Bamwe mu banyamahanga banze gusubira iwabo kubera ingamba nziza z’u Rwanda mu kwirinda COVID-19

Yanditswe na Habimana James
Kuya 26 Werurwe 2020 saa 01:54
Yasuwe :
0 0

Bamwe mu banyamahanga bakorera mu Rwanda bahuriye ku rubuga nkoranyambaga rwa Facebook, basubije mugenzi wabo wababajije impamvu batasubiye mu bihugu byabo muri iki gihe hari icyorezo cya Coronavirus, bamwibutsa ko bumva bafite umutekano ku buzima bwabo no kurenza ibihugu byinshi by’i Burayi.

Tariki 20 uku kwezi, guverinoma y’u Rwanda nibwo yafashe ingamba zikomeye mu gukumira ikwirakwira ry’iki cyorezo, zarimo ko nta ngendo z’indege z’abagenzi zagombaga kongera kuva cyangwa kuza ku butaka bw’u Rwanda mu gihe cy’iminsi 30.

Minisitiri w’Ubuzima, Dr Ngamije Daniel, yavuze ko Guverinoma y’u Rwanda yafashe umwanzuro wo guhagarika ingendo z’indege mu gihe cy’ukwezi mu rwego rwo gukumira ikwirakwira ry’iki cyorezo.

Kugeza ubu imibare ya Minisiteri y’Ubuzima igaragaza ko abantu 41 ari bo bafite ubu bwandu mu Rwanda.

Ku rubuga rwa Facebook ahahurirwa na bamwe mu banyamahanga bakorera ku butaka bw’u Rwanda, uwitwa Acki Rogers yabajije bagenzi be impamvu bahisemo kudasubira mu bihugu byabo muri ibi bihe.

Mu butumwa bwe yagize ati “Hari icyo nifuza kumenya, kuri aba banyamahanga bari mu Rwanda ariko bahurira kuri uru rubuga, bakaba barahisemo kuguma mu Rwanda aho gufata indege bagasubira mu bihugu byabo, ni iyihe mpamvu yatumye mugumayo? Muzahitamo gufata umwanzuro mu gihe ibintu bizaba bimeze nabi mu Rwanda?.”

Nyuma y’ubu butumwa, abantu batandukanye bahuriye kuri uru rubuga bamusubije ko kuba barahisemo kuguma mu Rwanda, ari ukubera ko bahafite umutekano uhagije no kurusha ibihugu byabo we yumva ko bajyamo.

Uwitwa Mirka Eikelschulte yagize ati “Impamvu twabihisemo ni uko muri iki gihugu hari umubare muto w’abamaze kwandura iki cyorezo, ni ahantu heza hafite ikirere cyiza cyafasha no kugabanya ikwirakwira ryacyo, muri make hano ni mu rugo.”

Uwitwa Jennifer Lichty Kamari we yagize ati “Kuguma mu Rwanda… iki ni igihugu gifite imbaraga mu guhangana n’iki cyorezo kurenza ibihugu byinshi ku Isi. Byaba ari ubuswa uramutse werekeje ku kibuga cy’indege.”

Uwitwa Caroline Mager we yavuze ko hari impamvu nyinshi zituma barahisemo kuguma mu Rwanda, harimo no kuba u Rwanda rwarafashe ingamba zikomeye zo guhangana na Coronavirus no kurenza ibihugu byinshi.

Yagize ati “Icya mbere hano niho dufite umuryango, ikindi u Rwanda rwafashe ingamba zikomeye zo guhangana n’iki cyorezo, mu Rwanda kandi biroroshye kugera ku nzego z’ubuzima kurenza na New York, aho kugeza uyu munsi ibitaro bigeze ku rwego aho bidashobora kwakira abandi barwayi, kandi nta n’icyizere cyo kugihagarika gihari, hejuru y’ibyo, ubwishingizi bwacu muri icyo gihugu ntibushobora kukuvuza iki cyorezo.”

Undi washubije ni uwitwa Niek Beunders, wagize ati “Hano mu Rwanda turumva dufite umutekano kurenza aho mu Burayi. Yego inzego z’ubuzima mu Rwanda zishobora kugira ikibazo cy’ubushobozi mu gihe iki cyorezo cyaba kiyongereye, ariko hari abaganga beza kandi bafite umuhate.”

Coronavirus yageze mu Rwanda ku wa 14 Werurwe 2020, ubwo yatahurwaga ku Muhinde ukorera rimwe mu mashami y’Umuryango w’Abibumbye mu Rwanda. Abo yagaragayeho bose bari kwitabwaho mu Kigo Nderabuzima cya Kanyinya mu Karere ka Nyarugenge kandi bameze neza.

Ingamba zo kwirinda COVID-19 u Rwanda rwafashe

Abaturarwanda basabwe gukomeza kwitwararika, bakurikiza amabwiriza y’inzego z’ubuzima hibandwa cyane cyane ku gukaraba intoki, kwirinda kujya ahantu hateraniye abantu benshi n’ingendo zitari ngombwa.

U Rwanda rwafashe ingamba zirimo gufunga amashuri, insengero n’ibikorwa bihuza abantu benshi. Mu ngamba zatangiye kubahirizwa uhereye ku wa Gatandatu zirimo ko ingendo zitari ngombwa zibujijwe.

Itangazo rya Minisitiri w’Intebe rivuga ko "Gusohoka mu rugo nta mpamvu zihutirwa birabujijwe, keretse abajya gutanga no gushaka serivisi z’ingenzi harimo kwivuza, guhaha, serivizi za banki n’izindi."

- Kwishyurana hakoreshejwe ikoranabuhanga bigomba gukoreshwa ahashoboka hose kurusha kujya muri za banki na za ATM.

- Abakozi ba leta bose n’abikorera barasabwa gukorera akazi mu ngo zabo keretse abatanga serivisi z’ingenzi zavuzwe haruguru.

- Imipaka yose irafunzwe, keretse ku Banyarwanda bataha ndetse n’abandi batuye mu Rwanda byemewe n’amategeko, abo bose bakaba bazashyirwa mu kato mu gihe cy’ibyumweru bibiri (2) ahantu hateganyijwe.

- Ubwikorezi bw’ibicuruzwa byinjira cyangwa bisohoka mu Rwanda burakomeza.

- Ingendo hagati y’imijyi n’uturere tw’igihugu ntabwo zemewe keretse ku bajya kwivuza cyangwa abafite impamvu zihutirwa.

- Ubwikorezi bw’ibicuruzwa burakomeza nk’uko bisanzwe.

- Amasoko n’amaduka birafunzwe keretse abacuruza ibiribwa, ibikoresho by’isuku, za farumasi, lisansi na mazutu n’ibindi bikoresho by’ibanze.

- Za moto ntabwo zemerewe gutwara abagenzi keretse izigemuye ibicuruzwa,

- Imodoka zitwara abagenzi mu mijyi zirakomeza gukora hubahirijwe intera ya mereto imwe hagati y’abagenzi,

- Utubari twose turafunzwe, resitora zirakomeza gukora hatangwa serivisi yo guha ibyo kurya abakiliya bakabitahana.

Minisitiri w’Intebe yasabye abayobozi b’inzego z’ibanze n’umutekano gushyira mu bikorwa aya mabwiriza, kandi Abanyarwanda basabwa kwita ku mabwiriza bahabwa.

Kugeza ubu umugabane w’u Burayi uri mu migabane yugarijwe n’iki cyorezo kurenza ahandi, kuko imibare igaragaza ko mu bantu barenga ibihumbi 21 bamaze gupfa ku Isi, abarenga ibihumbi 11 bava kuri uyu mugabane.

Muri Leta Zunze Ubumwe za Amerika ho abanyamerika barenga ibihumbi 60 bamaze kwandura, muri New York honyine hafite abantu ibihumbi 33, naho 366 nibo bamaze kuhapfira, mu gihe mu gihugu cyose barenga 1000.

U Rwanda rwafashe ingamba zikomeye mu kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza