00:00:00 IGIHE NETWORK KN KINYARWANDA EN ENGLISH FR FRANCAIS

Bakuyeho agahu: Icyateye Gatanazi na "Mr Bean" gufatana urunana n’abarwanya Leta mu cyiswe "imyigaragambyo"

Yanditswe na Musangwa Arthur
Kuya 3 Werurwe 2021 saa 04:52
Yasuwe :
0 0

Abenshi mu bakoze cyangwa basobanukiwe neza umwuga w’itangazamakuru, bazi neza ko gukundwa cyangwa kumenyekana atari ibintu byizana. Itangazamakuru ni umwe mu myuga itazwiho kugira ibimanuka, kuko n’iyo bagutereka ku ndangururamajwi cyangwa ugahabwa ikaramu uyu munsi bakwibeshyeho, isaha imwe rukumbi yaba ihagije ngo ubumenyi bwawe bukwimishe umugati cyangwa buwuguheshe.

Uwakurikiye neza itangazamakuru ry’u Rwanda by’umwihariko irya politiki muri iyi myaka ishize azi cyangwa yumvise izina Etienne Gatanazi. Uyu mugabo winjiye muri uyu mwuga mu 2010 nyuma yo kwiga uburezi mu ryahoze ari Ishuri Rikuru ry’Uburezi (KIE), akanigisha indimi mu ishuri ryari i Remera, ni umwe mu bigaragaje mu gihe gito. Ibyo bigashimangirwa n’ibitangazamakuru yakoreye uhereye mu by’imbere mu gihugu birimo RBA ikiri Orinfor, KFM, n’ibyo ku rwego mpuzamahanga nka Deutsche Welle y’Abadage na CGTN y’Abashinwa.

Gatanazi aherutse kubwira umurongo [shene] wa YouTube witwa ‘AMAVUTA TV’ ko imikoranire ye na CGTN yabaye ihagaze “kubera ibibazo bya COVID-19 n’imitungo itari yifashe neza muri icyo kigo”.

Abanyamakuru bajyanye na Gatanazi gutara amakuru, bamuzi nk’umugabo w’umuhanga mu kubaza baba aboroheje n’abakomeye, akabimenya mu Kinyarwanda no mu ndimi z’amahanga zirimo Igifaransa n’Icyongereza yavomye mu iseminari ku Rwesero.

Inkuru ze zakunze kurangwa no kutabogama biri no mu byatumye benshi basamira hejuru umurongo [channel] we wa YouTube yise ‘The Real Talk’ yatangije muri Gicurasi 2020.

Ni umurongo yatangije anyuzaho ibiganiro byibanda cyane kuri politiki, rimwe agahamagara abayobozi cyangwa abandi bantu biganjemo abanyepolitiki, aho usanga ababaza ibibazo bitandukanye bijyanye n’ibyo bashinzwe cyangwa se ibijyanye n’ubuzima bw’igihugu. Mu gihe habayeho ko hari ukomozwaho mu kiganiro runaka, Gatanazi aranyaruka n’uwo wavuzwe mu kiganiro adahari agahabwa umwanya, akagira icyo avuga. Ibintu bigaragaza ubundi itangazamakuru rya nyaryo, rigendera ku mahame.

Kubera ubwo bunyamwuga no kuba yaratangije ingingo za politiki zidakunze kuvugwaho cyane by’umwihariko ku bakoresha YouTube mu Rwanda, byamwongereye abafana. Ibyo binagaragarira mu bayobozi bakomeye mu nzego zitandukanye z’igihugu yagiye yakira bakaganira, ibisa nk’ibyatangiye kubahisha imirongo ya YouTube, ubundi yafatwaga nk’idashinga.

Mu mpera z’umwaka ushize, hari abatangiye kwibaza kuri Gatanazi na bwa bunyamwuga bwe, ahanini babihereye ku batumirwa yari asigaye aha ijambo biganjemo abasebya Leta, abashinjwa gupfobya Jenoside n’abandi kandi ugasanga noneho uruhande rutumva ibintu kimwe nabo rwo rutatumiwe.

Ibintu byahinduye isura ku Cyumweru tariki 28 Gashyantare uyu mwaka ubwo noneho uyu mugabo yagaragaraga mu cyiswe ‘Imyigaragambyo’ yo kwamagana ifungwa rya Yvonne Idamange Iryamugwiza wafashwe akekwaho ibyaha bitandukanye, byiganjemo ibyo yakoze yifashishije YouTube mu minsi ishize.

Ni imyigaragambyo yateguwe n’Abanyarwanda baba mu mahanga ariko bibumbiye mu matsinda azwiho guharabika Leta y’u Rwanda. Mu bayitabiriye harimo abahakana Jenoside yakorewe Abatutsi, abakomoka ku babyeyi bagize uruhare rukomeye muri Jenoside, abakomoka ku bantu bahoze muri Parmehutu muri za 1959, abazwiho gupfobya Jenoside yakorewe Abatutsi no kuyikerensa, abazwiho kubeshya ko bacitse ku icumu [byahe byo kajya], abarwanya Leta mu rwego rwo kwishakira amaramuko n’abandi.

Nyuma y’ibi biganiro, byabaye noneho nk’ibikura igihu ku bari bamaze hafi amezi abiri bibaza kuri Gatanazi n’impamvu asa nk’uwahinduye umurongo shene ye yagenderagaho.

Ni ikiganiro cyanyuze ku murongo wa YouTube umaze kumenyerwaho gukwiza ibihuha n’ibinyoma witwa “Umutware”, kimara amasaha arenga abiri, cyibanda cyane ku gutuka no gukoresha amagambo adacyeye kuri Leta y’u Rwanda n’abayobozi b’igihugu.

Bigeze kuri Gatanazi wasaga nk’urimo kubandwa habona kuko ari bwo bwa mbere yari agaragaye byeruye ari mu runana n’abarwanya Leta, yafashe ijambo agaruka cyane ku buryo ngo mu Rwanda nta bwisanzure buhari bwo kuvuga icyo umuntu atekereza.

Uyu mugabo utari wagaragaye ku rutonde rw’abantu bari bwitabire ibyo biganiro, yasabiwe ijambo n’umusangiza w’amagambo, Mireille Abewe, wari ufatanyije na Claude Gatebuke, mwene Gatsinzi Gatebuke, uyu azwiho kwiyitirira [abeshya] ko yarokotse Jenoside yakorewe Abatutsi mu 1994.

Agihamagarwa ngo atambutse ijambo, Gatanazi yakiriwe mu buryo bufite umwihariko kuko yakomewe amashyi na benshi mu bari bitabiriye icyo kiganiro cyiswe ‘Imyigaragambyo’, ibintu bitari byakorewe undi uwo ari we wese.

Yateruye agira ati “Ndishimye kubona Abanyarwanda benshi ubusanzwe ntinya kuvugana na bo kubera ibibazo bimwe na bimwe nka biriya Idamange yavugaga, ariko bigera aho nkavuga ngo ‘noneho reka mbivugire kuri YouTube”.

Yakomeje asa nk’usobanura uburyo mu Rwanda nta bwisanzure bwo kuvuga icyo umuntu ashaka buhari, n’ubwo nta na rimwe aravuga ko hari uramubuza gukora ibiganiro cyangwa ngo amutegeke ibyo kuvuga n’ibyo areka kuri Real Talk.

Yagize ati “Ikintu kiriho, ni uko ibintu by’ubwisanzure bwo kuvuga hano mu Rwanda [ntibihari]. Igituma ubona umuntu ashobora gusohoka nka kuriya nka Idamange akavuga kuriya, umuntu utari uzwi [kuko] si umunyamakuru, si umuntu uharanira uburenganzira bwa muntu [activist], nyuma y’iminsi itatu, akaba abaye umu-activist, ni uko uburenganzira bwo kuvuga bufunze cyane.”

Nyamara nyuma y’umunsi umwe avuye mu myigaragambyo, Gatanazi ni we wibwiriye Ukwezi TV ko nta rwego na rumwe ruramuhamagara rumubaza ibyo akora cyangwa avuga, ndetse icyo gihe ashimagiza inzego z’ubugenzacyaha bw’u Rwanda ko zikora kinyamwuga, zitagendera ku mabwire. Kuri benshi biteye kwibaza uburyo yanyuranyije indimi bigeze aha.

Muri iyi myigaragambyo yari igamije gushyigikira Idamange, Gatanazi yakomeje agira ati “Niba tunigaragambiriza Idamange, duharanire ubutabera bwe. Yabivuganye uburakare kubera ubuzima abantu hano babamo, ugasanga umuntu aravuze, aravugira mu matamatama ngo ‘ehhh.. Idamange yaratuvugiye.”

Mu buryo butomoye, uyu munyamakuru yaje kuva mu byo kurya indimi maze avuga ibintu mu mazina yabyo, ati “Abantu bose, mwaba muri hanze, n’ababa mu Rwanda, bumve ko igihe kigeze ko uburenganzira bugerwaho. Niba tunaharanira ko ubutabera kuri Idamange bubaho, wenda habeho n’iyo hashtag, rwose abantu bagende barebe n’icyatumye umuntu agera hariya wenda akaba yavuga n’ibintu rimwe na rimwe bitariho.”

Mu kurushaho gusobanukirwa ibyo bintu bitariho ariko bisa nk’ibifite igisobanuro, Gatanazi yahisemo kubaza Ishimwe Norman, Umunyamabanga Mukuru w’Umuryango Jambo ASBL ugizwe n’abapfobya Jenoside n’abakomoka ku bayikoze.

Uyu ni we Gatanazi yifashishije ashaka kumva neza ibikorwa bya Idamange, birimo cyane cyane impamvu uyu mugore yabitse Umukuru w’Igihugu ndetse akanamutuka mu ruhame.

Mu buryo busa nko kwivanga mu kazi k’ubutabera, Gatanazi yasabye amasengesho kuri Idamange, ngo ‘kuko mu butabera bizamukomerera’, n’ubwo atavuga uburyo bizamukomereramo. Aha umuntu yakwibaza impamvu atategereje ngo ubutabera bukore akazi kabwo, kandi byaramaze kumenyekana ko ari mu maboko y’ubutabera.

Rimwe mu mahame y’itangazamakuru akomeye kandi na Gatanazi azi neza, ni ukubaha ubwigenge bw’ubutabera. Idamange ibyaha ashinjwa byaratangajwe kandi ntaragezwa imbere y’ubutabera cyangwa ngo yisobanure, nibura wenda ariho umuntu ahera avuga ko arengana. Biteye kwibaza rero, uburyo umunyamakuru witwa umunyamwuga, ajya ku karubanda agahamagarira abantu gushyira igitutu ku butabera, abwibutsa gukora akazi bushinzwe.

Ikindi cyibajijwe, ni uburyo Gatanazi na bagenzi be bari bazi urutegereje Idamange kuko bumvaga uburemere bw’amakosa ari gukora, ariko ntibamubere imfura ngo bamucyahe, cyangwa se ngo bamwereke ubukana bw’ibyo ari gukora, dore ko yari n’umuntu w’inzaduka utazi byinshi nk’ibyabo, bikaza kugera ubwo yarinze atabwa muri yombi, none bakaba bari gutakira ingoyi kandi amazi yaramaze kurenga inkombe.

IGIHE yagerageje kuvugana na Gatanazi kugira ngo atange ibisobanuro kuri ibi bikorwa, atubwira ko ikiganiro aherutse gutanga ku murongo wa Umutware ntacyo yakivugaho.

Etienne Gatanazi yagarutsweho na benshi nyuma yo kwitabira "Imyigaragambyo" itabariza Idamange

Amaco y’inda?

Umunyarwanda yaritegereje ajya inama, asaba abantu kwitonda bakajya ‘barya akagabuye’. Gatanazi ni umugabo wakoze akazi ke neza kandi agahemberwa neza, kuko n’ibinyamakuru byose yakoreye biza ku rutonde rw’ibanze mu bitanga agatubutse. Benshi mu banyamakuru barota kubikorera.

Umwe mu bantu bazi neza Gatanazi yavuze ko biturutse ku ho yakoraga, bishoboka ko urwego rw’imibereho ye rwazamutse, kugeza ejo bundi mu bihe bya Coronavirus, wenda ubwo kimwe mu bitangazamakuru yakoreraga, televiziyo ya CGTN, yahagarikaga imikoranire bagiranaga, bigatuma ubuzima butangira gushariramo gacye.

Bamwe mu bantu baganiriye na IGIHE batifuje ko amazina yabo atangazwa, bavuze ko Gatanazi amaze guhagarika imikoranire na CGTN ari bwo yatangiye gushyira imbaraga mu murongo we wa YouTube, kugira ngo umwinjirize amafaranga amwunganira ngo ubuzima budahungabana.

Umwe yagize ati “Urumva yabonye hari uburyo yateza imbere YouTube [Channel] kugira ngo ikomeze kumwunganira mu buryo bw’amikoro, kandi YouTube [Channels] zigezweho ahantu hose, urumva rero yatekereje ko nk’umuntu usanzwe azwi mu mwuga, ashobora kuzabyuririraho akamenyekana ndetse akanakurura igikundiro, bityo na we ayo madorali akayaryaho”.

Mu minsi ya mbere, Gatanazi yatangiye aganira n’abantu barimo abayobozi bakuru mu nzego za Leta, inararibonye mu ngeri zitandukanye ndetse n’abasesenguzi, kandi koko ikiganiro cye kibadukana igikundiro bidatewe gusa n’ingingo ziganirwaho, ahubwo binatewe n’ubuhanga bw’uyu mugabo mu kuyobora ibiganiro ndetse no kubaza ibibazo bifite ireme.

Nk’umuntu wakoreye ibitangazamakuru mpuzamahanga bihemba neza, ngo Gatanazi yari amaze kubona ko nta gitangazamakuru cyo mu Rwanda cyapfa kongera kumuhaza mu bijyanye n’umushahara, bityo abona kwikorera ari cyo kintu cyiza.

Umurongo we wa YouTube warakunzwe mu gihe gito, na we ntiyatenguha abamushyigikiye, buri gihe akagaruka ku ngingo zigezweho kandi zisobanurwa n’abasesenguzi bazizi neza.

Mu bakurikiranaga bya hafi Gatanazi, harimo ababa mu mahanga bazwiho gusebya Leta y’u Rwanda, cyane ko yakomozaga ku ngingo zikomeye zidakunze kuvugwaho ndetse n’izitavugwa rumwe, rimwe na rimwe abo barwanya Leta bifashisha mu gushyashyariza u Rwanda birengagije ukuri nkana. Mu biganiro bye, Gatanazi yabisobanuzaga neza ku buryo buri wese abyumva neza.

Hari amakuru avuga ko abo barwanya Leta babonye umurongo yari afite bagatangira kureshya uyu mugabo, bashingiye ku bibazo yari amazemo iminsi, bavuga ngo ‘ni we muntu wakwizerwa mu kutubera umuvugizi i Kigali’.

Mu kumufatirana, Gatanazi yinjijwe mu rutonde rw’abandi basanzwe batunzwe n’abo barwanya Leta y’u Rwanda, bagahemberwa gusebya Leta, binyuze mu biganiro batanga bifashishije imiyoboro ya YouTube.

Mu bandi basanzwe kuri urwo rutonde, barimo Idamange na Aimable Karasira wiyita Professor Nigga, uyu akaba aherutse no kwirukanwa muri Kaminuza y’u Rwanda ashinjwa imyitwarire idahwitswe n’abandi.

Mu kwitabira imyigaragambyo yo kuri iki Cyumweru, Gatanazi ngo yari agamije kwereka abamushyigikiye ko yifatanyije nabo, nk’uko umwe mu bemeye kuduha amakuru yabivuze.

Ati “Bariya bantu bagomba kuba bahora bamwoherereza amafaranga yo kumutunga kandi icyo bashaka arakizi, rero na we agomba kubereka ko ari umuntu wo kwizerwa, ni yo mpamvu yitabiriye iriya nama, kugira ngo yerekane ko bari kumwe mu rugendo. Ni nk’aho barimo kumubatiza bamugira umwe muri bo, kandi warabibonye uburyo bamwakiriye, ubona ko bafitanye igihango na we, si ibintu by’impanuka cyangwa ubujiji kuko uriya mugabo ni umuhanga ntiyashukika gutyo gusa”.

Bamwe mu bahise bamagana ibikorwa bya Gatanazi, harimo Ambasaderi w’u Rwanda mu Buholandi, Olivier Nduhungirehe, akaba ari n’umwe mu bigeze kugirana na Gatanazi ikiganiro ku murongo we wa YouTube.

Abinyujije kuri Twitter, yaribajije ati “Ntibyumvikana ukuntu abaYouTubers bamwe bo mu Rwanda ndetse banafite ikarita y’itangazamakuru bitabira ‘imyigaragambyo’ yo kuri murandasi, yateguwe n’abahakana bakanapfobya Jenoside yakorewe Abatutsi bagamije gusaba ko Umunyarwanda uregwa ibyaha n’ubutabera arekurwa!”

Hari bamwe mu bakurikirana Nduhungirehe bamusobanuriye ko umunyamakuru wagiye gutara amakuru ahabereye imyigaragambyo, bitavuze ko na we aba yahindutse uwigaragambya.

Nduhungirehe yahise abinyomoza, avuga ko “Umunyamakuru we yari mu batanga ibiganiro. Yanahawe n’amashyi menshi kurusha abandi. Bageze n’aho bikiriza icya rimwe inyikirizo z’imyigaragambyo. Mu bateguye kandi banafashe amagambo, hari higanjemo abahakana [Jenoside] basanzwe bazwi.”

Undi musesenguzi yavuze ko byumvikana ko iyo Gatanazi aba yagiye gutara inkuru, yari bubaze abo bagiye kwigaragambya icyatumye bajya kwigaragambya ariko ntafate uruhande, ndetse koko muri bwa bunyamwuga bw’itangazamakuru, inzego z’ubutabera cyangwa Leta y’u Rwanda bagahabwa umwanya muri iyo nkuru, bakisobanura. Kuba rero ngo yaragiye nk’umutumirwa kandi agafata uruhande, byemeza nta gushidikanya ko ari mu runana n’abo bari bari kumwe.

Ku ruhande rwa Nizeyimana Alexis, umusesenguzi mu bya politiki, na we asanga n’ubwo umuntu yemerewe kugira imyumvire runaka, ariko hari igihe aba atemerewe kuyigaragaza bitewe n’umwuga akora, ku buryo kuba umunyamakuru nka Gatanazi yarerekanye uruhande abogamiyeho muri iriya myigaragambyo, ari amakosa akomeye.

Yagize ati “Ubusanzwe umunyamakuru agomba kutagira uruhande abogamiraho, ntagomba gushyigikira uruhande rumwe urundi ngo arureke. Kuba rero yarafashe uruhande rumwe, bivuze ko icyizere agirirwa nk’umunyamwuga mu itangazamakuru gishobora gutakara”.

Benshi bahurije ku kuba ari amaco y’inda yatumye Gatanazi ajya ku ruhande rugizwe n’abantu bizwi neza ko ari abanzi ba Leta.

Prof Nigga yigeze guca amarenga avuga uburyo abantu barwanya leta baba hanze bashukana. Ati “Bariya bantu barashukana, nanjye hari abo tujya duhura nkumva barashaka kunshuka. Ni abantu bashukana bavuga bati wowe kora ibi ubundi tuzagushyigikira. Kandi ingorane zivamo, iyo ukoze ikintu kibi ntabwo ubutabera bashobora kubwitambika imbere.”

Mu bari kumwe na Gatanazi barimo abandi bazwi bari bitabiriye imyigaragambyo nka Denise Zaneza, umukobwa w’imfura wa Marcel Sebatware ushinjwa uruhare rukomeye muri Jenoside yakorewe Abatutsi. Sebatware yihishe mu Bubiligi.

Uyu mukobwa azwi cyane mu biganiro no mu nyandiko zipfobya Jenoside yakorewe Abatutsi n’ibindi bikorwa bigamije gusiga ibyondo Leta y’u Rwanda.

Hitabiriye na Placide Kayumba, ari na we washinze akabanza no kuyobora umuryango Jambo Asbl ukorana n’umutwe wa FDLR. Ni umuhungu wa Dominique Ntawukuriryayo wabaye Su-Perefe wa Gisagara, mu gihe cya Jenoside yakorewe Abatutsi mu 1994. Ntawukuriryayo yakatiwe gufungwa imyaka 25 n’urukiko mpanabyaha rwashyiriweho u Rwanda.

Natacha Abingeneye ari na we Perezida wa Jambo Asbl, yitabiriye imyigaragambyo yo gutabariza Idamange, ni umukobwa wa Juvénal Uwiringiyimana wabaye Minisitiri w’Ubucuruzi n’Umurwanashyaka wa MRND. Muri Kamena 2005 yahamagajwe na ICTR, aza gupfa urubanza rwe rutarangiye.

Mu bandi baba mu Rwanda bitabiriye imyigaragambyo yo kuri YouTube harimo Ingabire Victoire washinze FDU Inkingi. Uyu yakatiwe ku byaha birimo kugambanira igihugu no kurema umutwe w’abagizi ba nabi. Yahawe imbabazi na Perezida wa Repubulika mu 2018.

Harimo kandi na Bernard Ntaganda wirukanywe mu Ishyaka PS-Imberakuri yashinze, wongeye gusa nk’uwibutsa agaciro ke kameze nk’akacyendereye, akavuga ko burya bwose ibyo ba Idamange bakoze ari we babikesha, kuko ari umwe mu baharuye inzira banyuzemo.

Mr. Bean, impunzi idafite impamvu

Mu bandi bahishuye isura yabo ku Cyumweru gishize, harimo Mukunzi Rubens wamenyekanye mu Rwanda nka ‘Mr. Bean’, ariko ubu akaba azwi nka ‘Bombori Bombori’ kubera ibiganiro atambutsa yahaye iryo zina.

Uyu mugabo yamenyekanye cyane mu Rwanda mu myaka yatambutse akora ikiganiro ‘Sugira’ cyatambukaga mu gitondo kuri Radio 10, ahanini cyabaga cyiganjemo urwenya ari nacyo benshi bamukundiraga. Uyu kandi yanashinze anayobora ikinyamakuru Oasis Gazette.

Mukunzi yari umuntu w’umunyarwenya ndetse yari ayoboye itsinda ry’urwenya ryitwa ‘Seven Friends’ ryarimo abasore barindwi bari abanyeshuri bo ku Ishuri rya C.I.E.S.K riri i Rwampara ya Nyamirambo.

Uru rwenya ni rwo rwamuhesheje akabyiniriro ka Mr. Bean, izina rikoreshwa na Rowan Sebastian Atkinson, umugabo w’Umwongereza uri mu banyarwenya bakomeye Isi yagize.

Uretse ibyo gusetsa, Mr. Bean yari anafite impano yo gushushanya, ndetse yabonye ibiraka byo gushushanya ibyapa byinshi mu yahoze ari Electrogaz n’ahandi. Ibi byamuheshaga agatubutse ku buryo yari umugabo umeze neza muri iyo myaka.

Usibye ibi byo gushakisha nk’abandi basore b’i Kigali, Mr. Bean yari umusore ukunda gukora, agakunda amafaranga kubi kandi ngo akamenya no kuyashaka kuko inshuti ze zemeza ko no muri bya biraka yabonaga ahantu hatandukanye, yakoranaga umurava ku buryo buri wese bakoranye yamutangiraga ubuhamya.

Uko uyu mugabo yakoranaga umurava ariko, ni nako yari afite inzozi ziri ku rwego rwo hejuru. Uyu mugabo ngo yakunze kubwira inshuti ze ko yifuza kuzaba umukire wa nyawe, inzira byacamo zose.

Uru rungano rwa Mr. Bean rwarimo inshuti nyinshi kuko yari azi kubana, bitewe n’uko yari afite agafaranga ariko nanone akagira urwenya rwinshi, bikiyongeraho imyitwarire myiza yamurangaga, byose bigatuma aba umuntu ukunze kuba ashagawe.

Ahagana mu 2013, Mr. Bean yerekeje muri Leta Zunze Ubumwe za Amerika mu buryo busanzwe, ndetse bamwe mu nshuti ze bari biteze ko azagaruka vuba.

Agezeyo yatangiye amayeri yo kuvuga ko atifuza kugaruka mu Rwanda kuko ngo Leta yari imumereye nabi, aho yasobanuraga ko yamuhoraga ikinyamakuru cye cyitwaga ‘Oasis Gazette’ cyibandaga ku burezi.

Uko kwitatsa kose yabikoze agamije kubona ubuhungiro muri Amerika no guhabwa ibindi byangombwa bigenerwa impunzi, bityo akagera ku nzozi ze zo kubaho mu buzima bwiza kandi atavunitse cyane.

Igitangaje muri ibi byose, ni uko uyu mugabo yabeshye ko Leta imuhora ikinyamakuru cye cyibandaga ku burezi, nyamara amakuru twakuye mu bakora mu nzego z’uburezi yemeza ahubwo ko Leta y’u Rwanda yateraga inkunga Oasis Gazette, icyo kinyamakuru cya Mr Bean, kuko cyari kimwe muri bike byibandaga gusa ku burezi, ku buryo Leta itari kwitesha ayo mahirwe.

Umwe mu bo twaganiriye wakoraga muri Minisiteri y’Uburezi muri za 2012 - 2013 yadutangarije ko we na bagenzi be muri kiriya gihe bacyumva ibirego bya Mr. Bean kuri Leta y’u Rwanda, baguye mu kantu ariko babanza kugira ngo ni ya mashyengo ye ya kera, baza gutungurwa nyuma bamaze kubona ko uyu mugabo koko yamaramaje muri ibi bikorwa byo kototera isura y’u Rwanda.

Bivugwa kandi ko uyu mugabo na we kuri ubu ari umwe mu bagenerwa inkunga ibabeshaho, aho abamukoresha ngo bashingira ku gikundiro yagize mu Rwanda, bakakibonamo imari yatuma ibitekerezo bamunyujijemo byakumvwa bwangu n’Abanyarwanda.

Mu myigaragambyo yo kuri Internet yo gutabariza Idamange, Mr Bean yavuze ko kuba babashije guterana bagakurikirwa n’abantu ibihumbi bitanu, ngo ari “impinduka iri gukomanga”.

Umunyamakuru Nibishaka Jean Baptiste uzwi nka Yohani Umubatiza wakoranye na Mr Bean, yabwiye IGIHE ko yatunguwe n’imyitwarire ye, kuko ubwo bakoranaga yari umugabo udakunze kwinjira mu bintu bya politiki.

Ati “Byarantunguye kuko yari asanzwe yibera mu bintu byo kwishakishiriza no gukorana n’abahanzi, rero ibyo bintu byarantunguye kuko ntiyari asanzwe abyirukamo cyane”.

Icyakora Mr Bean we ntabwo yatunguranye cyane kuko hashize iminsi anyuza kuri YouTube ibiganiro bisebya Leta y’u Rwanda, akavuga ko akiri mu Rwanda atari yisanzuye, ibintu biteye kwibaza kuba atangiye kubivuga ubu kandi atarabivuze agihari cyangwa akigera muri Amerika, akaba yarabanje gutegereza imyaka irindwi.

Mukunzi Rubens ni umwe bubatse izina rikomeye mu itangazamakuru mu Rwanda ariko ubu asigaye ari mu batavuga rumwe na leta

Gucumuzwa n’akamanyu k’umutsima

Umunyarwanda umwe yigeze kujya inama asaba rubanda kwitonda, umuntu akarya akagabuye ngo ejo katazamugaruka aka wa mugani w’agasamuzuri. Rugamba Sipiriyani na we yigeze gukora mu nganzo araririmba ati “Inda nini muyime amayira”, kuko “igira inama mbi, ikaguteranya n’inshuti ukayitenguha, ukayita ukaba umugaragu w’inda”.

Kuba rero umuntu yareba ku nda ye akifatanya n’abarwanya igihugu kubera gusa amaronko abibonamo, ni inzira y’ubusamo ishobora kumuha umugati uyu munsi, ikamuhirika mu manga ejo.

Ntabwo bivuze ko kutavuga rumwe n’ubutegetsi ari bibi kuko na Lucky Dube yaririmbye ko ‘ubudasa bw’abantu’ aribwo butuma bunga ubumwe, icyakora ubu buryo bwo kubona amaramuko binyuze mu buryo bwa mpemuke ndamuke, si inzira nziza.

Ni uburyo bumaze gufata indi ntera mu Rwanda kuko usanga abantu bamwe birukira ku gufungura imirongo ya YouTube, maze kugira ngo babone abantu babareba, bakibanda ku gutangaza amakuru y’ibihuha adafitiwe gihamya, n’aca igikuba bagamije kongera umubare w’ababareba ari na bwo buryo babonamo amafaranga.

Hari bamwe byatangiye kugaruka barimo Niyonsenga Dieudonne uzwi nka Cyuma Hassan wahoze ari umunyamakuru, abanyamakuru batatu bahoze bakorera Iwacu TV bose bari mu nkiko bashinjwa ibyaha byashoboraga kwirindwa.

Hari abanyamakuru benshi batunzwe n’umwuga wabo kandi babayeho neza, atari ba Ndiyo Bwana ariko atari na ba Mpemuke Ndamuke, bamwe bakora umwuga wabo uko bikwiriye, bagatanga ibitekerezo uko babyumva bagamije kubaka igihugu, nta zindi nyungu zibyihishe inyuma.

Ntaganda Bernard ni umwe mu bitabiriye iyi myigaragambyo
Iyi myigaragambyo yabaye hifashishijwe ikoranabuhanga
Mr Bean ni umwe mu bitabiriye, usanzwe yiyita impunzi muri Leta Zunze Ubumwe za Amerika
Gatanazi agitangira kuvuga, abari bitabiriye imyigaragambyo bamwakirije amashyi
Victoire Ingabire asanzwe akorana ibiganiro n'amashyirahamwe nka Jambo asbl

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .