Tanzania: Umushoferi yasanzwemo Coronavirus avuye mu Burundi

Yanditswe na Rabbi Malo Umucunguzi
Kuya 26 Werurwe 2020 saa 04:15
Yasuwe :
0 0

Minisitiri w’Ubuzima muri Tanzania Ummy Mwalimu yatangaje ko habonetse umurwayi mushya wa Coronavirus mu gihugu, bituma abamaze kwandura bagera kuri 13.

Mu kiganiro n’abanyamakuru kuri uyu wa Kane, Minisitiri Mwalimu yavuze ko bamaze gupima iyi ndwara mu bantu 243 muri Tanzania n’abandi 30 muri Zanzibar.

Yavuze ko mu bipimo 273 byafashwe, abantu 260 byagaragaye ko batarwaye mu gihe abantu 13 banduye. Gusa ngo igishimishije ni uko abarwaye bose ubu bameze neza, ndetse umwe witwa Isabella Mwampampa, abaganga bemeje ko nta coronavirus ikimurimo nyuma yo kumusuzuma inshuro eshatu.

Mu bantu 13 banduye Coronavirus, umunani bari mu mujyi wa Dar Es Salaam, babiri ni muri Zanzibar, babiri bari muri Arusha n’umwe wo muri Kagera.

Minisitiri Mwalimu yakomeje ati “Amakuru dushaka kubwira abaturage ni uko kugeza uyu munsi nta burwayi burahererekanywa hagati mu gihugu, abanduye ni abinjiye mu gihugu bafite ibimenyetso by’uburwayi. Iyo dusesenguye abarwayi dufite uko ari 13, abaturage bacu ni umunani naho batanu ni abanyamahanga. Bose banyuze ku Kibuga Mpuzamahanga cy’indege cyitiriwe Julius Nyerere n’icya Kilimanjalo.”

“Ariko uyu wa Kagera, ndashaka kubigarukaho kugira ngo abantu babyumve, uwa Kagera ni umushoferi w’amakamyo manini winjiye mu gihugu anyuze ku mupaka wa Kabanga uri hagati ya Tanzania n’u Burundi, kubera ko atwara imodoka hagati ya RDC, u Burundi na Tanzania.”

Umuntu umwe watahuwemo Coronavirus utarakoze urugendo mu mahanga ngo yandujwe n’uwari uvuye hanze.

Ntabwo biramenyekana niba uyu muntu yarahagaze mu Burundi cyangwa niba indwara yasanzwemo yarayivanye muri Repubulika ya Demokarasi ya Congo. Minisiteri y’Ubuzima mu Burundi yahise itangaza ko igiye gukora iperereza ku makuru y’uko uyu murwayi yari aturutse muri icyo gihugu.

Minisitiri w'Ubuzima Ummy Mwalimu yavuze ko umuntu wasanzwemo Coronavirus yari avuye mu Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza