00:00:00 IGIHE NETWORK KN KINYARWANDA EN ENGLISH FR FRANCAIS

Amb. Zaina Nyiramatama yatanze impapuro zimwemerera guhagararira u Rwanda muri Maroc

Yanditswe na Karirima A. Ngarambe
Kuya 19 January 2022 saa 08:22
Yasuwe :

Ambasaderi Nyiramatama Zaina yashyikirije Umwami wa Maroc, Mohammed VI, impapuro zimuhesha uburenganzira bwo guhagararira inyungu z’u Rwanda mu gihugu cye.

Uyu muhango wabereye mu Ngoro y’i Bwami iri mu Mujyi wa Rabat muri Maroc, ku wa 17 Mutarama 2022.

Uyu muhango wabaye hubahirizwa ingamba zo kwirinda icyorezo cya COVID-19, aho abayobozi bakuru n’abari babaherekeje bari bambaye udupfukamunwa ndetse banahanye intera.

Ambasaderi Nyiramatama yashyikirije Umwami Mohammed VI, impapuro zimuhesha uburenganzira bwo guhagararirayo inyungu z’u Rwanda nyuma y’uko ku wa 14 Mutarama 2021, yahaye Minisitiri w’Ububanyi n’Amahanga n’Ubutwererane wa Maroc, Nasser Bourita kopi zimusabira ubwo burenganzira.

Inama y’Abaminisitiri yo ku wa 14 Ukuboza 2020, ni yo yatangarijwemo Nyiramatama Zaina nka Ambasaderi w’u Rwanda mu Bwami bwa Maroc, asimbuye Sheikh Habimana Saleh.

Amb Nyiramatama yari amaze igihe kinini ahagarariye Umuryango wa Afurika Yunze Ubumwe muri Tchad, umwanya yagiyeho avuye mu buyobozi bwa Komisiyo y’Igihugu y’Abana.

Ambasade y’u Rwanda muri Maroc yafunguwe ku wa 15 Mutarama 2020 mu gihe umubano w’ibihugu byombi wari mu cyerekezo kizima.

Mu myaka yahise, abakuru b’ibihugu bagiye bagenderanira hagamijwe kwagura umubano ndetse n’ubuhahirane bufitiye inyungu abaturage.

Muri Kamena 2016, Perezida Paul Kagame yasuye Maroc mu ruzinduko rw’iminsi ibiri; hari mbere y’uko Umwami wa Maroc, Mohammed VI agenderera u Rwanda mu Ukwakira uwo mwaka.

Ubwo Umwami Mohammed VI yari i Kigali hasinywe amasezerano atandukanye aganisha ku kwimakaza imibereho myiza y’abaturage hibandwa ku mikoranire mu bijyanye n’ubuzima, ubuhinzi, ubucuruzi ndetse n’ishoramari.

Mu Ukwakira 2020, Minisitiri w’Ububanyi n’Amahanga, Dr Vincent Biruta na we yagiriye uruzinduko muri Maroc mu gukomeza gushimangira umubano w’ibihugu byombi.

Nubwo icyorezo cya Covid-19 cyadindije ibintu byinshi, imwe mu mishinga ibihugu byombi bihuriyeho iratanga icyizere cyo kuba yarangiye mu gihe cya vuba.

Aha twavuga nk’uruganda rukora imiti ruherereye mu mu gace kahariwe inganda i Masoro muri Gasabo (Special Economic Zone) rwamaze kurangira ndetse n’urw’ifumbire ruri kubakwa mu Karere ka Bugesera.

Ambasaderi w’u Rwanda mu bwami bwa Maroc niwe uhagarariye kandi u Rwanda muri Repubulika ya Tunisia, Guinea hamwe na Mauritanie.

U Rwanda na Maroc bifitanye umubano mwiza ushingiye ku burezi, aho imibare yo mu 2020 yerekana ko hari Abanyarwanda basaga 110 biga muri icyo gihugu, mu mashami arimo Ubuvuzi, Engineering n’ibindi.

Ambasaderi Nyiramatama Zaina yashyikirije Umwami wa Maroc, Mohammed VI, impapuro zimuhesha uburenganzira bwo guhagararirayo u Rwanda
Uyu muhango wabereye mu Ngoro y’i Bwami mu Mujyi wa Rabat, wabaye hubahirizwa amabwiriza yo kwirinda COVID-19
Ambasaderi Zaina Nyiramatama yakiriwe i bwami mu cyubahiro gikwiye uhagarariye u Rwanda muri Maroc

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .