Abigaga mu mashami yafunzwe i Gitwe bemerewe kwiga muri Kaminuza zirimo na UR

Yanditswe na Ferdinand Maniraguha
Kuya 3 Gashyantare 2019 saa 11:44
Yasuwe :
0 0

Inama y’Igihugu y’Amashuri Makuru (HEC) yemereye abanyeshuri bo mu Ishami ry’Ubuganga (Medicine and Surgery) n’irya Laboratwari (Medical Laboratory Technology) mu Ishuri Rikuru ry’Uburezi rya Gitwe (ISPG), aheruka gufungwa, gukomereza amasomo yabo mu zindi kaminuza zirimo n’iy’u Rwanda (UR).

Babitangarijwe kuri uyu wa 3 Gashyantare 2019, mu nama yahuje aba banyeshuri, ubuyobozi bwa ISPG n’ubwa HEC, igamije gusubiza ibibazo byabo no kubashakira aho bakomereza amasomo.

Iyi nama yanzuye ko abanyeshuri bigaga mu Ishami ry’Ubuganga bakomereza muri Kaminuza y’u Rwanda (UR) kuko ariho hatangirwa aya amasomo gusa; abakurikirana ibijyanye na Laboratwari bemerewe gukomereza muri UR, INES Ruhengeri, Kibogora Polytechnic na Catholic University of Rwanda.

Umuyobozi wa HEC, Dr Muvunyi Emmanuel, yatangaje ko bamaze kuganira n’ayo mashuri kandi yemeye kwakira abanyeshuri ariko abibutsa ko hari ibyo agenderaho.

Yagize ati “Twamaze kumvikana n’izo Kaminuza zose ko umunyeshuri azajyayo bagahita bamwakira.ikibazo cyanyu barakizi kandi turabayobora aho mubariza.”

Icyakora bamwe mu banyeshuri bagaragaje impungenge zirimo kuba hari bimwe mu byo ayo mashuri bazoherezwamo asaba bashobora kuba batujuje.

Evode Niyibizi wiga mu mwaka wa Gatanu ishami ry’ubuvuzi no kubaga yagize ati “Turifuza ko mwadukorera ubuvugizi cyangwa se mukagira uruhare rwihariye rw’abana bigaga hano, hakagenderwa ku byo HEC yemeraga ubwo abanyeshuri bemerwaga muri iyi Kaminuza aho kugendera ku bisabwa n’izo Kaminuza.”

Ahimana Joseph na we wiga mu mwaka wa Gatanu muri buvuzi yavuze ko HEC ikwiriye kubafasha, ikamenyesha Kaminuza zigiye kubakira ibyo zikwiriye kwibandaho batahawe bakiri i Gitwe, aho kugendera ku mabwiriza izo Kaminuza zisanzwe zigenderaho.

Ati “Muratuzi neza mwadukurikiranye tugitangira, byaba byiza HEC idufashije mukatubera abahamya b’ibyo twize nibyo tutize kugira ngo batwemere.”

Dr Muvunyi Emmanuel yavuze ko batazabuza Kaminuza gukurikiza amabwiriza, icyakora ahazaboneka ikibazo cyihariye ngo bazakurikirana.

Ati “Ntabwo tugiye gukuraho inshingano za Kaminuza ugiye kujyamo. Kaminuza ifite ibyo isaba ngo uyinjiremo, nihaba hakenewe ubufasha baguha ngo mugere ku rwego runaka, tuzakorana n’iyo kaminuza kugira ngo ubwo bufasha babuguhe ariko nta bundi bufasha bwihariye buhari ngo ubwo porogaramu yari i Gitwe yafunzwe, ngo aba duhumirize […] ntabwo byagenda gutyo.”

Perezida w’urugaga rw’abaganga b’amenyo Dr Rudakemwa Emmanuel, yavuze ko buri porogaramu ijyanye n’ubuvuzi iba ifite amasomo runaka umunyeshuri agomba kwiga kugeza arangije.

Avuga ko uzajya muri Kaminuza bikagaragara ko hari ayo atize, azasabwa kubanza kuyiga, byumvikana ko hari abashobora gusubizwa mu myaka yo hasi.

Yaciye kandi amarenga ku banyeshuri baba barahawe imyanya i Gitwe batarize amasomo yemerwa ngo wijye ubuvuzi mu mashuri Makuru na Kaminuza, avuga ko abo bashobora kutazemerwa na Kaminuza nshya zigiye kubakira.

Umwaka ushize hari abanyeshuri bagombaga kurangiza mu mwaka wa nyuma mu ishami ry’ubuvuzi bujyanye na Laboratwari ariko baza gusabwa na HEC gusubiramo amasomo yo kwimenyereza (stage) kuko hari ibyo batari barakoze neza.

Abo banyeshuri n’ubu ntibaremerwa gusoza amasomo kuko byagaragayemo ko bamwe muri bo bagiye kwimenyereza bakigana imikono y’ababagenzuraga.

HEC yatangaje ko abo banyeshuri nabo bazoherezwa mu zindi Kaminuza, bagakurikiranwa kugeza bujuje ibisabwa ngo bahabwe impamyabumenyi.

Kaminuza ya Gitwe yasabwe gufasha abanyeshuri kubona ibyangombwa bikenewe ngo izindi Kaminuza zibakire bitarenze tariki 15 Gashyantare uyu mwaka.

Umuyobozi wungirijwe wa Kaminuza ya Gitwe, Prof Emmanuel Osuagwu, yavuze ko ibyo basabwa ngo abanyeshuri babone andi mashuri abakira bazabyubahiriza.

Ati “Turabizeza ko ibyo dusabwa ku ruhande rwacu bizakorwa neza ku buryo aba banyeshuri bakomeza neza muri Kaminuza nshya bazahabwa.”

Icyakora ku kibazo abanyehsuri bari babajije cy’uko hari amafaranga bamaze kwishyura basaba gusubiza, Dr Osuagwu, yavuze ko inama y’ubuyobozi ariyo izagifataho umwanzuro.

Ifungwa ry’amashami abiri muri ISPG rishingiye ku cyemezo cya Minisiteri y’Uburezi cyo ku wa 29 Mutarama 2019, cyakurikiye imurikwa rya raporo y’ubugenzuzi mu nama yahuje ubuyobozi bwa Mineduc n’inzego bireba.

ISPG itanga amasomo mu mashami atanu arimo iry’Uburezi, Ikoranabuhanga, Ubuforomo, ibijyanye na Laboratwari n’Ubuvuzi (bwihariye 85% by’amasomo ahatangirwa).

ISPG yari yarasabwe kutakira abanyeshuri b’umwaka wa mbere bo mu Ishami ry’Ubuvuzi mu gihe cy’imyaka ibiri, kuva muri Nzeri 2017 kugera muri Nzeri 2019.

Kaminuza ya Gitwe iherereye mu Ntara y'Amajyepfo mu Karere ka Ruhango
Inama yahuje ubuyobozi bwa HEC, Kaminuza ya Gitwe n'abanyeshuri bigaga mu mashami yafunzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza