Amb. Kalisa yatanze kopi z’impapuro zimwemerera guhagararira u Rwanda mu Misiri

Yanditswe na IGIHE
Kuya 28 Ukwakira 2019 saa 07:47
Yasuwe :
0 0

Ambasaderi Kalisa Alfred yatanze kopi z’impapuro zimwemerera guhagararira u Rwanda muri Repubulika y’Abarabu ya Misiri.

Ambasaderi Kalisa ni umwe mu bahagarariye u Rwanda mu bihugu 15 by’amahanga bashyizweho na Perezida Paul Kagame ku wa 15 Nyakanga 2019. Usibye Misiri, azaba anareberera inyungu z’u Rwanda muri Algeria, Libya na Tunisia.

Kopi z’impapuro zemerera Kalisa guhagararira u Rwanda mu Misiri yazishyikirije Minisitiri wungirije ushinzwe Ibikorwa bya Afurika muri Minisiteri y’Ububanyi n’Amahanga, Ambasaderi Hamdi sanad Roza.

Yamugejejeho intashyo z’Umukuru w’Igihugu, Paul Kagame anamwizeza ubufatanye mu gukomeza kwagura umubano w’ibihugu byombi.

Ambasaderi Kalisa na mugenzi we Hamdi sanad baganiriye ku hakenewe kongerwa imbaraga mu kunoza umubano uhuriweho ushingiye ku bwubahane ndetse no guteza imbere ubucuruzi.

Yagize ati ‘‘Twaganiriye ku buryo bwo gushyigikira urwego rw’abikorera, uruhare rwa Misiri mu gufasha abashoramari ku mpande zombi kwiteza imbere.’’

Mu byaganiriweho harimo guteza imbere ubucuruzi bw’ikawa n’icyayi by’u Rwanda biri mu bishimirwa n’abanyamahanga benshi bitewe n’icyanga cyabyo ku buryo byabona isoko mu Misiri bikajya byoherezwayo ku bwinshi.

Ambasaderi Kalisa yavuze ko icy’ingenzi agiye kwibandaho ari ‘‘ukunoza umubano n’imikoranire hagati y’u Rwanda na Misiri’’ cyane mu rwego rw’ishoramari.

Yatanze urugero ku cyanya cyahariwe inganda i Masoro ko ari amahirwe u Rwanda rufite ashobora kubyazwa umusaruro n’abanya-Misiri bakize ku nganda z’ibintu bitandukanye.

Ambasaderi Kalisa yoherejwe mu Misiri, asimbura Sheikh Habimana Saleh, wimuriwe muri Ambasade nshya y’u Rwanda mu Bwami bwa Maroc.

U Rwanda na Misiri bifatanya mu nzego eshatu zirimo ubucuruzi, uburezi n’ubuzima ari nazo ibihugu byombi bishyiramo imbaraga ngo binoze ubufatanye bubyarira inyungu ababituye.

Umubano w’ibihugu byombi watangiye mu myaka yo hambere ubwo u Rwanda rwafunguraga Ambasade yarwo i Cairo n’iki gihugu cyo mu Majyaruguru y’Uburasirazuba bwa Afurika kigafungura iyacyo mu Rwanda nyuma gato yaho ruboneye ubwigenge.

Ambasade y’u Rwanda mu Misiri yaje gufungwa gusa nyuma iza kongera gufungurwa mu 2015, Ambasaderi Sheikh Habimana Saleh wahoze ari Mufti w’u Rwanda aba ariwe wa mbere uyiyobora.

Mu rwego rw’uburezi hari abanyeshuri b’abanyarwanda biga mu Misiri aho bajyayo mu rwego rw’Idini ya Islam, mu rwego rwa leta n’abasaba bakiyishyurira amashuri yabo.

Kugeza ubu, abanyeshuri 81 b’abanyarwanda nibo biga mu Misiri aho 49 biga muri Kaminuza ya El Azhar ku bufatanye bwayo n’Umuryango w’Abayisilamu mu Rwanda, 15 biga muri Kaminuza ya Alexandria, 11 biga muri Kaminuza ya Cairo barimo abaganga batatu bari kwiga icyiciro cya gatatu cya kaminuza mu kuvura kanseri, batatu biga muri Kaminuza Sedar Senghor mu gihe muri American University, British University na Helwan University hose gihamo umunyeshuri umwe. Muri bose, 24 ni abari kwiga mu cyiciro cya gatatu cya kaminuza.

Ubaze aba banyeshuri n’abandi Banyarwanda batuye mu Misiri, bose hamwe bagera kuri 110.

Amb. Kalisa Alfred ashyikiriza Minisitiri wungirije ushinzwe Ibikorwa bya Afurika muri Minisiteri y’Ububanyi n’Amahanga, Ambasaderi Hamdi sanad Roza, kopi z’impapuro zimwemerera guhagararira u Rwanda mu Misiri
Amb. Alfred Kalisa ari kumwe na Minisitiri wungirije ushinzwe Ibikorwa bya Afurika muri Minisiteri y’Ububanyi n’Amahanga, Ambasaderi Hamdi sanad Roza , hamwe n'Umujyanama muri Ambasade y'u Rwanda mu Misiri, Eric Rutoni Kayoge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza