Nyagatare: Abangavu baterwa inda no gucana inyuma byaje ku isonga mu bibangamiye abaturage

Yanditswe na Hakizimana Jean Paul
Kuya 30 Ugushyingo 2020 saa 05:29
Yasuwe :
0 0

Abaturage bo mu Karere ka Nyagatare bagaragaje ibibazo by’abangavu baterwa inda no gucana inyuma mu bibangamiye abatuye Nyagatare, banasaba ubuvugizi ku bindi hagamije kurushaho kugira imibereho myiza.

Ibi byagaragajwe mu mpera z’icyumweru gishize ubwo habaga inama mpuzabikorwa yanasinyiwemo imihigo mishya hagati y’imirenge, abafatanyabikorwa n’Akarere.

Urwego rw’Igihugu rw’Imiyoborere (RGB) rwaboneyeho kumurikira abayobozi bo muri aka Karere ubushakashatsi bwakozwe buzwi nka CRC (Citizen Report Card), bukorwa buri mwaka hagamijwe kugaragaza ishusho y’uko imiyoborere ihagaze mu gihugu mu byiciro bitandukanye.

Niyibikora Sylvere ukora mu ishami rishinzwe ubushashatsi muri RGB, yagaragaje ibibazo byavuzwe n’abaturage nk’ibibabangamiye, anagaragaza n’ibyo babona bikenewe gukorerwa ubuvugizi ngo byitabweho mu maguru mashya.

Ati “Ikiza ku isonga mu bibangamiye abatuye Nyagatare ni abangavu baterwa inda, gucana inyuma ku bashakanye, amakimbirane yo mu miryango, guhozwa ku nkeke no gutotezwa bikigaragara mu miryango, ikibazo cy’abana b’inzererezi biyongera cyane, gukoresha abana imirimo ivunanye, guha akato abafite ubumuga mu miryango, ubwicanyi hagati y’abashakanye no mu muryango muri rusange ndetse gufata ku ngufu.”

Niyibikora yakomeje agaragaza ko uretse ibi bibazo bibangamiye abatuye Nyagatare, banagaragaje ibikwiriye gukorerwa ubuvugizi mu maguru mashya babona bitera biriya bibazo.

Ati “Abatuye Akarere ka Nyagatare kandi bagaragaje bimwe mu bikwiriye gukorerwa ubuvugizi bitera kenshi ibi bibazo, harimo ubusinzi n’ibiyobyabwenge, ibi ngo biri mu mpamvu zituma habaho n’ibindi bibazo byinshi bishamikiye ku businzi n’ibiyobyabwenge byinshi bigaragara muri aka Karere.”

“Kudakoresha neza umutungo aho bamwe bawusesagura, kutabona umwanya wo kuganira mu muryango, kudasobanukirwa n’ihame ry’ubwuzuzanye n’uburinganire ndetse no kudohoka kw’ababyeyi mu mirerere.”

Niyibikora yasabye ubuyobozi bw’Akarere ka Nyagatare kwita kuri ibi bibazo mu rwego rwo kurushaho kuzamura imibereho myiza y’abaturage.

Akarere ka Nyagatare gakunze kuza ku isonga mu bijyanye n’ihohoterwa rikorerwa abangavu, aho kuva muri Nyakanga 2019 kugera muri Kamena 2020, RIB yakiriye ibirego by’abangavu 288 basambanyijwe mu bagera ku 1600 bakorewe iki cyaha.

Niyikora Sylvere ukora mu ishami rishinzwe ubushakashatsi muri RGB, yavuze ko ihohoterwa n'ubusinzi biri mu bibangamiye abaturage ba Nyagatare
Abayobozi batandukanye bitabiriye uyu muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .