Mu imurikagurisha ry’ikoranabuhanga ku bikorwa by’ubuhinzi n’ubworozi ryasojwe ku Cyumeru tariki ya 10 Kamena 2012, rimaze icyumweru kimwe ribera ku Murindi wa Kanombe, rwiyemezamirimo Sina Gérard ufite Entreprise yirwa Urwibutso, yongeye kwegukana igikombe ku guhanga udushya ku bikorwa bye by’ubuhinzi n’ubworozi, akaba ari igikombe cya gatatu ahawe kuva uyu mwaka watangira.
Muri iri murikagurisha ku buhinzi n’ubworozi, inganda ndetse n’amasosiyete akora ibikorwa biganisha ku buhinzi n’ubworozi yabonye umwanya mwiza wo kwerekana ibyo bakora ndetse n’ikoranabuhanga bakoresha.
Uretse Entreprise Urwibutso ya Sina, Uruganda Inyange narwo rwegukanye igihembo cyo muri uru rwego rw’inganda nini zitunganya umusaruro w’ibikomoka ku buhinzi n’ubworozii.
Sina Gérard aganira na IGIHE, yavuzeko yishimiye ibikombe akomeje guhabwa haba mu Rwanda ndetse no mu mahanga. Yagize ati:”Ndabona uyu mwaka warumbutse kuri byinshi, guhembwa n’igihugu cyawe nacyo kikaguhereza, Uburayi nabwo bukaguhereza Amerika, ibi bitanga icyizire cy’uko ibikorwa n’uruganda rwanjye bifitiye igihugu akamaro kandi bikampa n’imbaraga zo kurushaho gukora cyane.
Sina kandi yasabye abahinzi n’aborozi ko bamusura bakareba ibikorwa bye maze bagafatanya bose hamwe mu guhesha agaciro ibikomoka ku buhinzi n’ubworozi, byose biganisha ku iterambere ry’igihugu.
Iki gikombe Sina Gérard ahawe ni icya gatatu ahawe muri uyu mwaka, kuko mu minsi ishize hari icyo yakuye mu Budage ndetse n’ikindi aherutse guhererwa muri Leta Zunze Ubumwe za Amerika.
Iri murikagurisha ry’ikoranabuhanga ku bikomoka ku buhinzi n’ubworozi ryafunguwe ku mugaragaro na Minisitiri w’Intebe Dr. Pierre Damien Habumurenyi aho yashimye abari baryitabiriye, ndetse n’ikoranabuhanga rimaze kugerwaho mu buhinzi n’ubworozi maze asaba ko byava kuri bacye barifite kuri ubu, maze rikagera kuri benshi, dore ko kugeza ubu umubare munini w’Abanyarwanda bakora umwuga w’ubuhinzi n’ubworozi.
Abandi bahawe ibihembo bitandukanye:
Foto:Xavier HABINEZA
TANGA IGITEKEREZO