00:00:00 IGIHE NETWORK KN KINYARWANDA EN ENGLISH FR FRANCAIS

Museveni yanze gushyiraho inyunganizi mu itumbagira ry’ibiciro, abigereranya no kwiyahura

Yanditswe na IGIHE
Kuya 23 May 2022 saa 12:43
Yasuwe :

Perezida wa Uganda Yoweri Museveni yasabye abaturage guhangana n’izamuka ry’ibiciro ku isoko, kuko yasanze leta idashobora kubavaniraho imwe mu misoro cyangwa kubunganira ngo ibiciro bidakomeza kubaremerera.

Kuri iki Cyumweru nibwo Museveni yagejeje ku baturage ijambo ribagaragariza uko igihugu gihagaze, yibanze ariko ku bukungu gusa. Ni ingingo yagendanaga n’izamuka ry’ibiciro ku isoko.

Yabanje kuvuga ko ubuyobozi bwe bwahanganye n’ibibazo bikomeye birimo icyorezo cya COVID-19, ariko ashinja amashyaka atavuga rumwe n’ubutegetsi ko mu matora aheruka yatumye ubwandu buzamuka.

Ngo nibo batumye abantu bishwe ‘iki cyorezo bava kuri 335 igihugu cyabaraga kugeza muri Werurwe 2021, bagera ku 3.600 babarwa ko bapfuye muri Uganda, mu 164.153 bamaze kwandura.

Museveni yagarutse ku kibazo cy’izamuka rikabije ry’ibiciro, avuga ko ku ruhande rumwe ryatewe n’ihenda ry’ibikomoka kuri peteroli, ariko muri rusange rishingiye ku buke bw’ibicuruzwa bikenewe biri ku isoko, ugereranyije n’ababishaka.

Muri rusange go uburyo bwakabaye bworoshye bwogukemura ikibazo, ni ukongera umusaruro ushyirwa ku isoko.

Yatanze urugero ubwo Perezida Idi Amin mu 1972 yari amaze kwirukana abashoramari bo muri Aziya, ko havutse ikibazo cy’izamuka ry’ibiciro n’ihenda ryo gukodesha inzu.

Icyo gihe ngo haje igitekerezo ko Guverinoma yatangira kugena ibiciro byo gukodesha.

Ariko ngo mu gusesengura basanze bakwiye kubirekera bikazamuka, abantu bakabona ko ari ubucuruzi bwakunguka, bakubaka inzu nyinshi, zamara kuba nyinshi ibiciro byo kuzikodesha bikimanura.

Ibyo ngo byaje gukemura ikibazo cy’imyubakire muri Kampala, Entebbe, Wakiso na Mukono.

Ati "Mu mwaka umwe cyangwa ibiri, natangiye kumva ko hari inzu nyinshi zikeneye gukodeshwa, ndetse ko zimwe zidafite abantu bo kuzikodesha."

Ibitumizwa mu mahanga

Museveni yavuze ko bijyanye n’izamuka ry’ibiciro ririho ubu, mu bitekerezo abantu batangiye kugeda bavugaho harimo ko Guverinoma yashyiraho nkuganire yaha abacuruzi ngo batazamura ibiciro, cyangwa igakuraho imwe mu misoro.

Yakomeje ati "Ku bicuruzwa bitumizwa mu mahanga, cyaba ari ikibazo gikomeye. Bishobora gutuma ubukungu buhungabana."

Yatanze urugero ku bikomoka kuri peteroli, aho mbere y’izamuka ry’ibiciro mu Ugushyingo 2021, litiro ya lisansi yaguraga Ugx. 4.590 ni ukuvuga 1,3$. Ubu igeze kuri Ugx. 5.500, ni ukuvuga 1,48$, ubariyemo imisoro.

Museveni yavuze ko ihenda rya lisansi ritera izindi ngaruka zirimo ko abakiliya barimo gusabwa gukura mu mifuka amafaranga menshi, ariko bikanasaba igihugu kuba gifite amadolari menshi kugira ngo kibashe gutumiza hanze ibikomoka kuri peteroli.

Uganda ifite ubwigame mu madolari bugera kuri miliyari 4,5$, zishobora gufasha mu gutumiza mu mahanga ibicuruzwa mu gihe cy’amezi 4,2 nubwo nta yandi yaba yinjiye.

Museveni yakomeje ati "Mu gihe twashyiraho uburyo bwo kunganira abaguzi cyangwa tugakuraho imisoro ku bitumizwa mu mahanga, uburyo bigurwa ntabwo buzahinduka, ariko buri litiro izaba itakazwaho amadolari menshi cyangwa se aniyongere."

Byogeye, ngo abantu bashobora kurushaho kugura lisansi, mu buryo bwaha urwahp magendu.

Yakomeje ati "Muri aka karere k’ibiyaga bigari, hari ikindi kibazo cya magendu. Iyo igicuruzwa gihendutse mu gihugu kimwe, urugero nko muri Uganda, biha urwaho abakora magendu bakagura ikintu muri Uganda kuri make, bakakigurisha ku mafaranga menshi mu gihugu cy’abaturanyi."

"Bityo, lisansi y’amafaranga make muri Ugada yahenduka mu karere kose. Byagira igaruka ku bwizigame bwacu. Byongeye, kuvanaho imisoro ku bicuruzwa bimwe byaba bivuze gutakaza imisoro ku ruhande rwa Guverinoma igera muri miliyari Ugx. 1530 kuri lisansi, miliyari Ugx. 1150 kuri mazutu na miliyari Ugx. 520 ku ngano."

Yahise avuga ko byagira ingaruka ku ngengo y’imari ishyirwa mu bikorwa nk’imihanda, amashanyarazi, amashuri, imiti, umutekano n’ibindi.

Yakomeje ati "Bityo, kuvanaho imisoro cyangwa gutanga inyunganizi ku bitumizwa mu mahanga byinshi ni ukwiyahura no kutareba kure.”

Ibikorerwa imbere mu gihugu

Museveni yanavuze ko yabanje gutekereza kuvanaho imisoro imwe ku bikorerwa mu gihugu nk’isukari, amata, sima n’ibindi, kubera ko abantu baguze byinshi, byaba ari byiza ku bukungu.

Nyamara ngo yageze ku misoro yahita itakara asanga ari ikibazo gikaze.

Yakomeje ati "Ku isukari twatakaza miliyari Ugx.193, kuri sima miliyari Ugx.200, ferabeto (fer a beton) miliyari Ugx.120. Twasanze inzira yo kugabanya imisoro no gutaga inyunganizi no ku bicuruzwa bikorerwa imbere mu gihugu, nayo atari nziza."

Ahubwo, Museveni yasabye abanya-Uganda kwiga gukoresha ibitumizwa mu mahanga mu burro bwitondewe, mu gihe hari ikintu gihenze, bagashaka ikindi gihendutse byakora kimwe kadi kiboeka mu gihugu, uvanyemo ibikomoka kuri peteroli.

Yakomeje ati "Dushobora gukoresha ifu y’ibitoki cyangwa imyumbati mu gukora imigati, ndetse tukarya amafunguro gakondo."

Yavuze ko na we atarya imigati y’ingano cyangwa umuceli, ko ahubwo atuzunwe n’imyumbati, ibitoki bitekanye n’ibishishwa, ubunyobwa, inyama z’inka n’ibindi.

Ati "Ku myaka hafi 78 muri Nzeri, meze neza cyane."

Yavuze ko nubwo igihugu gihanganye n’izamuka ry’ibiciro, muri Uganda bitarakomera cyane kuko ryavuye kuri 2,7%, riza kugera kuri 4,9% ririho ubu.

Icyakora ngo ikibazo kibangamiye urugendo rwo gusohoka muri ibyo bibazo ni uko ubuhinzi burimo kugendera ku mvura gusa, no kuba ikirere gikomeje kwangirika.

Museveni yagereranyije gutanga inyunganizi mu biciro no kwiyahura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .