Ubusesenguzi ku cyo urubanza rwa Neretse Fabien rwasize n’icyo kwitega ku rwa Kabuga Félicien

Yanditswe na Habimana James, Karirima A. Ngarambe
Kuya 1 Kamena 2020 saa 08:10
Yasuwe :
0 0

Ukwezi kwa Gicurasi kwabaye ukudasanzwe mu butabera bureba amateka ya Jenoside yakorewe Abatutsi, kuko nibwo Kabuga Félicien, umwe mu bakekwaho kuba abacurabwenge bakomeye bayo yatawe muri yombi n’inzego z’umutekano z’u Bufaransa.

Tariki 27 Gicurasi nabwo Urukiko rusesa imanza rwo mu Bubiligi rwafashe icyemezo ku buryo budasubirwaho ku bujurire bwatanzwe na Me Jean Flamme umwunganizi wa Neretse Fabien wahanishijwe gufungwa imyaka 25 ahamijwe ibyaha bya Jenoside n’ibyibasiye inyokomuntu.

Neretse yari akurikiranyweho ibikorwa by’ubwicanyi mu gihe cya Jenoside yakorewe Abatutsi i Nyamirambo no mu Mataba mu yahoze ari Komini Ndusu muri Ruhengeri.

Yarezwe gushishikariza abasirikare kwica Abatutsi, aho 13 biciwe i Nyamirambo muri Kigali.

Yanashinze Umutwe w’Interahamwe aho avuka muri Mataba, awuha intwaro mbere yo kugaba ibitero ku Batutsi, ariko anabaha ibihembo by’amafaranga.

IGIHE yifashishije abanyamategeko barimo Me Karongozi André Martin ufite ubunararibonye mu manza mpanabyaha mpuzamahanga, wunganiye kenshi mu rukiko imanza zaregwagamo abagize uruhare muri Jenoside yakorewe Abatutsi, abarizwa mu Rugaga rw’Abunganizi rwa Bruxelles na Kigali, akaba n’umwe mu bashinze akanayobora Umuryango Ibuka Mémoire-Justice-Belgique ndetse na Ernest Sagaga, wabaye Umuvugizi w’Urukiko Mpuzamahanga Mpanabyaha rw’ i La Haye mu Buholandi ndetse n’Umunyamakuru wa BBC i Londres mu Bwongereza, basesengura icyo urubanza rwa Neretse n’urwa Kabuga bivuze ku butabera buhabwa abajenosideri.

Ni imanza bavuga ko zifite byinshi zisobanuye kandi zifite aho zihuriyeho.

-  Uko Neretse yaranzwe no gupfobya Jenoside yakorewe Abatutsi mu rubanza

Me Karongozi yavuze ko urubanza rwa Neretse rwabaye nyuma y’imyaka 25 Jenoside yakorewe Abatutsi ibaye, uyu mugabo ubwo yajyaga mu rubanza akaba yari yizeye ko ibimenyetso bimwe bimushinja byasibanganye.

Mu ngero yatanze, yagize ati “Yibwiraga ko hatazagaragara ibimenyetso by’abatangabuhamya bitabye Imana kandi bari baramureze, abandi basigaye bakaba bari abana bato.”

Yavuze ko mu kuburana kwe, Neretse yakoresheje amagambo yo guhakana Jenoside yakorewe Abatutsi no kuyipfobya, akoresha n’inyandiko nyinshi z’abantu bapfobya Jenosode no kuyihakana.

Yakomeje ati “Ikintu cyiza ni uko abaturage bari mu rukiko babonye ibyo bintu byose Neretse yakoraga ngo ayobye uburari, akemeza ko ahamwe n’ibyaha bya Jenoside ku buryo budasubirwaho.”

Ni ikintu cyari kibaye bwa mbere mu Bubiligi ku manza zirebana na Jenoside yakorewe Abatutsi.

Avuga ko ibyakozwe mu Bubiligi bifitiye akamaro ubucamanza bwo muri iki gihugu ariko no ku bantu bose barebwa n’icyaha cya Jenoside.

Sagaga uyobora Itsinda rirengera ikiremwamuntu no kubungabunga umutekano w’abanyamakuru mu Ishyirahamwe Mpuzamahanga ry’Abanyamakuru (FIJ) na we yashimangiye ko ibyakozwe mu Bubiligi ari indi mpamvu izagenderwaho no mu zindi manza zijyanye n’abagize uruhare muri Jenoside yakorewe Abatutsi.

Ati “Uko izi manza ziba harimo n’urwa Neretse, bishobora gutanga ibimenyetso no mu rubanza rwa Kabuga igihe azaba atangiye kuburana, hagaragazwa uruhare rwe muri Jenoside yakorewe Abatutsi mu Rwanda.”

Sagaga yavuze ko Kabuga yafashwe na Polisi kuri manda zari zaratanzwe n’Urukiko Mpuzamahanga, bakaba bagomba kureba niba ibyaha akurikiranyweho atari ibya politiki.

Yavuze ko iyi ariyo mpamvu iyo umuntu afashwe ashyikirizwa ubutabera bw’igihugu yafatiwemo, ntahite yoherezwa mu cyamushakaga.

Sagaga yavuze ko nibasanga ibyo akurikiranyweho aribyo koko, bazemeza niba yajyanwa i La Haye mu Buholandi cyangwa Arusha muri Tanzania.

-  Ese birashoboka ko Kabuga yaburanira mu Bufaransa?

Sagaga yabwiye IGIHE ko ibyo abunganira Kabuga mu mategeko bavuga ko yaburanira mu Bufaransa, we yumva bidashoboka kuko adashakishwa n’u Bufaransa ahubwo ashakwa n’Urukiko Mpuzamahanga.

Yavuze ko kandi inkiko mpuzamahanga zifite ububasha buremereye kurusha iz’ibihugu.

Ati “Icyo bivuze ni uko iyo umuntu afashwe niyo yafatwa n’igihugu kandi koko cyifuza kumukurikirana, ziriya nkiko mpuzamahanga iyo zitabyemeye zifite ububasha bwo gutegeka kumutanga.”

-  Koherezwa mu Rwanda bisaba iki?

Sagaga yasobanuye ko kuri we asanga bishoboka ko yakoherezwa no mu Rwanda kuko mu mategeko uru rukiko ubundi rufite icyicaro cyarwo i La Haye mu Buholandi na Arusha muri Tanzania ariko binateganywa ko rwanacira umuntu urubanza mu kindi gihugu mu gihe bitabangamiye ubutabera.

Ati “Birashoboka ko urukiko ruzaburanisha Kabuga rwabikorera mu Rwanda nk’uko rwabikorera i La Haye, ibyo ni ibintu byagiye biba ntabwo ari ubwa mbere byaba bibaye.”

-  Ibintu byinshi bisa ku gufatwa kwa Kabuga na Neretse

Kabuga Félicien na Neretse Fabien bombi baciye muri Zaïre bahunga mu 1994, baca mu bindi bihugu bya Afurika bitandukanye, mu kwiyoberanya bagiye bakoresha amazina atari ayabo, bagera aho bafatwa kandi bafatirwa bombi mu Bufaransa, Neretse byabaye ngombwa ko aburanira mu Bubiligi kuko niho ikirego cyatanzwe.

Kabuga yari yashyiriweho na ICTR impapuro zo kumuta muri yombi mu 1997 ku byaha birindwi birimo icyaha cya Jenoside, ubufatanyacyaha mu cyaha cya Jenoside, gukangurira abantu gukora Jenoside, ubwinjiracyaha bwa Jenoside n’ibindi bifitanye isano na Jenoside yakorewe Abatutsi mu 1994.

Félicien Kabuga w’imyaka 84 afatwa nk’uwabaye umuterankunga ukomeye wa Jenoside, aho mu Ugushyingo 1993, icyo gihe sosiyete ye Kabuga yinjije mu gihugu toni 25 z’imihoro ivuye mu Bushinwa, nyuma muri Werurwe 1994 agura indi mihoro ibihumbi 50. Ni intwaro zakoreshejwe mu kwica Abatutsi muri Jenoside.

Uretse ibyo ashinjwa ko ari n’umwe mu banyamigabane bashinze radio RTLM, yagize uruhare rukomeye mu kubiba urwango mbere no mu gihe cya Jenoside.

Ikiganiro kirambuye abanyamategeko Karongozi na Sagaga bagiranye na IGIHE

Kabuga yafashwe muri Gicurasi ari nako kwezi igihano cya Neretse cyashimangiwe n'urukiko i Bruxelles
Me Karongozi André Martin (ibumoso) na Sagaga Ernest (iburyo) baganira n'Umunyamakuru Karirima wa IGIHE

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .