Ambasaderi Mukangira yashyikirije Perezida w’u Buhinde impapuro zimwemerera guhagararira u Rwanda

Yanditswe na Habimana James
Kuya 21 Gicurasi 2020 saa 04:15
Yasuwe :
0 0

Mukangira Jacqueline uherutse kugirwa ambasaderi w’u Rwanda mu Buhinde, yashyikirije perezida w’iki gihugu Ram Nath Kovind, impapuro zimwemerera guhagararirayo u Rwanda nka ambasaderi muri iki gihugu.

Ni gahunda yateguwe hakoreshejwe uburyo bw’ikoranabuhanga, kubera icyorezo cya Coronavirus cyibasiye iki gihugu n’Isi muri rusange, bikorerwa kuri minisiteri ishinzwe ububanyi n’amahanga yacyo, ari naho habereye ibirori bigufi.

Perezida Ram Nath Kovind yashimiye umubano usanzwe uriho hagati y’ibihugu byombi, avuga ko iki gihugu cyiteguye gukomeza kuwunoza no gufatanya n’u Rwanda.

Mukangira yagizwe ambasaderi w’u Rwanda mu Buhinde, mu nama y’Abaminisitiri yateranye ku wa Kane tariki ya 28 Ugushyingo 2019 iyobowe na Perezida wa Repubulika, Paul Kagame.

Mukangira Jacqueline yigeze kuba Ambasaderi w’u Rwanda muri Suède mu 2007; ndetse yakoze muri Minisiteri y’Ububanyi n’Amahanga nk’Umuyobozi Mukuru kimwe no mu Nteko Ishinga Amategeko nk’Umudepite no muri Sena nk’Umuyobozi Mukuru ushinzwe ubushakashatsi, umwanya yagiyeho mu 2012.

U Buhinde bufitanye umubano ukomeye n’u Rwanda mu ngeri zitandukanye by’umwihariko mu bukungu, aho ishoramari ry’Abahinde rikomeje kwigaragaza mu Rwanda.

Mu 2017, Raporo y’Ikigo cy’Igihugu cy’Iterambere (RDB), yerekanye ko u Buhinde bwari igihugu cya gatatu nyuma ya Portugal n’u Bwongereza, cyaturutsemo ishoramari ry’agaciro kanini riza mu Rwanda.

Mbere ya 2017, habarurwaga ko hagati ya 2011-2016 imishinga 66 y’Abahinde ifite agaciro ka miliyoni 317$. Ikomeye irimo Airtel, Zinc Hotel na Kaminuza ya Mahatma Gandhi.

U Rwanda rufite Abahinde bagera ku 3,000, bagaragara mu bikorwa bitandukanye by’ubucuruzi burimo ibikoresho by’ikoranabuhanga, ibinyabiziga, inganda n’ibindi.

Kuri ubu kandi Oscar Kerketta, ni we wa mbere uhagarariye u Buhinde mu Rwanda ku rwego rwa Ambasaderi, afite icyicaro i Kigali, kuva muri Nzeri 2018.

Ibiganiro byabaye hakoreshejwe ikoranabuhanga kubera icyorezo cya Coronavirus
Mukangira Jacqueline uherutse kugirwa ambasaderi w’u Rwanda mu Buhinde, yashyikirije Perezida w’iki gihugu Ram Nath Kovind, impapuro zimwemerera guhagararirayo u Rwanda nka ambasaderi . Ni gahunda yateguwe hakoreshejwe uburyo bw’ikoranabuhanga, kubera icyorezo cya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .