Byari agahebuzo! Amafoto agaragaza urugwiro Perezida Kagame yakiranywe muri Centrafrique

Yanditswe na IGIHE
Kuya 16 Ukwakira 2019 saa 12:23
Yasuwe :
0 0

Perezida w’u Rwanda Paul Kagame yagiriye uruzinduko rw’akazi rw’umunsi umwe muri Repubulika ya Centrafrique rwasojwe ibihugu byombi bishyize umukono ku masezerano y’imikoranire.

Perezida Kagame yakiriwe na mugenzi we wa Centrafrique, Faustin Archange Touadéra, ku wa 15 Ukwakira 2019.

Ni ku nshuro ya mbere Umukuru w’Igihugu yari ageze mu Mujyi wa Bangui kuva Perezida Touadéra yatorerwa kuyobora Centrafrique mu 2016.

Agikandagiza ikirenge muri iki gihugu yakiriwe mu cyubahiro kimukwiye kuva ku kibuga cy’indege. Imihanda myinshi yo mu Mujyi wa Bangui yari yarimbishijwe ibyapa bimuha ikaze ndetse abantu benshi bari bahagaze bamusuhuza.

Urugwiro ku Rwanda na Perezida warwo kandi rwanageze ku kuzamura ibendera ry’igihugu aho wasangaga mu bice bitandukanye ryashyizwe hejuru, kugeza no ku nzu z’abaturage.

Mu nzira yose igana ku Ngoro y’Umukuru w’Igihugu ya Centrafrique, Perezida Kagame na Touadéra, bagendaga basuhuza abaturage ndetse na bo bakabereka urugwiro ruhambaye.

Abakuru b’ibihugu byombi baganiriye byihariye ndetse bakurikiranye amasezerano ahuriweho mu bijyanye n’igisirikare, ubucukuzi bw’amabuye y’agaciro, peteroli no guteza imbere ishoramari ndetse n’ishyirwaho rya komisiyo ihuriweho n’impande zombi.

Perezida Kagame kandi yakiriwe ku meza na Perezida Touadéra mu isangira, aho yanahawe umudali w’icyubahiro witwa ‘Grand Croix de la Reconnaissance’, umuyobozi w’Umujyi wa Bangui amushyikiriza urufunguzo rw’uwo mujyi nk’ikimenyetso cy’uko yagizwe umuturage w’icyubahiro wawo.

Grand Croix de la Reconnaissance ihabwa umuntu ufatwa nk’indashyikirwa mu gukorana n’iki gihugu. Mu 2016, François Hollande wayoboye u Bufaransa ni we wambitswe uyu mudali.

Uyu mudali ni uwa kabiri Perezida Kagame yahawe nyuma yuko mu Ukuboza 2018, yambitswe umudari w’ishimwe uzwi “Grand-Croix de l’Ordre Nationale de Côte d’Ivoire” uhabwa umuturage w’icyubahiro w’Umujyi wa Abidjan.

Mu ijambo rye Perezida Kagame yavuze ko yanyuzwe n’umudali yahawe kandi ashimira Guverinoma ya Centrafrique kubera icyo cyubahiro yamuhaye.

Yavuze ko uru ruzinduko yahagiriye rushimangira intangiriro y’umubano mushya w’u Rwanda na Centrafrique ndetse amasezerano yasinywe ari umusingi wo kuwusigasira.

Ati “Uyu munsi twasinye amasezerano menshi y’ingenzi atuma ibikorwa duhuriyeho bishinga imizi. Iyi ni intangiriro. Aya masezerano agomba kwitabwaho mu gushyirwa mu bikorwa kugira ngo tubashe kuyubakiraho tugere kuri byinshi dufatanyije mu myaka iri imbere”.

U Rwanda na Centrafrique bisanganywe umubano mwiza mu by’umutekano ndetse muri uyu mwaka hari ingabo zo muri iki gihugu zahuguriwe mu rwa Gasabo.

U Rwanda ruri ku mwanya wa gatatu mu bihugu bifite ingabo nyinshi mu bikorwa by’Umuryango w’Abibumbye bigamije kubungabunga amahoro muri Repubulika ya Centrafrique (MINUSCA), aho abasirikare barwo barenga 1,370 n’abapolisi 430.

U Rwanda rwatangiye kohereza abapolisi mu bikorwa by’Umuryango w’Abibumbye bigamije kugarura amahoro n’umutekano muri Centrafrique muri Nzeri 2014. Nyuma y’umwaka umwe, hatangiye koherezwayo abapolisi bashinzwe kurinda ubusugire bw’abayobozi bakuru b’igihugu n’ab’Umuryango w’Abibumbye n’ibyabo.

Centrafrique ni igihugu gikungahaye ku mabuye y’agaciro arimo zahabu, diamant, uranium na peteroli n’ibiti by’imbaho zifite agaciro gahambaye.

Itsinda ry'abacuranzi ryakiriye Perezida Kagame ubwo yari ageze ku kibuga cy'indege mu Mujyi wa Bangui
Perezida Kagame yakiriwe na mugenzi we wa Centrafrique, Faustin Archange Touadéra
Perezida Kagame yakiriwe mu cyubahiro gikwiye Umukuru w'Igihugu nk'u Rwanda
Ni ku nshuro ya mbere Perezida Kagame yageze mu Mujyi wa Bangui kuva mu 2016 Perezida Touadéra atorewe kuyobora Centrafrique
Perezida wa Centrafrique, Faustin Archange Touadéra asuhuzanya n'Umuyobozi Mukuru w'Ikigo cy'Igihugu gishinzwe Iterambere (RDB), Clare Akamanzi
Perezida Kagame asuhuza bamwe mu bayobozi bakuru muri Centrafrique bamuhaye ikaze ku kibuga cy'indege
Umukuru w'Igihugu, Paul Kagame yagendaga asuhuza abayobozi batandukanye ba Centrafrique
Perezida Kagame na mugenzi we wa Centrafrique, Faustin Archange Touadéra, ubwo haririmbwaga indirimbo zubahiriza ibihugu byombi
Perezida Kagame yavuze ko u Rwanda na Centrafrique byinjiye mu bihe bishya by’umubano, nyuma yo gusinya amasezerano mu bijyanye n’igisirikare, ubucukuzi bw’amabuye y’agaciro, peteroli no guteza imbere ishoramari
Ibendera ry'u Rwanda ryari ryazamuwe hose
Ibyishimo byabasabye bakubise amaso abakuru b'ibihugu byombi
Perezida Kagame na Perezida Touadéra bagendaga basuhuza abaturage bagaragazaga akanyamuneza mu duce dutandukanye i Bangui
Abakuru b'ibihugu byombi bishimiwe cyane n'abaturage
Ibendera ry'u Rwanda naryo ryari ryazamuwe mu guha icyubahiro igihugu n'abayobozi bakuru bacyo. Byageze n'aho rishyirwa ku nzu ku mihanda
Abaturage benshi bari biteguye kwakira Umukuru w'Igihugu ku mihanda itandukanye yo mu Mujyi wa Bangui
Abaturage benshi bari bafite ibyishimo byo gutera imboni Perezida Kagame. Benshi baserutse bitwaje amabendera arimo n'ay'u Rwanda
Beretswe urugwiro ubwo bagendaga basuhuza abaturage mu nzira bagana ku Ngoro y'Umukuru w'Igihugu
Ibyapa byinshi byo mu Mujyi wa Bangui byari byashyizweho amafoto aha ikaze urugendo rwa Perezida Kagame mu Mujyi wa Bangui muri Centrafrique
Abanyarwanda baba muri Centrafrique bahaye ikaze Umukuru w'Igihugu. Mu kugaragaza urukundo bafitiye umuco Nyarwanda, intore ziyerekanye mu muhamirizo gakondo
Perezida Kagame yagiranye ibiganiro byihariye na mugenzi we wa Centrafrique, Faustin Archange Touadéra, wamwakiriye mu biro bye
Perezida Kagame na Perezida Faustin Archange Touadéra bakurikiranye amasezerano yashyizweho umukono n'impande zombi. Aha hasinyaga Minisitiri w'Ubucuruzi n'Inganda, Hakuziyaremye Soraya na mugenzi we wa Centrafrique
Aba bombi bari bafite akanyamuneza
Umuyobozi Mukuru w'Ikigo cy'Igihugu gishinzwe Iterambere (RDB), Clare Akamanzi, nyuma yo gushyira umukono ku masezerano ajyanye no kunoza imikoranire mu bijyanye n'ishoramari
Ibihugu byombi byanashyize umukono ku masezerano yo gukorana mu bijyanye n'ubucukuzi bw’amabuye y’agaciro na peteroli. Uri ibumoso ni Umuyobozi Mukuru w'Ikigo gishinzwe Mine, Peteroli na Gaz, Francis Gatare
Umunyamabanga wa Leta Uhoraho muri Minisiteri y’Ububanyi n’Amahanga, Urujeni Bakuramutsa (ibumoso) na mugenzi we bashyira umukono ku masezerano
Umunyamabanga wa Leta Uhoraho muri Minisiteri y’Ububanyi n’Amahanga, Urujeni Bakuramutsa (ibumoso) nyuma yo gusinya amasezerano hagati y'ibihugu byombi
Perezida wa Centrafrique, Faustin Archange Touadéra, yakiriye ku meza Perezida Kagame
Byari ibihe by'akanyamuneza mu isangira ry'abakuru b'ibihugu byombi
Umubano w'ibihugu byombi washimangiwe no gusangira no kwifurizanya ibyiza mu bihe biri imbere
Isangira ryahuje abakuru b'ibihugu by'u Rwanda na Centrafrique ryitabiriwe n'abandi banyacyubahiroku mpande zombi
Perezida Touadéra yambika Perezida Kagame umudali w'ishimwe nk'umuturage w'indashyikirwa w'Umujyi wa Bangui
Yahise anamuha icyemezo cy'ishimwe...
Perezida Kagame yashimye Guverinoma ya Centrafrique kubera icyubahiro yamuhaye cyo kumwambika umudali w'ishimwe
Perezida wa Centrafrique, Faustin Archange Touadéra, yashimye umubano uri hagati y'igihugu cye n'u Rwanda
Perezida Kagame yahawe urufunguzo rw’Umujyi wa Bangui nk’ikimenyetso cy’uko yagizwe umuturage w’icyubahiro wawo
Abayobozi batandukanye bishimiye gusangira

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza