Sudani: Abaturage babyukiye mu myigaragambyo basaba ko ishyaka rya Bashir riseswa

Yanditswe na IGIHE
Kuya 22 Ukwakira 2019 saa 12:00
Yasuwe :
0 0

Abaturage ibihumbi bo muri Sudani, kuri uyu wa Mbere bakoze imyigaragambyo basaba ko ishyaka NCP rya Omar al-Bashir uheruka guhirikwa ku butegetsi riseswa, ndetse ubutegetsi bwe bukaryozwa ibyaha byose bwakoze mu gihugu.

Ibi bikorwa byahamagajwe n’ihuriro ryanazamuye imyigaragambyo yashyize iherezo ku myaka 30 y’ubutegetsi bwa Bashir, ubu uri muri gereza ashinjwa ibyaha birimo ruswa.

Iyi myigarambyo yakozwe mu mijyi ya Khartoum, Omdourman, Madani, Al-Obeid, Port-Soudan n’ahandi, abaturage bakora ingendo bahuriza ku gusaba iseswa ry’ishyaka National Congress Party (NCP), rigifite abantu bakomeye mu butegetsi.

Umwe mu bigaragambya witwa Mohamed Musa, yabwiye RFI ko abagize ishyaka rya NCP ari ikibazo kuri demokarasi muri Sudani.

Ati "Ni abantu babi cyane kuko bashaka kongera gufata ubutegetsi, baba bakoresheje intwaro cyangwa amatora. Bakomeje gukora uko bashoboye ngo babangamire guverinoma nshya yacu. Batuma habaho ibura rya lisansi, bateza imyigaragambyo mu ngendo, ndetse mu minsi ishize bateje ubugizi bwa nabi muri kaminuza."

Yakomeje avuga ko abantu bo muri iri shyaka batifuza ko ibintu byasubira ku murongo, kugira ngo abaturage batangire kubona ko ibintu bimeze nabi kurusha ubwo Bashir yari ku butegetsi.

Ngo muri Sudani hari abarwanashyaka ba NCP muri za Minisiteri, nubwo abakomeye cyane bavanwemo ariko ngo harimo n’abo mu myanya yo hasi bafite umugambi wo kurenga ku mategeko, ku buryo iri shyaka ridakwiye kugaragara mu matora ataha.

Mohamed Musa yakomeje ati "Iri shyaka riramutse ridakumiriwe, mu minsi cyangwa ibyumweru biri imbere hazaba ibindi bibi byinshi. Guverinoma yacu imaze ukwezi; ariko bo bari muri guverinoma mu myaka myinshi. Ntabwo ari abaminisitiri bashya bayobora mu by’ukuri. Abo bantu bashaka gusubizaho ubutegetsi bwahise, kubera ko bazi neza ko umunsi umwe bazatakaza imyanya yabo. Tugomba kubakumira, ni ngombwa kubahagarika."

Iyi myigaragambyo isaba ko abayobozi b’iryo shyaka bagezwa mu butabera ku byaha bashinjwa, cyane cyane ibyabaye ku wa 3 Kamena ubwo inzego z’umutekano zatatanyaga abigaragambya ku cyicaro gikuru cy’ingabo, maze abarenga 250 bakahasiga ubuzima.

Kuri uyu wa Mbere nibwo Minisitiri w’Intebe mushya wa Sudani, Abdalla Hamdok yatangaje ishyirwaho rya komisiyo izakora iperereza kuri ubwo bwicanyi, ku buryo hagomba gutangwa ubutabera.

Abaturage bigaragambije basaba ko ishyaka rya Bashir riseswa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza