Didier Drogba yagizwe ambasaderi w’umuryango wita ku bukerarugendo ku Isi

Yanditswe na IGIHE
Kuya 21 Ukwakira 2019 saa 04:03
Yasuwe :
0 0

Umunya-Côte d’Ivoire Didier Yves Drogba Tébily, wamamaye mu mupira w’amaguru, yagizwe Ambasaderi w’Ishami ry’Umuryango w’Abibumbye ryita ku bukerarugendo (UNWTO), kugira ngo arifashe guteza imbere ubukerarugendo muri Afurika n’ahandi.

Umunyamabanga Mukuru wa UNWTO, Zurab Pololikashvili, yabitangaje mu biganiro by’abashoramari bo muri Côte d’Ivoire, byabereye i Dubai mu mpera z’icyumweru gishize.

Pololikashvili yagize ati “Ni ibyishimo kugira umuntu w’icyamamare ndetse na Ambasaderi w’ubukerarugendo, ndahamya ko dushobora guteza imbere ubukerarugendo muri Afurika kuko uyu mugabane ukeneye kugaragazwa cyane, kumenyekanishwa kandi ntawundi twabona ubidufashamo kurenza Didier Drogba. Dushimishijwe kandi dutewe ishema no kuzakorana mu mishinga myinshi”.

Yongeyeho ko UNWTO izakorana n’Umuryango Didier Drogba Foundation mu gushyigikira urubyiruko, guteza imbere abagore no guhanga imirimo mishya kugira ngo Afurika itere imbere kandi ibe umugabane ukomeye.

Mu kwemera izi nshingano, Drogba yavuze ko yishimiye kuba yagizwe ambasaderi wo guteza imbere ubukerarugendo.

Ati “Nishimiye kuba umwe mu ba ambasaderi bashya b’Umuryango mpuzamahanga wita ku bukerarugendo kandi ntewe ishema no kuba ndi kumwe n’Umunyamabanga Mukuru wa UNWTO”.

Drogba yakomeje agira ati “Ni ibyishimo kuri njye gukoresha izina ryanjye mu kwerekana ubukerarugendo n’izindi nyungu bufite ari zo guhanga imirimo no gutuma abantu bagira inzozi”.

Didier Drogba yiyongereye kuri Lionel Messi nk’abakinnyi b’umupira w’amaguru bo kumenyekanisha ubukerarugendo. Hari kandi n’umuherwe w’umunya-Nigeria, Aliko Dangote na we washyizweho na UNWTO.

Drogba kandi asanzwe afite inshingano nka ambasaderi w’Ishami ry’Umuryango w’Abibumbye ryita ku iterambere, UNDP, mu bikorwa bitandukanye.

Drogba aherutse i Kigali mu nama ya YouthConnekt Africa, aho yitabiriye nka Ambasaderi wa UNDP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza