Hahishuwe impamvu Volkswagen yateye umugongo Tanzania ikayoboka u Rwanda

Yanditswe na Habimana James
Kuya 7 Ugushyingo 2019 saa 08:17
Yasuwe :
0 0

Uwigeze kuba Minisitiri w’Umutekano mu gihugu, Charles Kitwanga, yabwiye abagize Inteko Ishinga Amategeko ko uruganda rwa Volkswagen rukora imodoka, rwanze kuziteranyiriza muri Tanzania ruhitamo u Rwanda kubera kudakorera mu mucyo biri muri iki gihugu.

Charles Kitwanga yabaye Minisitiri ku butegetsi bwa Perezida Magufuli, ariko ubu ni Umudepite uhagarariye agace ka Misungwi.

Ku wa Kabiri Minisitiri w’Imari muri Tanzania, Dr Philip Mpango, yabwiye abadepite ko ubutegetsi burimo gukoresha ingufu kugira ngo bworohereze ishoramari ryinjira mu gihugu.

Kitwanga yavuze ko ubuyobozi bwa Tanzania bugomba guhindura imiyoborere ihari yo gukorera mu bwiru, kugira ngo abashoramari binjire mu gihugu bisanzuye.

Ati “Kudakorera mu mucyo biri mu buyobozi bwacyo birahangayakishije, ubu imodoka za Volkswagen zirimo guteranyirizwa mu Rwanda mu gihe zagombye kuba ziteranyirizwa hano muri Tanzania.”

The Citizen dukesha iyi nkuru yatangaje ko Kitwanga yavuze ko atashimishijwe no kubona ishoramari nk’iri rijya mu Rwanda, mu gihe ryagombye kuba riri muri iki gihugu.

Ati “Aba bantu njye nigeze kubaza hano muri Tanzania, ariko bambwiye ko bagiye mu Rwanda.”

Muri Kanama umwaka ushize nibwo mu Rwanda hatangijwe ibikorwa bya Volkswagen byo guteranyiriza imodoka mu Rwanda.

Iki kigo giherereye mu gice cyahariwe inganda i Masoro mu Karere ka Gasabo, muri gahunda ni uko kizajya giteranya imodoka 5000 ku mwaka zo mu bwoko bwa VW Polo, VW Passat, VW Tiguan, VW Teramont na VW Amarok.

Kugeza ubu kandi u Rwanda ruri ku mwanya wa kabiri muri Afurika mu bijyanye no gufasha ishoramari, uyu ukaba ari umwanya rumazeho igihe binatuma abashoramari benshi bahitamo kurushoramo amafaranga yabo.

Ubu u Rwanda rusigaye ruteranyirizwamo imodoka za Volkswagen

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza