Abakarasi bakorera za kompanyi zitwara abagenzi muri gare ya Nyakabungo iherereye mu mujyi wa Gisenyi, mu karere ka Rubavu bakomeje guhohotera abagenzi muri iyi gare, n’ubuyobozi bw’Akarere bwarumiwe.

Iyi gare ibamo amakompanyi atwara abagenzi agera kuri ane ariyo KBS, Virunga, Belveder na Kigali Safari yose afite abakarasi bashaka abagenzi.

Aba bakarasi guhera saa Kumi mu rukerera igihe Kigali Safari iba itangiye ingendo zayo ruba rwanzikanye batangiye kwiruka barwanira abagenzi, uw’intege nkeya akabigwamo.

N’ubwo iyi gare itujuje ibyangombwa kubera ko ari ku gasi kandi ikaba harararamo ikinyabiziga icyo aricyo cyose, hakanacururizwamo inyanya n’intoryi, mu nkengero zayo hari amazu aya makompanyi atwara abagenzi akoreramo, ariko abantu bategera muri iyi gare baganiriye na IGIHE bavuze ko ari aderesi kuko nta kintu amaze, atajya akoreshwa.

Mukankaka wari ugiye i Kigali ati “abakozi baba bicayemo hariya bahembwa ay’ubusa, kuko nta muntu ujya winjiramo kubera abakarasi badashobora ku mwemerera ko ahagera.”

Mukankaka yatangarije IGIHE ko amaze kwikubita hasi inshuro 2 ku manywa yihangu ahutazwa n’abakarasi.

Usibye abagenzi batorohewe n’abakarasi muri gare ya Nyakabungo n’abashoferi bavuga ko byabayobeye, umwe mu bashoferi batwara Bus ya KBS utashatse ko izina rye rimenyekana kubera umutekano we yatangarije IGIHE ko nta munsi n’umwe ushobora kwira muri iyi gare hadakomeretse umuntu.

Yagize ati” iyo hadakomeretse umugenzi bamuhutaje abakarasi hagati yabo nibo barwana.” Uyu mushoferi yongeraho ko nabo byageze aho bikabayobera ati’ Twirirwa dukiza bukarinda bwira”.

Gusa uyu mugabo yashyize mu majwi Agency yitwa Kigali Safari ko ariyo ikurura urugomo muri iyi Gare. Yagize ati” Kigali Safari ifite umuhungu umwe wazonze abantu muri iyi gare, hagowe Virunga begeranye kuko bo abakubita buri munsi”.

Ikibazo cy’umutekano muri iyi gare kirahangayikishije kugeza naho buri Kompanyi itwara abagenzi yashatse umuntu uhora ahagaze ku muryango mu rwego rwo gukumira abakarasi badatinya kuza gusohora umuntu mu biro by’indi gare bakamujyana aho bifuza.

Umwe mu bakarasi twaganiriye yatubwiye ko ibi byose biterwa n’abaturage baza gutegera muri iyi gare ati “Bakunda umunyenga cyane araza nk’aho yakwinjiye mu modoka agatangira kwibuzabuza ubwo umuntu akaba aramuteruye da”.

Ntawe abakarasi batubahuka ngo n’Ukuriye polisi mu karere baramukurubana.

Umukarasi ati “Twebwe twarabirindutse (twararakaye) na DPC turamukarata”.

Ubwo twageraga muri iyi gare twasanze bafatanye mu mashingu ku manywa y’ihangu bapfa umugenzi washakaga gutega Virunga.

Umuyobozi w’Akarere ka Rubavu Bahame Hassan yadutangarije ko iki kibazo akizi ko nawe hari igihe ahagera bikamutangaza ati “dufite ingamba zo guca biriya bikorwa by’urugomo bikorwa n’abakarasi burundu”.

Yakomeje avuga ko ibyo bateganya atabivugira kuri telefone kubera ko ari ingamba z’umutekano, ariko ngo nta muntu uzongera gukora iriya mirimo ateza umutekano mucye.

Ibikorwa by’abakarasi mu mujyi wa Gisenyi ntabwo ari iby’ubu kuko bajya kujyana iyi gare Nyakabungo bari barabiyogoje mu mujyi wa Gisenyi rwa gati.

Muri gare rwagati hacururuzwa nko mu isoko

Foto:Rubibi O.