Kuri uyu wa Gatandatu tariki ya 28, abakozi b’isosiyete y’itumanaho ya MTN, nk’abandi Banyarwanda bose, bitabiriye igikorwa cy’umuganda. Uyu muganda wabererye mu Murenge wa Nyarugunga. Bakoze mu busitani iyi sosiyete isanzwe itunganya baboneraho kwizihiza isabukuru y’imyaka 94 Nelson Mandela amaze avutse.

Nk’uko byatangajwe na Rwakabogo Robert ukuriye ishami ry’imenyekanishabucuruzi (marketing), ngo uyu muganda wari uteganijwe kumara iminota 67 kikaba ikimenyetso cy’imyaka 67 Nelson Mandela yamaze aharanira uburenganzira bw’abirabura muri Afurika y’Epfo.

Umunyamakuru yifuje kumenya isano iri hagati ya Mandela na MTN, ishobora gutuma aturwa umuganda w’Abanyarawanda ukaba n’umwihariko wabo, ntibawuture abandi babaye ibihangange mu Rwanda. Rwakabogo yasubije ko mu bihugu byose MTN, ikoreramo bagomba kwizihiza isabukuru ya Mandela cyane ko MTN ikomoka muri Afurika y’Epfo.

Yanongeyeho ko MTN irimo gutegura igitabo kizaba gikubiyemo ubutumwa abakunzi b’uyu mukambwe bohereje bakakimushyikiriza.

Hakorimana umwe mu baturage bari bitabiriye uyu muganda, yatangaje ko uyu muganda ufite agaciro ko kubungabunga ibidukikije. Yagize ati MTN mbere y’uko itera ibiti n’ubwatsi muri aka gace, imvura yaragwaga ahantu hose hagahinduka ibyondo ariko ubu isuri ntigitembana ubu butaka ».

Abandi bagarutse ku kamaro k’ubwo busitani mu kubakinga akazuba, aho babashaka kwiruhukira biyicariramo igihe batari mu ngo zabo.

MTN ni sosiyete icuruza ibijyanye n’itumanaho. Ikomoka muri Afurika y’Epfo ikaba ikorera mu bihugu bigera kuri 21 ku Isi. Ikunze kugira ibikorwa by’iterambere ifashamo abaturage, mu burezi n’ibindi bitandukanye.