019 bashinjwa gukora n’abarwanya Leta.

Abo banyamakuru ubushinjacyaha bwabasabiye gufungwa imyaka 13, umwanzuro w’urukiko ukazasomwa mu mpera za Mutarama 2020.

Blaise-Pascal Kararumiye yatawe muri yombi kubera amakuru yatangaje ku bayobozi ntibayishimire.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza