Abana 13 bafungiye muri Gereza ya Nyagatare batangiye ibizamini bisoza amashuri abanza

Yanditswe na Evariste Nsengimana
Kuya 4 Ugushyingo 2019 saa 11:48
Yasuwe :
0 0

Abana 13 bafungiye muri Gereza y’abana ya Nyagatare, bari mu banyeshuri basaga ibihumbi 286 batangiye gukora ibizamini bya leta bisoza amashuri abanza, aho babikoreye ku rwunge rw’amashuri abanza rwa Nyagatare.

Kuri uyu wa 4 Ugushyingo nibwo hirya no hino mu gihugu abarangije amashuri abanza batangiye ibizamini bya Leta biyasoza, aho bizarangira ku wa 6 Ugushyingo 2019.

Imibare itangwa n’Ikigo cy’Igihugu cy’Uburezi (REB) yerekana ko mu mashuri abanza, abana banditse bakora ikizamini cya Leta ari 286 087, mu gihe abagikoze mu mwaka ushize bari 255 173, ari byo bihwana n’ubwiyongere bwa 12%. Mu bakoze uyu mwaka, abakobwa ni 154 339 naho abahungu ni 131 748.

Umuvugizi w’Urwego rw’Imfungwa n’Abagororwa (RCS), SSP Sengabo Hillary, yabwiye IGIHE muri abo bana 13 harimo abakobwa babiri.

Yasobanuye ko muri abo bana bakoze ibizamini uwakatiwe igihano kinini ari imyaka 10 nyuma yo guhamywa icyaha cyo gufata ku ngufu mu gihe uwakatiwe gito ari imyaka ibiri ahamijwe icyaha cy’ubujura.

Umuyobozi ushinzwe ibikorwa byo kugorora muri RCS, ACP Kabanda Jean Bosco, wari uhagarariye Umuyobozi Mukuru wa RCS, yasabye abo bana bafunze bagiye gukora ikizamini cya Leta “gutsinda cyane nk’uko n’ababanjirije bose bagiye batsinda. Bakagire umwete ndetse bakigirira icyizere, ntibiyumve nk’imfungwa.”

Umunyamabanga wa Leta muri Minisiteri y’Uburezi, ushinzwe amashuri abanza n’Ayisumbuye, Dr Munyakazi Isaac, watangije ibizamini ku Rwunge rw’amashuri rwa Kimisagara mu Karere ka Nyarugenge ku rwego rw’igihugu, yasabye abanyeshuri gukora neza bagahesha ishema abarezi n’ababyeyi.

Ni umwaka wa wa kane abana bafungiye muri Gereza y’abana ya Nyagatare bakora ibizamini bya Leta aho muri rusange abamaze kubyitabira ari 74 ubariyemo n’ab’uyu mwaka.

Abatsinze neza ibizamini bose Perezida Kagame yabahaye imbabazi, bararekurwa, bajya gukomereza amasomo mu mashuri atari aya gereza.

Gereza y’abana ya Nyagatare ifungiyemo abana 509 bashinjwa ibyaha bitandukanye birimo gukubita no gukomeretsa, gufata ku ngufu, ibiyobyabwenge n’ubujura.

REB igaragaza ko mu gihugu ahakorerwa ibizamini by’amashuri abanza hiyongereye, hava kuri 859 umwaka ushize ubu hakaba ari 893, bihwanye n’ubwiyongere bwa 4.1%.

Abana bafungiye muri Gereza ya Nyagatare basabwe gukorana icyizere bakazatsinda neza
Bakoreye ibizamini kuri GS Nyagatare

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza