Abahuza mu biganiro bya Uganda n’u Rwanda bifuje ko inama ya Kampala yaba iya nyuma ivuga ibibazo

Yanditswe na Philbert Girinema
Kuya 13 Ukuboza 2019 saa 06:57
Yasuwe :
0 0

Minisitiri w’Intebe wungirije akaba na Minisitiri w’Umutekano muri Repubulika ya Demokarasi ya Congo, Gilbert Kankonde, yasabye u Rwanda na Uganda gufunguka bikabwizanya ukuri, ku buryo inama yabihuje kuri uyu wa Gatanu yaba iya nyuma iganirirwamo ibibazo.

Kuri uyu wa Gatanu nibwo intumwa z’u Rwanda na Uganda zahuriye mu biganiro i Kampala, bigamije gushakira hamwe umuti ku mwuka mubi ukomeje gututumba hagati y’ibihugu byombi. Ni ibiganiro ibihugu bya RDC na Angola byitabiriwe nk’abahuza.

Ubwo ibiganiro byafungurwaga muri Speke Resort Munyonyo Hotel, ibihugu by’abahuza nibyo byahawe kuvuga imbwirwaruhame zibanza, hakurikiraho kuganirira mu muhezo.

Minisitiri Kankonde yavuze ko kwitabira ibi biganiro bigaragaza ubushake bw’igihugu cye mu gufatanya n’ibindi mu gushaka umuti w’ibibazo, binyuze mu kwicara hamwe bakabicoca.

Yavuze ko nk’uko babishimangiye mu biganiro bya mbere byabereye i Kigali ku wa 16 Nzeri 2019, “abavandimwe ba Uganda n’u Rwanda bafunguka bakabwizanya ukuri,” kandi yizeye ko igihe cyashyizwe hagati y’inama iheruka n’iyabaye uyu munsi, cyabaye umwanya wo kurushaho kumva ibibazo birimo gutandukanya ibihugu byombi, ku buryo “uyu munsi waba uwo gutanga ibisubizo byahagarika iyi kanseri ikomeje kutumunga.”

Yakomeje ati “Ntabwo tugiye kuvuga imbwirwaruhame ndende kuko umwanya w’ibanze ari uw’abavandimwe bacu babiri, kandi nizera ko bagiye kutumurikira ibyo twiyemeje mu nama iheruka. Kandi twakwifuje ko ibiganiro nk’ibi bitaba nk’iby’imiryango myinshi yagiye ijyaho, igakora inama zitarangira ariko ntigere ku bisubizo by’ibibazo bihari.”

“Ndabifuriza ibiganiro byiza, kandi nakwifuje ko biba nk’ubwa nyuma, ku buryo ubutaha twazahura twishimira ukugaruka k’umubano mwiza w’abaturanyi n’abavandimwe”.

Minisitiri w’Ububanyi wa Angola, Manuel Domingos Augusto, yavuze ko mu nama ya mbere yabereye i Kigali, hagaragaye ubushake bwa Guverinoma zombi bwo kugera ku bwumvikane bugamije kunoza umubano w’ibihugu byombi mu nyungu z’abaturage.

Ati “Ibyo byagaragarije Isi yose ko mu ntekerezo z’ubuvandimwe bwa kinyafurika n’ubufatanye, abanyafurika bashobora kubona ibisubizo ku kutumvikana uko ari ko kose gushobora kuvuka hagati yabo binyuze mu biganiro.”

Yakomeje avuga ko Angola igishyigikiye amasezerano ya Luanda ndetse ko yiteguye gukomeza gutanga umusanzu nk’umuhuza mu biganiro aho biri ngombwa.

Yavuze ko igihugu cye cyizeye ko ibihugu byombi bifite buri kimwe cyose cyatuma “ibi biganiro bitanga umusaruro bijyanye n’akamaro ibihugu byombi bibonamo” hagamijwe amahoro n’umutekano nk’inkingi ya mwamba y’ukwihuza kw’akarere.

Ati “Ibi bigaragaza ibyo twiteze mu kumva umusaruro mwiza uri butangwe n’intumwa z’u Rwanda na Uganda ushimangira akazi kamaze gukorwa.”

U Rwanda rwakomeje kugaragariza Uganda ingingo eshatu zahungabanyije umubano w’ibihugu byombi kandi ko ibifitemo uruhare, zirimo ifatwa rw’Abanyarwanda muri Uganda mu buryo budakurikije amategeko, bagakorerwa iyicarubozo, abandi bagahohoterwa nyuma bakajugunwa ku mipaka bagizwe intere.

Harimo kandi kuba Uganda ibangamira ibikorwa by’ubucuruzi by’u Rwanda ndetse ifasha imitwe y’iterabwoba igamije guhungabanya umutekano warwo.

Amakuru agera kuri IGIHE avuga ko nyuma ya tariki 16 Nzeri, u Rwanda rwoherereje Uganda urutonde rw’abanyarwanda bari bafungiweyo mu buryo bunyuranyije n’amategeko. Byakozwe binyuze mu nyandiko (notes verbales) eshanu zoherejwe nyuma y’inama, ziyongera ku zoherejwe mbere, zose hamwe ziba 35.

U Rwanda rwagaragaje ko nta mutwe n’umwe rwigeze rushyigikira ugamije guhungabanya umutekano wa Uganda, kandi nta muturage wa Uganda ufungiwe mu Rwanda mu buryo bunyuranyije n’amategeko.

Nyamara rwagaragarije Uganda ibimenyetso bitandukanye bigaragaza uko imitwe yitwaje intwaro ikomeje kwisuganyiriza muri iki gihugu cy’igituranyi. Iyo irimo FDLR, RNC, RUD Urunana n’indi.

Ubuhamya bw’abari abarwanyi ba FDLR na P5 ishamikiye kuri RNC, bwakomeje gushimangira uburyo Uganda ikomeje gufasha imitwe y’iterabwoba igamije guhungabanya umutekano w’u Rwanda, ndetse bamwe basabye imbabazi imbere y’inkiko nubwo umwanzuro wa nyuma utarafatwa.

Kuva aho inama ya Kigali ibereye, Abanyarwanda 99 nibo bamaze kujugunywa ku mipaka ihuza u Rwanda na Uganda mu gihe kuva uyu mwaka watangira ari 588.

Kuva muri Mutarama 2018, abanyarwanda 1438 nibo bajugunywe ku mipaka nyuma y’igiye bafungiwe muri kasho z’Urwego Rushinzwe Iperereza rya Gisirikare (CMI) n’Urwego Rushinzwe Iperereza mu gihugu (ISO) bakorerwa iyicarubozo.

Minisitiri w’Intebe wungirije akaba na Minisitiri w’Umutekano muri Repubulika ya Demokarasi ya Congo, Gilbert Kankonde, yasabye u Rwanda na Uganda ko byabwizanya ukuri, iyi ikana inama ya nyuma ivuga ibibazo
Minisitiri w’Ububanyi wa Angola, Manuel Domingos Augusto, iyi nama igaragaza uburyo Afurika irajwe ishinga no kwikemurira ibibazo
Minisitiri w'Ubutegetsi bw'Igihugu, Prof Shyaka Anastase aganira na Ambasaderi w'u Rwanda muri Uganda, Gen Maj Frank Mugambage
Minisitiri w'Umutekano, Gen Patrick Nyamvumba, ni umwe mu baminisitiri bane bitabiriye ibi biganiro ku ruhande rw'u Rwanda
Minisitiri w'Ububanyi n'Amahanga wa Uganda, Sam Kutesa, asoma inyandiko zerekeye iyi nama mbere y'uko itangira
Ambasaderi wa Uganda mu Rwanda, Oliver Wonekha, nawe ari mu bitabiriye ibi biganiro
Umunyamabanga Mukuru w’Urwego Rushinzwe Iperereza n’Umutekano w’Igihugu, Gen Maj Joseph Nzabamwita (ubanza) yitabiriye ibi biganiro
Umunyamabanga wa Leta muri Minisiteri y'Ububanyi n'Amahanga, Olivier Nduhungirehe aganira na Minisitiri w'Ubutabera, Johnston Busingye; ku ruhande hari Minisitiri w'Ubutegetsi bw'Igihugu, Prof Shyaka Anastase

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza