Amashuri yigenga yasabwe kwita ku mibereho y’abarimu kugira ngo akomeze kubaho

Yanditswe na Ferdinand Maniraguha
Kuya 12 Ukwakira 2019 saa 11:11
Yasuwe :
0 0

Sendika y’Abarimu n’abandi bakozi bakora mu burezi mu bigo byigenga (SYNEDUC) yasabye ibigo byigenga kwita ku mibereho y’abarimu n’abandi bakozi babikoramo niba bishaka kunguka no gukora uwo mwuga igihe kirekire.

Ibyo byatangajwe kuri uyu wa Gatanu, ubwo SYNEDUC yahembaga abana biga mu Rwunge rw’Amashuri APACOPE ruherereye mu Karere ka Nyarugenge batsinze neza mu marushanwa y’imivugo igaragaza agaciro ka mwarimu, mu cyumweru cyahariwe umwarimu.

Umunyamabanga Mukuru wa SYNEDUC, Nkotanyi Abdon, yavuze ko ayo marushanwa bayateguye bagamije gukundisha abana umwuga w’ubwarimu no kubatoza kumenya agaciro ko kuba umurezi.

Yavuze ko abana nibabitozwa, bizatuma mu minsi iri imbere u Rwanda rutabura abarimu bakiri bato.

Ati “Muri iki gihe usanga abantu batitabira umwuga w’uburezi ariko tugomba guteza imbere abarimu bato, ni gute bashobora kubujyamo? Ni ukubatoza gukunda umwuga w’uburezi.”

Nkotanyi yavuze ko mu bigo byigenga byinshi harimo ibibazo bitandukanye bikwiriye gukemuka kugira ngo abarimu babyo babeho neza ndetse n’abo bigisha bazamuke bakunze uwo mwuga.

Yavuze ko hari nk’aho abarimu badahabwa amasezerano y’igihe kirekire, aho badahabwa ubwishingizi, abadahembwa mu gihe cy’ibiruhuko n’ibindi.

Ati “Nk’ubu mu bigo byigenga dufite ikibazo kinini cyane no kuba abarimu usanga bafite amasezerano y’umurimo y’igihe gito ibyo bigatuma badashobora kuba bajya nko muri SACCO ngo bigurize inguzanyo z’igihe kirekire. Umwarimu igihe adahembwa neza, adashobora kubona ikimutunga gihagije kandi cyiza, abana be batajya mu ishuri ibyo byose iyo bibuze bica intege n’abana kujya muri uwo mwuga w’uburezi.”

Ibyo Nkotanyi avuga ko ari ikibazo kuri ibyo bigo kuko bishobora kuzagera igihe bikabura abarimu kuko badafatwa neza cyangwa bigatuma abana bakura banga uwo mwuga, n’igihugu kikabihomberamo.

Ati “ Nk’ubu ibigo byinshi ntabwo bigira ubwishingizi bw’ubuvuzi ku barimu, ibyo byose iyo bikozwe abarimu baraza kandi n’abana bajya aho abana batuje.”

Nkundimana Consolée, umaze imyaka 14 yigisha muri Apacope yavuze ko abana bahitamo kuba abarimu kuko nabo bafite abarimu bafatiyeho urugero kandi babayeho neza.

Ku kibazo cyo kudahembwa yavuze ko mu kigo yigishaho nta gihari ariko avuga ko aho biri bibabaje kuko bica intege umwarimu.

Ati “Bica intege umwarimu kuko abeshwaho n’aka kazi, nta kindi kintu akora , rero iyo ukwezi kumwe gushize , ukw akabiri kugashira umwarimu adahembwa acika intege, ntabwo agaruka afite intege, babihe agaciro.”

Nsengimana Irakoze Regis wiga mu mwaka wa Gatandatu w’amashuri abanza, ni umwe mu bana bahembwe.

Yavuze ko mwarimu akwiriye kwitabwaho kuko ari we ufasha abo yigisha kugera ku ndoto zabo.

Imibare ya Minisiteri y’Uburezi yo mu 2018 igaragaza ko mu gihugu hari amashuri y’incuke yigenga 1,123, amashuri abanza yigenga ni 392 naho ayisumbuye ni 314.

Nkotanyi yavuze ko mu bigo byigenga byinshi harimo ibibazo bitandukanye bikwiriye gukemuka kugira ngo abarimu babyo babeho neza ndetse n’abo bigisha bazamuke bakunze uwo mwuga
Bamwe mu bana bitabiriye amarushanwa avuga ku kamaro ka mwarimu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza