Bwa mbere mu Rwanda hagiye gutangizwa amasomo ajyanye no guteranya indege

Yanditswe na Akayezu Jean de Dieu
Kuya 21 Ukwakira 2019 saa 02:08
Yasuwe :
0 0

Kaminuza yigenga ya Kigali ibinyujije mu Ishuri Rikuru ryayo ryigisha Imyuga n’Ubumenyingiro [ULK Polytechnic Institute], igiye gutangira kwigisha amasomo yo guteranya no gukanika indege.

Ni ku nshuro ya mbere mu Rwanda hazaba haje ishuri rishobora kwigisha guteranya indege cyangwa kuyikanika aho biteganyijwe ko binyuze mu bufatanye n’Abenjeniyeri bo mu gihugu cy’u Butaliyani abanyeshuri ba ULK bazajya bahabwa ayo masomo.

Kuwa Gatanu w’icyumweru gishize ku cyicaro cy’iri shuri kiri ku Gisozi mu Mujyi wa Kigali, nibwo hamuritswe ku mugaragaro indege ifite imyanya ine [bivuze ko ishobora gutwara abantu bane], iri shuri ryahawe n’abenjeniyeri bo mu Butaliyani ari nabo bazaza gutanga ayo masomo.

Abanyeshuri ba ULK Polytechnic Institute bakiranye yombi iyi gahunda nshya dore ko hari n’abatangiye gutekereza kuri porogaramu zifite aho zihuriye n’indege.

Nemeyimana Tharcisse wiga mu mwaka wa Gatatu ibijyanye na ‘Electronics’, yakoze porogaramu ikoresha ikoranabuhanga mu kugenzura indege imaze guhaguruka ku kibuga cy’indege, iri mu kirere kugeza imaze kugera aho yari igiye.

Uburyo bikorwa ni ukuba umuntu yicaye kuri mudasobwa noneho akaba agenzura aho indege iri kunyura ku buryo idashobora gukora impanuka kuko iyo igiye guhura n’ikintu cyayiteza impanuka wa muntu ahita abibona akaba yabwira abashinzwe kuyitwara bagahindura icyerekezo.

Nemeyimana avuga ko yishimiye kuba agiye guhabwa ubundi bumenyi ku bijyanye no guteranya no gukanika indege.

Ati “Birashimishije urumva ko n’uyu mushinga wanjye abo bahanga bazamfasha kuwunoza. Ni iby’igiciro cyane, twashimira ULK ihora itekereza kudufasha mu guhanga udushya.”

Ubuyobozi butangaza ko hari abenjeniyeri bazagera i Kigali mu byumweru bibiri, aho bazaba baje gufasha abanyeshuri guteranya indege.

Umuyobozi w’Ishuri Rikuru ry’Imyuga n’Ubumenyingiro ULK Polytechnic Institute, Dr. Karambizi Sylvestre yavuze ko uko iminsi igenda yigira imbere ari nako ikoranabuhanga rikomeza gukataza ari nayo mpamvu bashaka gufasha abanyarwanda kujyana n’uwo muvuduko.

Ati “Ikoranabuhanga rigenda rizamuka, rikoreshwa mu bintu bitandukanye mu buzima busanzwe, gukora ibintu birimo imodoka, ubwubatsi, gukora indege n’ibindi. Indege rero zigira uruhare mu mibereho yacu kugira ngo tuve mu gihugu kimwe tujya mu kindi.”

“Rero akenshi usanga ibihugu byateye imbere ari byo bizikora, twe tukazigura, twakenera abatekinisiye bakava hanze, abazitwara bakava hanze ugasanga turatakaza amafaranga menshi n’imirimo.”

ULK yagize igitekerezo ikigeza ku bafatanyabikorwa bayo bo mu Butaliyani [Basanzwe bafitanye imikoranire kuko bagurayo ibikoresho byo muri za laboratwari], bigeze ubwo bakeneye kwigisha ibijyanye n’indege n’ubundi abafatanyabikorwa b’iyi kaminuza bo mu Butaliyani babemerera kubaha indege yo kwigiraho.

Abenjeniyeri bo mu Butaliyani kandi nibo bazigisha abarimu n’abanyeshuri uko bateranya indege n’uko bayikanika.

Dr Karambizi avuga ko ubu bufatanye bwitezeho kuzagira uruhare mu kuzamura ubukungu bw’igihugu binyuze mu gushyira ku isoko ry’umurimo Abenjeniyeri bafite ubumenyi n’ubushobozi bukenewe by’umwihariko mu bijyanye no gukora indege.

Ati “Ikigiye gutangira mu minsi ya vuba ni ukwigisha abanyeshuri guteranya indege, ibyuma byose birahari ubwo vuba aha baratangira. Ibi rero bisobanuye ko nk’uko bimeze hirya no hino ku Isi kaminuza zigenga zigira uruhare mu bukungu bw’igihugu, natwe rero hari byinshi duteganya gukora bijyanye no kugira ngo dutange imirimo myinsi.”

Kugeza ubu ULK Polytechnic Institute yari isanzwe ifite amashami y’ubwubatsi, gukora amazi n’amashanyarazi ndetse n’ibijyanye no gupima ubutaka. Imaze gushyira ku isoko ry’umurimo ibyiciro bibiri by’abasaga 170.

Iri shuri kandi rigira gahunda y’amasomo y’igihe gito harimo abiga amezi atatu, atandatu n’abiga umwaka harimo nk’ubwubatsi, amazi n’amashanyarazi n’ibindi.

Abanyeshuri bahawe umwanya wo kumurikira abayobozi ibyo bamaze kugezwaho n'iri shuri ry'imyuga n'ubumenyingiro rya ULK
Abiga ubumenyingiro muri ULK baba bashyira mu bikorwa ibyo bize mu ishuri
Biga bifashishije ikoranabuhanga
Ibyuma bitandukanye byo guteranya indege byagejejwe muri ULK, abanyeshuri bagiye gutangira kwiga kubiteranya
Iri shuri rifite ibikoresho bigezweho bifasha abanyeshuri mu myigire
Mugabekazi Jeannette Stella wiga mu mwaka wa Gatatu, Civil Engeneering aha arimo apima ubutaka bushobora kwifashishwa mu kubaka umuhanda
Muri ULK bagiye kujya bigisha guteranya indege
Muri ULK Polytechnic Institute bigisha imyuga itandukanye
Muri ULK Polytechnic Institute bigisha no gukora amashanyarazi
Prof Dr Rwigamba n'uwaje ahagarariye itsinda ry'abafatanyabikorwa bo mu Butaliyani bareba ibikorwa n'abanyeshuri ba ULK
Prof Dr Rwigamba Balinda washinze Kaminuza ya ULK (ibumoso), Umuyobozi wa ULK Polytechnic Institute, Dr. Karambizi Sylvestre n'uwaje ahagarariye itsinda ry'abafatanyabikorwa bo mu Butaliyani
Prof Dr Rwigamba Balinda washinze Kaminuza ya ULK
Umuyobozi wa ULK Polytechnic Institute, Dr. Karambizi Sylvestre aganira n'itangazamakuru
Umuyobozi wa ULK Polytechnic Institute, Dr. Karambizi Sylvestre agenzura ibikorwa n'abanyeshuri be
Umwarimu aberekera ibipimo bigenderwaho mu butaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza