Abadepite bemeje ko ingengo y’imari ya 2018/2019 yiyongeraho miliyari 141 Frw

Yanditswe na HABIMANA James
Kuya 12 Gashyantare 2019 saa 09:46
Yasuwe :
0 0

Abagize Inteko ishinga amategeko bemeje itegeko ryongera ingengo y’imari ya leta ho miliyari 141 Frw.

Mu gihe ingengo y’imari ishize yari tiliyari ibihumbi 2.4, iy’uyu mwaka yo iri hejuru ya tiliyari 2.5 Frw.

Guverinoma yemeje umushinga w’itegeko ryongera ingengo y’imari mu kwezi gushize mu nama y’Abaminisitiri, ariko nk’uko amategeko abiteganya bigomba kubanza kwemezwa n’inteko ishinga amategeko.

Minisitiri w’imari n’igenamigambi Dr. Uzziel Ndagijimana, yavuze ko aya mafaranga azava mu misoro n’ahandi.

Leta irimo kongera amafaranga kugira ngo ikomeze bimwe mu bikorwa by’imishinga ifite ijyanye n’ibikorwa remezo, uburezi, ubuhinzi ndetse n’ubuvuzi.

Minisitiri Ndagijimana aherutse gutangaza ko muri rusange inyongera ku ngengo y’imari izafasha muri gahunda zitandukanye zirimo; kongera 10% ku mushahara wa mwarimu , kongera ibitabo mu mashuri mu rwego rwo kuzamura ireme ry’uburezi, kwishyura inyungu ku nguzanyo za Leta.

Hari ugushyira mu bikorwa Politiki ya Leta ivuguruye yo korohereza abayobozi mu ngendo, gufasha ibigo bishya byatangijwe hamwe n’ibyavuguruwe kurangiza inshingano zabyo, kongera ububiko bwa Leta bw’ibikomoka kuri peteroli hamwe no gutegura ibikorwa byo kwibuka Jenoside yakorewe Abatutsi ku nshuro ya 25.

Amafaranga agenerwa imishinga y’iterambere ateganyijwe kwiyongera kuva kuri Miliyari 936.6 z’Amafaranga y’u Rwanda kugera kuri Miliyari 1,041 z’Amafaranga y’u Rwanda, bivuze ko yiyongeraho agera kuri Miliyari 104.3 z’Amafaranga y’u Rwanda.

Iyi nyongera ikazakoreshwa ku mishinga itandukanye irimo cyane cyane imishinga igamije guteza imbere serivisi z’ubuzima harimo kurwanya imirire mibi no kugwingira; kurwanya indwara ya Malariya, Igituntu na SIDA; gutunganya Icyanya kizakorwamo ubuhinzi mu gace ka Gabiro mu Karere ka Gatsibo (Gabiro Agribusiness Hub).

Hari ugukomeza gukwirakwiza amashanyarazi mu cyaro ndetse n’ahakorerwa imirimo y’inganda; kubaka stade nshya itwikiriye, kwagura Stade Amahoro; kongera ibikorwaremezo birimo imihanda itandukanye igamije guteza imbere ubuhahirane no gufasha abahinzi borozi kugeza umusaruro ku masoko; ndetse no kongera umusaruro w’ubuhinzi binyuze mu gukomeza gutanga inyongeramusaruro.

Byateganyijwe ko iyi ngengo y’imari izashyirwa mu bice bitatu, mu bukungu hazajya 57% by’ingengo y’imari, mu mibereho myiza hajye 27% naho mu miyoborere ho hazajya 16%.

Abadepite bemeje ko ingengo y'imari yiyongeraho miliyari 141 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza