Abashakashatsi n’abanditsi basabye kaminuza zo mu Bubiligi guhagarika ibiganiro bya Judi Rever upfobya Jenoside

Yanditswe na Rabbi Malo Umucunguzi
Kuya 9 Ukwakira 2019 saa 05:49
Yasuwe :
0 0

Abashakashatsi n’abanditsi basaga 60, bahuje imbaraga bandikira kaminuza enye zo mu Bubiligi, zateguye ibiganiro by’umunyamakurukazi wo muri Canada, Judi Rever, wanditse igitabo cyanenzwe ko gipfobya Jenoside yakorewe Abatutsi mu 1994.

Mu gitabo ‘In Praise of Blood’ cyasohokeye mu nzu ya Penguin Random House muri Werurwe 2018, Judi Rever ashinja FPR Inkotanyi yabohoye igihugu ikanahagarika Jenoside, ko yagize uruhare mu bikorwa byo kwica Abatutsi.

Anashingira kuri ‘raporo’ y’Urukiko Mpuzamahanga Mpanabyaha rwashyiriweho u Rwanda (TPIR) itagaragara muri icyo gitabo, akanavuga mu Rwanda habayeho Jenoside ebyiri zirimo iyahitanye Abahutu basaga 500 000.

Ni ingingo zakunze kwifashishwa n’abafite imigambi yo gupfobya no guhakana Jenoside yakorewe Abatutsi, nubwo ibyo bidahwema kunyomozwa n’abahanga mu mateka, abanditsi n’abanyamakuru batandukanye.

Ingengabihe ya Judi Rever muri iki cyumweru, igaragaza ko azatanga ibiganiro mu gace ka Flandres mu Bubiligi, aho kuri uyu wa Gatatu tariki 9 Ukwakira 2019, hari ikiganiro muri Kaminuza Gatolika ya Leuven ; kuri uyu wa Kane akazatanga ‘isomo’ muri Vrije Universiteit Brussel (VUB), hose hakagenda hagarukwa ku gitabo cye.

Kuri uyu wa Kabiri nibwo abanditsi, abahanga mu mateka, abarimu muri za kaminuza n’abanyamakuru bishyize hamwe, bamagana ibyo biganiro bigamije gukwirakwiza ibitekerezo bihakana bikanapfobya Jenoside, mu buryo butanageneye umwanya uwashaka kujora ibyo bitekerezo bya Judi Rever.

Ni ibaruwa igenewe abarimo Luc Sels uyobora Kaminuza Gatolika ya Leuven, Herman Vangoethem uyobora Kaminuza ya Antwerp, Sicco Wittermans uyobora Vrije Universiteit Brussel (VUB) na Tomas Legrand uyobora Artevelde hogeschool Gent.

Iterura igira iti “Twebwe abarimu ba kaminuza, abahanga mu by’ubumenyi, abashakashatsi, abanyamakuru n’abanyamateka, uyu munsi twanditse iyi baruwa ngo tugaragaze impungenge zikomeye dutewe n’urubuga kaminuza zanyu zahaye umuntu uzwi mu gupfobya Jenoside yakorewe Abatutsi mu 1994 mu Rwanda, kandi nta mwanya wateganyijwe wo kujora ibyo bitekerezo.”

“Judi Rever ni umwanditsi w’igitabo In Praise of Blood (Penguin Random House Canada 2018) kimenyekanisha ko habayeho Jenoside ebyiri, imvugo zimaze igihe zikwirakwizwa n’abakoze jenoside n’ababashyigikiye. Iyo mvugo nyamara nta shingiro ifite. Ni igikorwa kiri mu mugambi wo kugabanya ubukana no gutesha agaciro ibyabaye.”

Aba bahanga bavuga ko yitwikiriye icyasaga n’icukumbura rikomeye mu itangazamakuru, Rever ashingira ku buhamya budafite ishingiro bwatanzwe n’abantu badatangazwa n’inyandiko zitagaragarizwa umwimerere, avuga ko yahawe mu ibanga n’Urukiko Mpuzamahanga Mpanabyaha rwashyiriweho u Rwanda.

Bakomeje bati "Umwanditsi ntabwo yagaragaje ikimenyetso na kimwe ku birego bye byuje amarangamutima, akirengagiza ubuhamya n’inyandiko bihari byakusanyijwe mu myaka 25 ishize n’abashakashatsi n’abanyamakuru."

Bavuga ko babajwe cyane no kuba kaminuza zikomeye zo mu Burayi zahisemo guha urubuga umwanditsi w’igitabo gikwirakwiza ibitekerezo bikoreshwa mu guhakana Jenoside na nyuma y’imyaka 25, “hatabayeho ibiganiro iyi ngingo ikwiye kugirwaho”.

Ni ibikorwa kandi ngo izo kaminuza zidashobora gutekereza gukora kuri Jenoside yakorewe Abayahudi.

Bakomeje bati "Mu guha umwanya ibitekerezo bya Judi Rever, mwagaragaje gushyigikira abahakana n’abapfobya. Turabasaba kwisubira kuri iki cyemezo mwafashe. "

Ubwo gahunda y’ibyo biganiro yatangiraga kujya hanze mu cyumweru gishize, Umuryango Uharanira Inyungu z’abarokotse Jenoside yakorewe Abatutsi, Ibuka, wamaganye ababiteyiguye, usaba ko bihagarikwa.

Umunyamabanga Nshingwabikorwa wa IBUKA, Ahishakiye Naphtal, yabwiye IGIHE ati “Mu nyandiko z’uyu Judi ntabwo yemera Jenoside yakorewe Abatutsi, arayikana, arayipfobya, arayobya uburari, arakura ibyaha ku babikoze akabigereka ku babihagaritse, usanga mu by’ukuri usibye kuba nk’uyu munyamakuru ku giti cye afite amahitamo mabi, yarayobye akiyemeza guca hejuru y’ukuri, ikigayitse ni kaminuza nk’izi zibaha umwanya, zifata ibyo binyoma n’ibindi baba banditse zikabishyira mu bantu, zikabafasha kubikwirakwiza.”

"Ni ikintu rero kidakwiriye, iyi kaminuza mu by’ukuri ikwiye kwisubiraho igahagarika icyo kiganiro, ikagikuraho kuko mu by’ukuri tubifata nko gushyigikira abapfobya, abahakana Jenoside yakorewe Abatutsi.”

Mu bashyize umukono ku nyandiko yo kuri uyu wa Kabiri harimo Guillaume Ancel wari mu basirikare b’u Bufaransa muri Opération Turquoise ; umwanditsi Stéphane Audoin-Rouzeau; umwalimu muri Kaminuza ya Newfoundland muri Canada, Dr. Philippe Basabose na General Roméo Dallaire wayoboye UNAMIR.

Harimo kandi umunyamakuru Patrick de Saint-Exupéry; umwalimu muri Kaminuza muri Nigeria, Boubacar Boris Diop; umunyamakuru Jean-François Dupaquier; umunyamateka Dr. Philibert Gakwenzire; umushakashatsi Dr. Jean-Damascène Gasanabo; umushakashatsi muri kaminuza ya Ghent, Dr. Catherine Gilbert; Umunyamategeko Richard Gisagara; umwanditsi n’umunyamakuru Yann Gwet; Ibuka Mémoire & Justice n’abandi.

Abahanga banenze kaminuza zahaye rugari abashaka gupfobya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza