U Bwongereza mu gushaka uko bwagirana amasezerano mashya n’u Rwanda na EAC

Yanditswe na Habimana James
Kuya 18 Gashyantare 2020 saa 09:42
Yasuwe :
0 0

U Bwongereza burashaka kwinjira mu masezerano mashya y’ubucuruzi n’ibihugu bigize Umuryango wa Afurika y’Iburasirazuba (EAC), ni nyuma yo kwivana mu Muryango w’Ibihugu bw’Ubumwe bw’u Burayi.

Iki gihugu kikiri mu mwaka w’inzibacyuho nyuma yo kuva muri uyu muryango, ubu kirimo gushaka uko habaho amasezerano y’igihe kirekire y’ubucuruzi arambye hagati yacyo na EAC.

Ambasaderi w’u Bwongereza mu Rwanda, Jo Lomas, yabwiye itangazamakuru ko ubu barimo kureba uko habaho ibiganiro mu by’ubucuruzi.

Yagize ati “Turimo kureba uko habaho ibiganiro na EAC, bimeze nk’ibyari biriho na EU, nyuma turashaka kuzaganira ikintu gifite intego, gusa ntidushaka kurogoya ubucuruzi.”

Yavuze ko kugeza ubu batangiye ibiganiro n’ubunyambabanga bwa EAC ndetse n’ibihugu biwugize harimo n’u Rwanda.

Ati “Twatangiye ibiganiro hagati yacu n’ubunyamabanga bwa EAC harebwa uko twakomeza gutera imbere, Minisitiri w’ubucuruzi mu Rwanda yari mu Bwongereza kandi twagiranye ibiganiro by’ibanze.”

Yavuze ko kuba nta masezerano yari ariho hagati ya EAC na EU, ari byo byatumye habaho gushaka andi mashya.

Ati “Iyaba hari amasezerano y’ubucuruzi hagati ya EU na EAC twakabaye tugendera kuri ayo, ariko kugeza uyu munsi ntayo. Amahitamo yacu ni uko EAC yahitamo kuyashyiraho tukaba tuyagenderaho cyangwa tukaba twazana andi mashya.”

Ibiganiro hagati ya EAC na EU byagombaga kumara imyaka itanu, gusa kugeza ubu aya masezerano yasinywe gusa n’ibihugu bibiri aribyo u Rwanda na Kenya.

Ibindi bihugu bigize uyu muryango byavuze ko kuyasinya bizagira ingaruka ku nganda zabyo zikirimo kuzamuka, kuko ngo zidashobora guhangana n’izo muri ibi bihugu zateye imbere.

Lomas avuga ko aya masezerano azaganirwaho, azibanda ku bikenewe n’u Rwanda ndetse n’ibindi bihugu by’akarere, hagamijwe kurengera ubushobozi bw’inganda zabyo mu gihe runaka, ariko intego ari ukugira ubucuruzi bwiza.

Agira ati “Ubu turacyari mu biganiro, ntabwo nakubwira ikizaba kirimo, amasezerano yari asanzweho ni ikimenyetso cyiza cy’ibyo turimo gushaka, turashaka kuzagira igihe intego ari ukurinda inganda zimwe no kuzifungurira amasoko ariko bifite igihe runaka cyagenwe, nk’ubu turashaka ko u Rwanda rukomeza kugira ibyo rwohereza mu Bwongereza, twishimira ikawa yanyu, icyayi, n’ibindi, niyo mpamvu twifuza isoko rifunguye.”

Yavuze ko kuba baravuye muri EU, bibaha uburenganzira bwo gukora ibiganiro mu by’ubucuruzi.

U Rwanda rurashaka kuganira n'ibihugu bya EAC ku bijyanye n'ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza