Bugesera: Access Bank yateye inkunga umushinga w’ubworozi bw’inkoko w’abapfakazi ba Jenoside

Yanditswe na Akayezu Jean de Dieu
Kuya 25 Mata 2019 saa 08:15
Yasuwe :
0 0

Abakozi n’abayobozi ba Banki y’Ubucuruzi Access Bank Rwanda Plc basuye Koperative Humura Pe y’Abapfakazi ba Jenoside yakorewe Abatutsi, bishyize hamwe batangiza umushinga w’ubworozi bw’inkoko, babaha inkunga y’asaga miliyoni 2.3 Frw.

Kuri uyu wa 24 Mata 2019, nibwo aba bakozi n’abayobozi ba Access Bank basuye uyu mushinga i Ntarama mu Karere ka Bugesera ahororewe inkoko 300 zaguzwe ku nkunga y’iyi banki.

Inkunga Access Bank yatanze yakoreshejwe mu kugura inkoko 300, inzu yo kuzororeramo, ibizitunga, umukozi uzireberera ndetse n’ibijyanye n’abaganga bazikurikirana.

Umuyobozi ushinzwe ishami ry’Abari n’Abategarugori muri Access Bank, Rutabayiro Nadine yavuze ko aba babyeyi bateye intambwe yo kugaragaza kwiteza imbere, iyo banki ibibafashamo.

Yagize ati “Ubu umuryango nyarwanda ugeze kure mu kwiyubaka. Aba babyeyi twasanze hari aho bageze bahereye ku bwizigame bworoheje ari naho natwe twaje dusanga hari aho bageze dufatanya nabo.”

Rutabayiro yavuze kandi ko Access Bank ifite umwihariko wo kwegera abari n’abategarugori mu buryo butandukanye bakangurirwa kwiteza imbere binyuze mu bujyanama n’amahugurwa bahabwa.

Yakomeje agira ati “Ntabwo Access Bank ari ugutanga inguzanyo gusa ku bari n’abategarugori ahubwo tubaha n’ibindi bibaherekeza. Nk’aba dutangiranye tuzabana nabo muri ayo mahugurwa n’ubujyanama tureba umushinga wabo uko ugenda uzamuka, tumenya n’imbogamizi bahura nazo tukazishakira umuti dufatanyije n’abafatanyabikorwa.”

Umuyobozi wa Koperative Humura Pe, Mugorewera Theresa yashimye iyi nkunga bahawe na Access Bank, avuga ko izabafasha mu iterambere.

Yagize ati “Turifuza gukomeza kwaguka tukagira iterambere, tukitunga tugafasha n’abandi. Tuzakorana imbaraga kugira ngo uyu mushinga tuwubyaze umusaruro kandi uzabeho igihe kirekire waguke ugabe n’amashami.”

Umuyobozi w’ Umuryango w’abapfakazi ba Jenoside yakorewe Abatutsi (Avega-Agahozo,) Mukabayire Valerie, yavuze ko mu myaka 25 ishize Jenoside yakorewe Abatutsi ibaye, abayirokotse bakomeje kwiyubaka ari nayo mpamvu inkunga yo gushyigikira imishinga yabo bayishimira.

Abayobozi n’abakozi ba Access Bank kandi basuye Urwibutso rwa Jenoside yakorewe Abatutsi rwa Ntarama , basobanurirwa uburyo Abatutsi bo mu nkengero zarwo bishwe.

Urwibutso rwa Ntarama ruri ahahoze ari Kiliziya Gatolika, Central ya Ntarama mu Karere ka Bugesera. Rushyinguyemo imibiri y’abatutsi ibihumbi bitanu barimo abiciwe muri Kiliziya no hafi yayo muri Jenoside yakorewe Abatutsi.

Basobanuriwe uburyo Abatutsi biciwe muri kiliziya ya Ntarama
Umuyobozi Mukuru wa Access Bank Rwanda, Jean Claude Karayenzi yandika mu gitabo cyagenewe gushyirwamo ubutumwa bw'abashyitsi
Umuyobozi Mukuru wa Access Bank Rwanda, Jean Claude Karayenzi
Umuyobozi w’Ishami ryihariye ry’abari n’abategarugori muri Access Bank, Nadine Rutabayiro
Umuyobozi wa Avega-Agahozo, Mukabayire Valerie yashimye Access Bank ku nkunga yahaye abapfakazi barokotse Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza