Afurika mu myaka 60: Ibitekerezo bya Donald Kaberuka ku hazaza h’umugabane

Yanditswe na Philbert Girinema
Kuya 8 Ukuboza 2019 saa 01:20
Yasuwe :
0 0

Iterambere rya Afurika mu myaka iri imbere ni ingingo ikomeye kandi ihawe umwanya mu igenamigambi ry’ibihugu harebwa icyakorwa kugira ngo ahazaza hategurwe hakiri kare kandi harusheho kuba heza.

Ihuriro ryiswe “Kusi Ideas Festival” ryateguwe n’Ikigo cy’Abanyakenya kimaze imyaka 60 gikora itangazamakuru, hagamijwe kurebera hamwe ibyakorwa mu hazaza heza ha Afurika.

Ryahurije hamwe abayobozi batandukanye barimo Perezida Paul Kagame, Moussa Faki Mahamat uyobora Komisiyo ya AU n’abandi.

Ryitabiriwe kandi n’impuguke mu burezi, abacuruzi, abanyamakuru n’abandi baganirira hamwe ahazaza ha Afurika mu myaka 60.

Iyi Kusi Festival ibaye ku nshuro ya mbere yahuriranye n’isabukuru y’imyaka 60 NMG ifite ibinyamakuru birimo The Daily Nation, The East African, The Daily Monitor, n’ibindi imaze ivutse.

Donald Kaberuka wabaye Umuyobozi wa Banki Nyafurika Itsura Amajyambere, ni umwe mu batanze ikiganiro ubwo iri huriro ryatangizwaga. Yavuze ko kimwe mu bintu bizatuma Afurika igera ku iterambere ari uko abaturage bayo bagire amahirwe angana.

Yavuze ko umuntu wavutse mu gihe cy’ubukoloni, ubu afite nibura imyaka 60 aho byari ibihe bigoye ndetse rimwe na rimwe muri iki gihe abantu birengagiza ibyo Umugabane wa Afurika ugezeho urebeye mu byo wananyuzemo.

Ati “Ibihugu byinshi byamaze igihe kinini birwana bishaka ubwigenge, byari bigoye, ibihugu bikomeye byarwaniraga muri Afurika, ibyo byadindije byinshi mu byo twagomba gukora, ari nabyo turi gukosora muri iki gihe.”

Ku bijyanye n’uko Afurika ishobora kwihaza, atanga urugero rw’uburyo nk’umusaruro ushobora kwiyongera kuko buri kimwe gisabwa gihari.

Ati “Icyo tugomba guhangana nacyo, ni icyo turi guhangana nacyo uyu munsi. Uyu munsi abantu miliyoni 830 barimo miliyoni 330 b’Abanyafurika bajya mu buriri bashonje ariko ntabwo ari ukubera kubura ibiryo. Isi ifite ibiryo byikubye 1.5 by’ibyo ikeneye, ariko miliyoni 830 bajya kuryama bashonje kandi impamvu y’ibyo ni ubusumbane. Bamwe bafite byinshi abandi bafite bike.”

Yavuze ko ikigomba gushyirwamo imbaraga cyane ari ukurwanya ubusumbane kuko aricyo kibazo gihari aho kuba ibindi ndetse hagashyirwa imbaraga mu nzego z’uburezi n’ubuzima.

Kaberuka ati “Ni byo ko abantu batavutse kimwe ariko ubushobozi bw’igihugu bwo kuba abaturage bose bagira amahirwe angana ni ingenzi. Ikintu cya mbere gifasha mu gutanga amahirwe angana ku Isi, ni ukugira amahirwe ku burezi. Nibwo buryo bwonyine bwo kugabanya ubukene buterwa n’uruhererekane rw’imyaka.”

Yakomeje avuga ko kandi umusaruro utareberwa mu mubare w’abana bagiye mu ishuri ahubwo ari ukwita ku byo bakuyeyo, hibazwa ku byo bize.

Yatanze urugero ku bushakashatsi bwakorewe muri Mali harebwa ku musaruro w’ibyo abanyeshuri barangije ishuri bungutse ariko ko ibyo babonye bibabaje ndetse ko ibyo ari ikibazo gikomeye ku iterambere rya Afurika.

Kamau Gachigi ukuriye Ikigo cy’Ikoranabuhanga muri Kenya cyitwa Gearbox, yavuze ko hakwiye ko urubyiruko ruhabwa amahugurwa yaba mu mirimo runaka rukora no mu bijyanye n’imitekerereze ku buryo ijyana n’ibikenewe.

Yatanze urugero rw’uburyo urubyiruko muri Kenya rukoresha internet, yibaza niba ko byaba ikimenyetso cy’ibyo rwiyumvamo cyangwa se rurangamiye.

Ati “Iyo ndebye muri Kenya, imbuga 10 zisurwa cyane buri kwezi, Google niyo ihora ku isonga, hari Facebook hanyuma hari sosiyete y’imikino y’amahirwe. Nyuma yaho hari urubuga rwerekana amashusho y’urukozasoni; ibyo bikwereka aho nibura imitekerereze y’urubyiruko iherereye kandi ntabwo ari ibintu mu by’ukuri bitanga icyizere.”

Yavuze ko hakwiye amasomo afasha abantu kumva uburyo baba abaturage beza b’igihugu, indangagaciro ziboneye, imyumvire igahindurwa.

Carlos Lopez wari mu Kanama k’Impuguke zafashije Perezida Kagame mu mavugururwa ya Komisiyo ya AU, yavuze ko Umugabane wa Afurika wahindutse ariko imyumvire nayo ikwiye guhinduka.

Yatanze urugero rw’uburyo mu myaka icumi ishize, wakiraga inkunga ingana na miliyari zigera kuri 50 z’amadolari, ariko n’ubu akaba ari ayo ugihabwa [miliyari z’amadolari 53] mu gihe ibintu byahindutse muri iyo myaka yose.

Mu myaka icumi, miliyari 163 z’amadolari niyo yari imisoro ikusanywa muri Afurika aho ubu yikubye ikagera kuri miliyari 600 z’amadolari.

Uko kuba Afurika yarateye imbere ariko ntigukuraho kuba abakuru b’ibihugu bamwe badahwema kuganira ku gukomeza guhabwa inkunga aho kureba uko ibihugu byakwibeshaho, ari naho yahereye ashimangira ko imyumvire ikwiye guhinduka.

Ati “ Mu mibare iyo ariyo yose wareba mu bijyanye n’ubukungu, amafaranga ava mu nkunga ni make cyane ariko ni ukuri ko ibyo abakuru bacu bamwe bakunda kuganira ari inkunga mu nama za mu gitondo, mu za saa sita no mu za nimugoroba.”

Kaberuka yavuze ko Afurika ikwiye kwigira ariko ashimangira uburyo urwego rw’ubuzima ari ingenzi ko rukwiye kurebwaho byihariye ku buryo haboneka amafaranga yo kwita ku mibereho y’abaturage.

Yavuze ko kimwe mu bibazo Afurika ifite atari amadeni kuko ari make cyane ahubwo ko ari intege nke mu kuzamura umusaruro w’imbere mu bihugu.

Afurika ubu ituwe n’abaturage barenga miliyari 1.2 bavuye kuri miliyoni 477 bariho mu 1980 ndetse bazakomeza kwiyongera mu myaka iri imbere.

Mu 2050, ubwiyongere bw’abaturage ba Afurika ku mwaka buzaba burenze miliyoni 42 ndetse abaturage bose bazaba ari miliyari 2.4. Ibi bigaragaza nibura ubwiyongere bw’abaturage ba Afurika bangana na miliyoni 3.5 mu kwezi cyangwa se ubwiyongere bw’abantu 80 mu munota umwe.

Mu 2050 nibura biteganyijwe ko abakozi bane mu 10 ku Isi bazajya baba baturuka muri Afurika. Uyu munsi abarenga 50% by’abanya-Afurika ni urubyiruko rufite imyaka 20 mu gihe muri rusange ku Isi bari mu myaka 30. Ibi bigaragaza ko ahazaza hihariwe n’Abanya-Afurika.

Donald Kaberuka yavuze ko guha abaturage amahirwe angana bizafasha Afurika kugera ku iterambere
Carlos Lopez wari mu Kanama k’Impuguke zafashije Perezida Kagame mu mavugururwa ya Komisiyo ya AU yagaragaje ko Afurika ikeneye guhindura imyumvire
Kaberuka yavuze ko ubusumbane bukwiye kwirindwa kugira ngo iterambere rigezweho
Kamau Gachigi ukuriye Ikigo cy’Ikoranabuhanga muri Kenya cyitwa Gearbox yasabiye urubyiruko guhabwa amahugurwa mu mirimo rukora n'ibijyanye n’imitekerereze ikwiye
Kusi Ideas Festival iri kubera mu Intare Arena i Rusororo ahateraniye abantu baturutse mu bice bitandukanye bya Afurika
Abitabiriye Ihuriro ryiswe “Kusi Ideas Festival” basomaga ibinyamakuru birimo "The East African" cya NMG
Umuyobozi w'Ikigo cy'Igihugu cy'Iterambere (RDB), Clare Akamanzi, ari mu bitabiriye iri huriro

Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza