Urubyiruko rw’abanyarwanda rwiga mu mahanga rwakoze umuganda rusange ku rwibutso rwa Jenoside rwa Kigali, mu rwego rwo kwifatanya n’Abanyarwanda bose nk’uko bikorwa buri cyumweru cya nyuma cy’ukwezi.

Kuri uyu wa gatandatu tariki 31 Kanama, nk’uko bisanzwe bimenyere ko icyumweru cya nyuma cy’ukwezi hakorwa umuganda rusange, urubyiruko rw’Abanyarwanda rwiga mu mahanga, rwifatanyije n’abandi rukora umuganda ku rwibutso rwa Jenoside rwa Kigali, ruri ku Gisozi.

Jean Michel Habineza Umunyeshuri wiga muri Leta Zunze Ubumwe za Amerika, mu kiganiro na IGIHE, yadutangarije ko igikorwa nk’icyo gihuza urubyiruko, akaba ari no muri urwo rwego bahise gukorera umuganda ahari amwe mu mateka yaranze u Rwanda.

Yakomeje avuga ko uretse no kuhakorera umuganda, bijyanye n’amwe mu masomo bahawe, bityo bikabafasha kwiyumvamo amateka yaranze u Rwanda, no kuyasobanurira abandi. Yagize ati “Abanyamahanga benshi ntibazi amateka y’igihugu ndetse n’aya Jenoside yakorewe Abatutsi. Abayazi nab o bafite uko bayumva bitandukanye, umwaka utaha mu gihe tuzaba twibuka ku nshuro ya 20 Jenoside yakorewe Abatutsi, turifuza kuzakora igikorwa nk’iki mu bihugu turimo, kugira ngo turusheho gusobanurira amahanga amahano yagwiriye u Rwanda.”

Arielle Gahigi umwe mu rubyiruko ruhagarariye abandi muri Loni, yadutangarije ko impamvu bahisemo gukorera umuganda ku rwibutso rwa Jenoside rwa Kigali, ari uko hari bagenzi babao batari bahazi ndetse n’abatazi amateka y’igihugu, bityo biba umwanya wo kuyazirikana.

Urubyiruko rwakoreye umuganda ku rwibutso rwa Jenoside rwa Kigali ruri ku Gisozi, ni bamwe mu bari bitabiriye Itorero rya 7 ry’urubyiruko, bakaba bari biganjemo urwiga muri Uganda, Madagasakari no mu Buhinde, bifatanyije n’abo mu murenge wa Gisozi.