00:00:00 IGIHE NETWORK KN KINYARWANDA EN ENGLISH FR FRANCAIS

Amadosiye arenga ibihumbi 71 y’ibisigisigi bya Gacaca yerekejwe mu Bushinjacyaha

Yanditswe na

Olivier Muhirwa

Kuya 6 November 2012 saa 09:18
Yasuwe :

Amadosiye agera ku bihumbi mirongo irindwi na kimwe na magana atanu na mirongo itanu n’umunani (71,558), y’abantu bakatiwe na Gacaca badahari yashyikirijwe Ubushinjacyaha bw’u Rwanda, nyuma y’aho Inkiko Gacaca zisoje ku mugaragaro imirimo yazo muri uyu mwaka mu kwezi kwa Kamena.
Aba bantu barenga ibihumbi 70 bakurikiranwe, ni abakatiwe n’Inkiko Gacaca batari mu Rwanda, cyangwa se abakatiwe bagahita bacika kuri ubu irengero ryabo rikaba ritazwi, hari abandi kandi bari mu rwego rwa ba (…)

Amadosiye agera ku bihumbi mirongo irindwi na kimwe na magana atanu na mirongo itanu n’umunani (71,558), y’abantu bakatiwe na Gacaca badahari yashyikirijwe Ubushinjacyaha bw’u Rwanda, nyuma y’aho Inkiko Gacaca zisoje ku mugaragaro imirimo yazo muri uyu mwaka mu kwezi kwa Kamena.

Aba bantu barenga ibihumbi 70 bakurikiranwe, ni abakatiwe n’Inkiko Gacaca batari mu Rwanda, cyangwa se abakatiwe bagahita bacika kuri ubu irengero ryabo rikaba ritazwi, hari abandi kandi bari mu rwego rwa ba ruharwa, aba Gacaca ikaba itari ifite ubushobozi bwo kubaburanisha.

Tuganira n’Umuvugizi w’Ubushinjacyaha bw’u Rwanda Mukuralinda Alain mu gitondo cyo kuri uyu wa Kabiri tariki ya 06 Ugushyingo 2012, yavuze ko aya madosiye bashyikirijwe na Gacaca harimo ay’abakatiwe na Gacaca badahari, abari mu cyiciro cya mbere cya ba Ruharwa bataburanye, ndetse n’abandi bagifite imanza zabo zitarangijwe burundu na Gacaca.

Mukurulinda avuga ko ubu bagiye gukurikirana neza bakareba niba hari amadosiye akenewe gukorerwa amaperereza bundi bushya agakorwa, andi bidakenewe bagakora dosiye zikoherezwa mu nkiko, na ho abacitse Gacaca barakatiwe bagategereza ko bagaruka mu gihugu cyangwa se bakavugana n’ibihugu bahungiyemo kugira ngo baze kurangiza ibihano.

Ku kibazo cy’abakatiwe na Gacaca badahari, Mukuralinda yavuze ko bagifite amahirwe yo kuba bajuririra ibyo bihano igihe bagarutse mu gihugu, kuko iyo bagarutse babanza kumenyeshwa imyanzuro y’urubanza mbere yo gushyira mu bikorwa icyemezo cy’urukiko; bakaba baba bafite uburenganzira bwo kujurira.

Tumubajije niba uwakatiwe gufungwa ahita afungwa igihe ageze mu gihugu, Mukuralinda yavuze ko atari ko bimeze, ahubwo ko akomeza kumera uko yari ameze mu gihe urubanza rwabaga kugeza igihe rukaswe burundu.

Kuba hari abakatiwe badahari cyangwa bagacika ubutabera, Mukuralinda avuga ko aba hari uburyo ubutabera bw’u Rwanda bukorana n’ibihugu baherereye mo kugira ngo babe bagarurwa mu gihugu kuza kurangiza ibihano, ariko ko badashyirirwaho manda zo kubata muri yombi kuko manda zishyirirwaho gusa abashakishwa n’ubutabera batari baburana.

Kugeza ubu hari abantu bagera ku 146, bashyiriweho impapuro mpuzamahanga zo kubata muri yombi, aba bakaba bakurikiranweho ibyaha bya Jenoside, cyangwa se ibindi byaha byibasiye inyokomuntu byakorewe mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .