Ibihugu bigize EAC byahawe igihe ntarengwa cyo kuba byishyuye ibirarane by’imisanzu

Yanditswe na IGIHE
Kuya 13 Ukwakira 2019 saa 09:41
Yasuwe :
0 0

Tariki ya 15 Ugushyingo ni wo munsi ntarengwa ibihugu bigize EAC bifite ibirarane by’imisanzu byahawe ngo bizabe byamaze kuyishyura, nk’imwe mu ngamba zigamije gukomeza iterambere ry’ibikorwa by’uyu muryango.

Ibi byagarutsweho na ba Minisitiri bafite Umuryango wa Afurika yunze Ubumwe mu nshingano aho biyemeje kwihutisha inyigo igamije kureba uburyo ibikorwa byawo byabonerwa inkunga mu nama yabahuje ku wa Gatanu ushize.

Uyu mwanzuro bawugezeho nyuma y’inama ya 30 y’abaminisititi bafite EAC mu nshingano n’abashinzwe igenamigambi, yasojwe ku wa Gatandatu i Arusha muri Tanzania.

Iyi nama yabaye mu gihe Ubunyamabanga bwa EAC n’izindi nzego ziyishamikiyeho zimaze igihe zihura n’ibibazo by’amikoro, aho bikomeje kujya irudubi kubera ibihugu bimwe na bimwe bidatanga imisanzu yabyo uko bikwiye.

Mu cyumweru gishize, Inama y’Abaminisitiri bagize uyu muryango yasabwe n’Inteko Ishinga Amategeko yawo kugeza mu maguru mashya ku bihugu binyamuryango ikibazo cy’uburyo imisanzu idatangwa uko bikwiye.

Buri mwaka, buri gihugu gisabwa gutanga umusanzu ungana na miliyoni 8.3 z’amadolari, wayateranyiriza hamwe yose akaba miliyoni 49.8 z’amadolari.

Aya mafaranga yifashishwa mu gutera inkunga ibikorwa by’umuryango n’inzego zawo zirimo nk’Ubunyamabanga Bukuru, Inteko Ishinga Amategeko (EALA) n’Urikiko rwa EAC.

Umunyamabanga wa Leta muri Minisiteri y’Ububanyi n’Amahanga, ufite ibikorwa by’Umuryango wa Afurika y’Uburasirazuba mu nshingano, Amb. Olivier Nduhungirehe, ari nawe wari uyoboye iyi nama idasanzwe, yavuze ko ku musanzu ugomba gutangwa muri uyu mwaka w’ingengo y’imari wa 2019/20, Uganda, u Rwanda na Tanzania aribyo bihugu byonyine byishyuye amafaranga make.

Nduhungirehe yagize ati “Kugeza ubu, Uganda yishyuye 72% by’umusanzu bingana na miliyoni 6 z’amadolari. U Rwanda rwishyuye 14% bingana na 1.2 z’amadolari, Tanzania yishyura 13% bingana na miliyoni imwe. Ibindi bihugu binyamuryango, ni ukuvuga u Burundi, Kenya, Sudani y’Epfo ntabwo biratanga umusanzu w’uyu mwaka.”

Yakomeje agira ati “Turacyafite ibirarane bitarishyurwa na Sudani y’Epfo bigenewe indi myaka yabanje bya miliyoni 19 z’amadolari, u Burundi bufite ibirarane bya miliyoni 3.9 z’amadolari na Kenya ifite ibirarane by’amadolari ibihumbi 160.”

Nduhungirehe yavuze ko iyi nama yamenyeshejwe n’Ubunyamabanga bwa EAC ko Sudani y’Epfo yishyuye miliyoni eshatu z’amadolari ku birarane ifite.

Yavuze ko hari icyizere ko ibihugu byose bizubahiriza itariki ya 15 Ugushyingo yashyizweho nk’igihe ntarengwa cyo kuba ibirarane byose byishyuwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza