Abanyeshuri barenga ibihumbi 19 biga imyuga n’ubumenyingiro batangiye ibizamini bya leta

Yanditswe na Hakizimana Jean Paul
Kuya 8 Ukwakira 2019 saa 01:27
Yasuwe :
0 0

Abanyeshuri biga mu mashuri y’imyuga n’ubumenyingiro hirya no hino mu gihugu batangiye ibizamini bya leta byo gushyira mu ngiro (pratique) ibyo bize, aho bizamara ibyumweru bitatu.

Aba banyeshuri biga mu mashami 39 barimo n’abize ibijyanye no gusifura, umuziki n’umupira w’amaguru.

Ibi bizamini byatangijwe ku mugaragaro kuri uyu wa Kabiri tariki 08 Ukwakira 2019, mu Karere ka Kayonza ku ishuri ry’imyuga n’ubumenyingiro rya Nyamirama TVET, bitangizwa na Minisitiri w’uburezi, Dr Eugène Mutimura, n’abandi bayobozi batandukanye.

Mu gihugu hose ibi bizamini bikazakorerwa kuri site 142 bikorwe n’abanyeshuri ibihumbi 19 334 barimo 996 bakora nk’abakandida bigenga.

Minisitiri Mutimura yasabye abarimu bigisha mu mashuri y’imyuga kujya bibanda cyane ku bumenyi ngiro kuruta uko bakwibanda cyane mu mpapuro.

Yagize ati “Abarimu mu by’ukuri barasabwa ko imyigishirize yabo igomba kuba ishingiye ku bumenyi ngiro kuruta kwigisha mu mpapuro nk’uko byari bisanzwe.”

Yakomeje agira ati “Mu myaka yashize kugira ngo igikorwa nk’iki kibe wasangaga baha umunyeshuri iminota 25 agasobanura ibyo yakora, none ubu baramuha amasaha atanu atandatu kugira ngo akore buri kimwe cyose yitonze, turasaba abarimu gukomereza aho bakubaka ubushobozi mu banyeshuri kugira ngo batange umusaruro.”

Umuyobozi w’agateganyo mu Ishami ry’ibizamini mu Ishuri rikuru ry’imyuga n’ubumenyingiro Manirambona Leonard, yavuze ko muri ibi byumweru bitatu hazakorwamo ibizamini mu mashami 39, mu mpinduka ngo zabaye harimo kuba abanyeshuri batagikorera mu matsinda ahubwo buri wese ngo asigaye akora ikizamini ku giti cye.

Manirambona yakomeje avuga ko muri uyu mwaka bafite abanyeshuri bize ibijyanye n’umupira w’amaguru ndetse no gusifura nabo batangiye ibi bizamini.

Ati “Dufite abana bigaga ibijyanye no gusifura ndetse n’umupira w’amaguru mu Kigo cya Kabutare TVET mu gihe cy’imyaka itatu, abo nabo batangiye ibizamini, dufite kandi abandi bigaga ibijyanye n’umuziki abo bose tukaba tubitezeho umusaruro.”

Namahirwe Tharcisse wiga ibijyanye no gusudira mu ishuri rya Nyamirama TVET yavuze ko yahisemo kwiga gusudira ngo kuko hanze aha asanga ari umwuga utunze benshi kandi udakorwa n’abantu benshi.

Ati “Niteguye neza gukora ibi bizamini, nahisemo kwiga gusudira kuko ku isoko ry’umurimo hari akazi kenshi kandi gatunze abantu benshi.”

Ibi bizamini bikazakorwa mu mashami arimo nko gusudira, guteka, ibijyanye n’amashyamba, kuvura amatungo, harimo kandi amashami mashya nk’abigaga gusifura, umupira w’amaguru, umuziki n’ayandi menshi.

Leta y’u Rwanda ifite intego ko mu 2024 abanyeshuri biga amashuri y’imyuga n’ubumenyi ngiro bazagera kuri 60% nyuma yo kubona ko ariho hashobora kuboneka guhanga no gutanga imirimo mu buryo bworoshye.

Minisitiri Mutimura n'abandi bayobozi nibo batangije ibi bizamini
Ibi bizamini bizamara ibyumweru bibiri
Abarenga ibihumbi 19 nibo bazakora ibi bizamini uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza