Abarundi bafungiwe kugambirira guhungabanya umutekano w’u Rwanda barusabye ubuhungiro

Yanditswe na Rabbi Malo Umucunguzi
Kuya 21 Ukwakira 2019 saa 02:54
Yasuwe :
0 0

Abarundi bari mu itsinda ry’abantu 25 bakurikiranyweho kuba mu Mutwe w’Abarwanyi wa P5, bemeye ibyaha baregwa byo kwinjira mu mutwe w’ingabo utemewe no kurema umutwe w’abagizi ba nabi, ariko babwira urukiko ko baramutse barekuwe, bahabwa ubuhungiro kuko batinya gusubira iwabo.

Kuri uyu wa Mbere urubanza rw’abantu 25 baregwa gukorana n’Umutwe wa P5, rwakomeje abaregwa bisobanura ku byaha birimo kwinjira mu mutwe w’ingabo utemewe, kugambirira kugirira nabi ubutegetsi buriho, kugirana umubano na leta y’amahanga hagamijwe gushora intambara no kurema umutwe w’abagizi ba nabi.

Mu baregwa harimo Abanya-Uganda batatu aribo Lubwana Suleiman, Katwere Joseph na Desideriyo Fred n’Abarundi bane aribo Ndirahira Jean de Dieu, Nsengiyumva Janvier, Minani Jean na Nsabimana Jean Marie Vianney.

Muri iri buranisha ku ifungwa n’ifungurwa ry’agateganyo, hagaragajwe uburyo abantu bagiye muri P5 hafi ya bose banyuze mu Burundi, babifashijwemo n’abasirikare b’u Burundi barimo Colonel Ignace Sibomana ushinzwe Iperereza rya Gisirikare (Chief J2) na Major Bertin ushinzwe Iperereza ryo hanze.

Hagenda hanagaruka ku basirikare b’Abarundi bagiye bambutsa muri RDC bavuye mu Burundi barimo Maso, Soldat Cyuma, Renzaho na Kimweshi.

Kubera uruhare rw’icyo gihugu muri uyu mutwe wa P5, Abarundi barimo kuburanira mu Rukiko rwa Gisirikare mu Rwanda, babwiye urukiko ko bifuza kuburana bari hanze, ariko ko leta yabashakira aho baba bari mu gihe urubanza rwaba rukomeje.

Banavuze ko mu gihe baba barekuwe, igihe cyose bafungurwa bahabwa ubuhungiro mu Rwanda, kuko bafite ubwoba ko ababinjije muri ibi bikorwa babahiga.

Nsabimana Jean Marie wo mu Cibitoke, yavuze ko hari umugabo yakoreraga, amaze kumuhemba amubwira ko amufitiye akandi kazi ko kumucururiza i Bujumbura.

Ngo yabiganiriye n’umugore we amwemerera kugenda, bageze i Bujumbura wa mugabo amwinjiza mu gipangu, yakirwa n’abasirikare b’u Burundi we yisubirira inyuma. Ni uko yahujwe n’abandi bajyanwa muri P5 mu Bijabo muri RDC. Yemera icyaha cyo kurema umutwe w’ingabo utemewe.

Yahakanye icyaha cy’ubugambanyi bugamije kugirira nabi ubutegetsi buriho, avuga ko atari kubijyamo kuko atazi gusoma no kwandika, anahakana kugirana umubano na Leta y’amahanga hagamijwe gushoza intambara kuko ngo na telefoni atazi kuyikoresha. Yavuze ko yinjiye mu mutwe w’abagizi ba nabi ariko yasanze barawuremye, akabisabira imbabazi.

Ati "Icyanyuma nkaba nsaba imbabazi Leta y’u Rwanda, papa yambyariye mu Burundi arinda apfa atanyeretse mu Rwanda, na mama arinda apfa, nkaba nsaba imbabazi, nkasaba Leta y’u Rwanda ko yareba, kuko yanyakiriye ubu merewe neza, ko yampa ubuhungiro nanjye nkaba muri iki gihugu, kuko nsubiye mu Burundi nagira ibibazo. "

Nsengiyumva Janvier na we yemeye icyaha cyo kwinjira mu mutwe w’ingabo utemewe no kurema umutwe w’abagizi ba nabi, ibindi byaha arabihakana. Yasabye ko aramutse arekuwe yahabwa ubuhungiro ati "kuko ndamutse nsubiye mu Burundi ubuzima bwanjye bwakononekara."

Ni kimwe na mugenzi wabo Ndikurugendo Issa, wemeye icyaha cyo kwinjira mu mutwe w’ingabo utemewe no kurema umutwe w’abagizi ba nabi, ibindi abihakana avuga ko nta bushobozi bwo kubikora yari afite.

Me Mujawamariya Dative ubunganira yavuze ko nubwo bazabisobanura mu kuburana mu mizi, itegeko rigena ko byitwa icyaha iyo umuntu yinjiye ku bushake mu mutwe utari ingabo zemewe z’igihugu, aba akoze icyaha, kandi ngo abakiliya be bagiye muri P5 atari ku bushake, ku buryo badakwiye kubikurikiranwaho.

Yavuze ko abo yunganira bakeneye ubutabera mu buryo bubiri: nk’abakekwaho ibyaha bashinjwa ariko kandi nk’abahohotewe, kuko ukurikije uko bakuwe mu ngo zabo bakajyanwa mu ishyamba muri ibi bikorwa, bahohotewe, bacurujwe.

Yavuze ko nk’uko babyivugira, ubu kuko bafungiwe mu Rwanda umutekano wabo urinzwe, ariko bafite impungenge ku gihe cyo gusubira mu Burundi.

Kuri uyu wa Mbere Ubushinjacyaha bwasabye ko abaregwa bose bafungwa iminsi 30 y’agateganyo, kuko kuba abaregwa bemera bimwe mu byaha, ari ikimenyetso gikomeye gituma n’ibindi byaha baregwa, bikekwa ko babikoze.

Ikindi ngo ni uko kuba hari ibyaha abaregwa batemera kandi Ubushinjacyaha bubibarega, bikeneye gukorwaho iperereza rihagije ku buryo dosiye izaregerwa Urukiko Rukuru rwa Gisirikare inonosoye.

Biteganyijwe ko kuri uyu wa Kabiri, abaregwa bose bazarangiza gutanga imyanzuro yabo ku busabe bw’Ubushinjacyaha ko abaregwa baburana bafunzwe, ari nabwo hazatangazwa itariki yo gutangaza icyemezo cy’urukiko.

Abaregwa kuba mu mutwe wa P5 basabye urukiko kurekurwa by'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza