00:00:00 IGIHE NETWORK KN KINYARWANDA EN ENGLISH FR FRANCAIS

Amateka adasanzwe ya Depite Hervé Berville ukomoka mu rwa Gasabo akaba inkoramutima ya Perezida Macron

Yanditswe na Iradukunda Serge
Kuya 7 Ukwakira 2021 saa 05:13
Yasuwe :

Abanyarwanda yaba abakuriye imbere mu gihugu cyangwa abavukiye mu mahanga, basigaye barubatse izina mu bintu bitandukanye hirya no hino ku Isi. Bamwe ni abayobozi mu nzego z’ibihugu bindi bitari u Rwanda, mu Burayi, Amerika, Afurika n’ahandi. Umwe muri abo, ni Hervé Berville.

Uyu musore w’imyaka 31 yubatse izina muri politike y’u Bufaransa kugeza ubwo ynjira muri ‘Palais de L’Élysée’ bitamusaba kuvunyisha nka rubanda rugufi.

Berville ni umwe mu bagize Inteko Ishinga Amategeko y’u Bufaransa n’umuyoboke ukomeye w’ishyaka ‘La République En Marche!’ ribarizwamo Perezida w’u Bufaransa, Emmanuel Macron.

Ni umuhanga mu bijyanye n’ubukungu, yaminurije muri Kaminuza yigisha ubumenyi muri Politiki, (iherereye mu Mujyi wa Paris).

Yize kandi mu Ishuri ry’Ubukungu ry’i Londres (London School of Economics) no muri Kaminuza ya Stanford yo muri Leta Zunze Ubumwe za Amerika.

Kuva mu 2014, yari umukozi w’Ishami ry’u Bufaransa rishinzwe iterambere muri Mozambique. Nyuma y’imyaka ibiri akora aka kazi, mu 2016 yaje kuvumbura ko yifitemo impano yo kuba umunyapolitiki, maze azinga utwangushye afata rutemikirere imusubiza mu Bufaransa kugira ngo yinjire muri politiki mu buryo bweruye.

Nubwo nta zina na rimwe ry’Ikinyarwanda afite, Hervé Berville ni Umunyarwanda ukomoka mu Mujyi wa Kigali.

Mu 1994 ababyeyi be bishwe muri Jenoside yakorewe Abatutsi, asigara ari impfubyi y’imyaka ine.

Icyo gihe nibwo yatwawe n’umuryango w’abagiraneza wo mu Bufaransa.

Aba bagiraneza bareze Berville bakomoka muri Komine ya Pluduno iherereye mu Majyaruguru ashyira u Burengerazuba bw’u Bufaransa, ari na ho yakuriye.

Mu 2017 ni bwo Berville usanzwe ari inzobere muri politiki n’ubukungu yatsindiye kujya mu Nteko Ishinga Amategeko y’u Bufaransa ku majwi 64%, umwanya akirimo kugeza magingo aya. Icyo gihe atorwa yari afite imyaka 27 gusa. Muri iyi nteko, ni umwe mu bagize komisiyo zitandukanye zirimo n’ishinzwe ububanyi n’amahanga.

Kubera ubuhanga bwe imirimo ye ntigarukira mu nteko gusa ahubwo afite n’izindi nshingano, aho ari umwe mu bagize Inama y’Ubutegetsi y’Ikigo cy’u Bufaransa gishinzwe iterambere (AFD). Ibi byose yabashije kubigeraho ataruzuza imyaka 30.

Ni inkoramutima ya Perezida Macron

Mu ruzinduko rwasize umubano hagati y’u Rwanda n’u Bufaransa uhinduye isura Perezida Emmanuel Macron aherutse kugirira mu Rwanda, Hervé Berville ni umwe mu bari bagize itsinda ryari rimuherekeje. Ibintu byerekana icyizere uyu musore agirirwa n’Umukuru w’Igihugu cye.

Umubano wa Berville na Macron usa n’uwatangiye mbere y’uko uyu mugabo agera ku butegetsi mu 2017.

Amakuru dukesha ikinyamakuru ‘Irish Times’ avuga ko Berville yatangiye gushishikarira kumenya byinshi kuri Macron mu 2014, ubwo yabonaga inkuru yanditse mu kinyamakuru cya kaminuza yigagamo.

Berville yavuze ko iyi nkuru ya Macron yasomye yatumye amubona nk’umugabo w’ibikorwa kandi ufite ibitekerezo bizima.

Nyuma yo kunyurwa n’imitekerereze y’uyu mugabo, mu mwaka wakurikiyeho Berville yahise afata icyemezo cyo kwinjira mu itsinda ry’urubyiruko ryari riyobowe na Macron iki gihe wari ukishakisha muri politiki.

Muri Mata 2016, ubwo Macron yashingaga ishyaka rya En Marche, Berville yari ari i Nairobi muri Kenya aho yahuguraga ba rwiyemezamirimo bato nk’umukozi wa Stanford University. Yagize uruhare rukomeye mu kumenyekanisha iri shyaka muri Kenya.

Mu gihe gito, Berville yahise yegura kuri iyi mirimo asubira mu Bufaransa gushyigikira Macron wari watangiye urugendo rwo kwiyamamariza kuyobora u Bufaransa.

Berville yararurwanye karahava azenguraka hirya no hino mu Bufaransa agaragaza uko Macron ari umucunguzi w’iki gihugu, binyuze muri politiki ye nziza n’amaraso ye ya gisore.

Imbaraga n’umuhate bye ntibyapfuye ubusa kuko muri Mata 2017 Macron yatangajwe nka Perezida mushya w’u Bufaransa, ahigika Marine Le Pen.

Na nyuma yo gutorwa, Berville ari mu bantu bakomeje kuba hafi ya Macron cyane cyane mu bijyanye na gahunda z’urubyiruko mu ishyaka rye ndetse no gukora amavugurura mu by’ubukungu.

Afite umuryango mu Rwanda

Nyuma yo kubona ko ari umwe bantu bashobora kuzahura umubano w’u Rwanda n’u Bufaransa wari umaze igihe urimo agatotsi, mu 2019 Perezida Emmanuel Macron yamwohereje mu Rwanda ngo amuhagararire mu bikorwa byo Kwibuka abazize Jenoside yakorewe Abatutsi mu 1994 byabaga ku nshuro ya 25.

Mu kiganiro Berville yagiranye n’itangazamakuru yavuze ko koherezwa guhagararira igihugu cye mu gihugu afitemo amateka ari ibintu bikomeye.

Berville wemeza ko bwari ubwa mbere Perezida w’u Bufaransa yohereza umudepite nk’intumwa ye yihariye, yavuze ko Macron yabikoze mu kwerekana ko u Bufarasana bwifatanyije n’u Rwanda.

Ati “Perezida Emmanuel Macron yabikoze kuko yashakaga nko kohereza ikimenyetso kivuga ko u Bufaransa bwifatanyije n’abaturage b’u Rwanda, mu kunamira abantu barenga miliyoni bishwe muri Jenoside yakorewe Abatutsi. Byari iby’agaciro gakomeye kuri we kuba u Bufaransa bwatanga umusanzu wabwo mu kwibuka kandi bugaharanira ko bitazongera.”

“Bivuze ikintu kiremereye, buri gihe biba ari iby’agaciro guhagararira igihugu cyawe mu mahanga ariko ushobora gutekereza amarangamutima y’umwihariko ajyanye no guhagararira igihugu cyawe mu gihugu ugifitemo umuryango.”

Abajijwe n’umunyamakuru niba hari umuryango agifite mu Rwanda, Berville yavuze ko uhari kandi aganira na wo uko bishoboka.

Ati “Yego ndacyafite hano mushiki wanjye, nyogokuru, ba mama wacu na ba masenge, bose baba hano (mu Rwanda) turandikirana, nkabahamagara. Navuga ko nabyo ari amahirwe kuba ngifite bamwe mu bagize umuryango wanjye, kubera ko ejo hashize ubwo twari kuri Stade Amahoro basomye amazina y’imiryango yazimye.”

Yavuze ko nta rwibutso runini afite mu bihe yamaze mu Rwanda kuko yari akiri muto.

Ati “Ntabwo nibuka ibintu byinshi kubera ko iyo ufite imyaka ine, ntabwo uba wibuka ibintu byinshi, rimwe na rimwe hari n’igihe utabasha kumenya ko ari ibyo wibuka cyangwa niba ari ibitekerezo wamaze kwiyubakamo kubera ko wasomye byinshi byerekeye amateka y’Igihugu, warebye filime. Buri gihe biba bigoye kuvuga ko ari ibyo wibuka.”

“Ndacyibuka bike cyane bijyanye n’igihe nagendeye, nibuka ubwo najyaga ku kibuga cy’indege ndi mu ikamyo ariko bizamo urujijo.”

Nubwo Berville, amaze kumenyekana muri politiki y’u Bufaransa urugendo rwamugejeje aha ntirwari rworoshye cyane ko yagiye ahura n’inzitizi zitandukanye zirimo n’ivanguraruhu.

Muri Mutarama mu 2019 ari mu badepite batatu b’abirabura bandikiwe ibaruwa n’abantu bataramenyekana yuzuyemo ivanguraruhu baterwa ubwoba ko bazicwa. Iyi baruwa yanandikiwe depite Jean-François M’Baye na Lætitia Avia.

Iyi baruwa aba badepite bandikiwe ivuga ko bitumvikana uburyo umunyafurika ajya kwivanga mu bibazo by’u Bufaransa, ko bagiyeyo bashaka kubwungukiraho. Ivuga ko bari bakwiye kuguma muri Afurika bakayiteza imbere.

Mu magambo akubiye muri iyi baruwa harimo n’ibitutsi by’uko aba badepite ari ibyana by’ingurube z’umukara, ko Hervé Berville yarokotse imihoro mu Rwanda n’andi magambo akarishye y’irondaruhu.

Iki gihe Hervé Berville avuga kuri iyi baruwa yagize ati “Ni ibikorwa bibi bidasanzwe, ni irondaruhu risesuye tugomba kurwanya ryibasira igice gito cy’abantu ndetse rishobora no kuba ribi kurushaho. Ubona ko muri iki gihe hari abantu batumva ko uwavukiye ahandi ndetse ufite n’irindi bara ry’uruhu yahagararira igihugu. Tugomba guhangana nabyo tukabirwanya.”

Berville yavuze ko bidakwiye ko umuntu acibwa urubanza harebewe ku ibara ry’uruhu rwe, idini cyangwa imiterere ye ijyanye n’igitsina. Ati “Ako si ko gaciro k’u Bufaransa.”

Hamwe n’itsinda rigari ry’abadepite ba En Marche!, Hervé Berville na bagenzi be bahisemo kwibumbira hamwe ngo bamagane iri rondaruhu.

Berville avuga ko ibitekerezo bye birangajwe imbere no guca ubusumbane yaba mu Bufaransa no ku Isi muri rusange.

Hervé Berville ukomoka mu Rwanda ni Umudepite mu Nteko Ishinga Amategeko y'u Bufaransa
Hervé Berville ni inkoramutima ya Perezida Emmanuel Macron, aha yari yitabiriye Inama y'abahagarariye u Bufaransa mu bihugu bitandukanye
Depite Hervé Berville akunze kuba hafi ya Perezida Macron bahuriye mu ishyaka
Hervé Berville yakuruwe na Politike ya Emmanuel Macron iha amahirwe urubyiruko
Hervé Berville ni umwe mu babaye hafi ya Perezida Macron ubwo yari mu bikorwa byo kwiyamamaza
Hervé Berville ni we wahagarariye u Bufaransa mu 2019 ubwo hibukwaga abazize Jenoside yakorewe Abatutsi
Ubwo yari mu Rwanda mu 2019, Depite Hervé Berville yafatanye ifoto y'urwibutso na Perezida Kagame na Louise Mushikiwabo
Ubwo u Rwanda rwibukaga Jenoside yakorewe Abatutsi ku nshuro ya 25, Berville ni umwe mu bitabiriye urugendo ruzwi nka 'Walk to Remember'
Depite Hervé Berville aganira na Perezida w'Inteko Ishinga Amategeko y'u Rwanda umutwe w'Abadepite, Mukabalisa Donatille
Depite Hervé Berville yunamiye inzirakarengane zishwe muri Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .