CNRD mu marembera: Uwari umujyanama wa Gen Irategeka yahishuye byinshi birimo uko yaba yarishwe (Video)

Yanditswe na Rabbi Malo Umucunguzi
Kuya 31 Mutarama 2020 saa 11:43
Yasuwe :
0 0

Ibitero by’ingabo za Repubulika ya Demokarasi ya Congo, FARDC bikomeje gutanga umusaruro, aho imitwe myinshi yitwaje intwaro ibangamiye icyo gihugu ikomeje guhashywa, ndetse abarwanyi benshi bari bayigize boherejwe mu Rwanda.

Magingo aya imitwe ya FLN na CNRD imaze gusenywa ku rwego rukomeye, kugeza ubwo abayobozi b’iyi mitwe nabo bafashwe, uretse abiciwe mu mashyamba ntibabashe kugera iwabo.

Umwe mu bafashwe ni Brigadier General Mberabahizi David wakoraga mu biro bya Perezida w’umutwe wa CNRD Ubwiyunge, Gen Wilson Irategeka. Yari amubereye umujyanama mu birebana n’umutekano no kwirwanaho.

Uyu mugabo w’imyaka 56, avuka mu karere ka Musanze, afite umugore n’abana babiri, umukuru afite imyaka ibiri n’igice, undi afite amezi icumi. Yafatanwe n’umuryango we bazanwa mu Rwanda, ariko baratandukanyijwe ngo abahoze mu gisirikare bahabwe amasomo mbere yo gusubira mu buzima busanzwe. Abari abarwanyi bajyanwe i Mutobo, imiryango yo ijyanywa i Nyarushishi mu Karere ka Rusizi.

Kuri uyu wa Kane nibwo Mberabahizi yaganiriye n’itangazamakuru agaruka ku buryo yafashwe, ibyo yicuza n’uburyo yiteguye urugendo rushya hanze y’ishyamba amazemo imyaka hafi 25.

Inzira y’umusaraba bayitangijwe ku wa 17 Ugushyingo 2019 ubwo ingabo za Congo zabagabagaho ibitero mu gace ka Kalehe aho babaga, zibarusha ingufu bakwira imishwaro ubwo.

Icyo gitero ngo cyari gifite imbaraga zidasanzwe, ku buryo batamenye niba koko ari FARDC yabacanyeho umuriro. Nibwo Mberabahizi usanzwe ugendera ku mbago, yatandukanye n’umuyobozi we Gen Wilson Irategeka.

Ati “Twari tumenyereye kurwana n’ingabo za Congo, nta kibazo zaduteraga. Twumva ga ko zizaza tukarwana. Twarwanaga nk’iminsi itatu zikisubirirayo, ntabwo twari tuzi ko zizadukurikira kugeza iyo tugiye.”

“Twarwanye twumva ko bizamara iminsi ibiri, tubonye zidukurikiranye rero nibwo uwari umuyobozi (Gen Wilson Irategeka) we yafashe inzira aragenda, twamaranye iminsi ibiri bageze aho bati tugende, bandusha ingufu n’intambwe, iminsi itatu ya mbere niho namubonye, ikurikiyeho ntabwo nongeye kumubona kuko yari arimo gukiza aye magara.”

Mberabahizi we ngo yahise agwa mu gaco ka ba Mai Mai bamwambura ibyo yari afite byose, ati “iyo umuntu akwambura agatwara na ‘sciseau’ (umukasi) yo kogosha ubwanwa, nayo akayikubita mu mufuka, ntacyo bansigiye. Ubwo nibwo negereye umuturage nti ‘korera Imana’ ungeze ku mupasiteri uri hano hafi.”

“Kuko nari umudive, nashakaga pasiteri w’abadiventisiti, nkeka ko wenda arampa n’akenda ko kwambara, bangeza ku wundi mupasiteri ariko ntiyari umudiventisiti, aranyakira, nyine mubwira ko yangeza ahantu hari inzego z’umutekano, numva ntacyo nkibaye zikangeza iwacu.”

Ngo yamugejeje ahantu hari ikigo cya gisirikare cy’ahitwa i Karongi muri RDC, bajyanwa mu kigo cya gisirikare cyitwa Nyamunyunya bahamara icyumweru bafunzwe, Ingabo za Congo zibashyikiriza ingabo z’u Rwanda ku wa 21 Ukuboza 2019.

Mberabagabo ati “Ku Mukamira tuhamara ukwezi bari kutwondora, tumaze kugarura agatege niho batuzanye hano (i Mutobo), tukaba dutegereje amahugurwa.”

Intangiriro y’urugendo rwe muri FDLR na CNRD

Mberahahizi yinjiye mu ngabo z’u Rwanda mu 1986, ahera mu Ishuri Rikuru rya Gisirikare i Kigali (École Supérieure Militaire) arangiza imyaka ine, asohoka ari Sous-Lieutenat, abanza gukora mu mutwe wa Para-commando.

Mu 1990 ubwo FPR yatangizaga urugamba rwo kubohora igihugu, Gen Mberabahizi yarurwanye ku ruhande rw’ingabo z’u Rwanda icyo gihe kugeza batsinzwe, bahungira muri Zaire mu 1994.

Ati “Tugeze muri Congo twagenderaga ku kuvuga ngo Perezida Mobutu ni inshuti yacu azadufasha twongere dutahe, twumva ko nitugera muri Congo (Zaire), ngo ikibazo cyacu Mobutu arakizi dore ko yari yarigeze kutwoherereza batayo yo gufasha ingabo za Habyarimana (mu guhangana na RPA), turavuga tuti umuntu wadutabaye intambara igitera, nitunahungira iwe nta kuntu atazadutera inkunga ngo twongere dutahe. Ni ibyo twari dufite mu mutwe rero.”

Ngo baje gukomereza muri Congo Brazaville, ariko mu 1998, intumwa ya Perezida Laurent Desire Kabila wasimbuye Mobutu, ijya kubashakisha, abavana aho babaga muri Congo Brazaville abinjiza mu mutwe w’abasirikare badasanzwe bagombaga kumufasha mu gihugu, ari nabwo buryo basubiye mu mashyamba ya RDC.

Ati “Twarwanye ahitwa za Pweto, twarwanye ahitwa za Pepa, izo ntwaro rero Kabila yari yaraduhaye tuje kumufasha, nizo twambukanye tuza mu Burasirazuba bwa Congo (hatangira FDLR gutyo). Icyo gihe bavugaga ko Kabila arimo gushaka abantu bo kumufasha, kandi nawe akazabafasha gutaha.”

“Turavuga tuti uriya mugabo mu batwirukanseho ni ingabo ze, none ni we uri kudushaka, twitaba gutyo rero kuko n’ubuzima bwo muri Congo Brazaville ntabwo bwari bworoshye, aduha intwaro rero, izo ntwaro nizo twaturukanye iyo ngiyo tuzana mu mashyamba ya Congo.”

Uyu mugabo yaje kuva muri FDLR, nyuma y’imyaka itatu yinjira muri CNRD yari imaze gushingwa, akavuga ko yayivuyemo kubera impamvu zinyuranye.

Ati “Hari ubusumbane ntabonaga ari bwiza, mu mibereho y’umuntu iyo uri umuyobozi ugerageza kunganisha abantu, bakakwiyumvamo kimwe. Wajyaga kumva nko muri FDLR ngo hari umuntu wohereje amadolari $20 000 mu muryango we, wowe utagira n’icumi kandi bikazaguma gutyo imyaka n’imyaka.”

“Hakaza ikindi, ntabwo twafatwaga kimwe, hari uwisangaga ku muyobozi runaka, wowe n’iyo wakora icyiza n’iyo cyaba kimeze neza kose bikaba nko kugisitaraho. Ikindi, kutita ku bantu. Nkanjye nari ikimuga, ariko bibatangaze ko niguriraga imbago. Ubwo se wavuga ko ishyaka ukorera ridashobora kukugurira imbago ari cyo cyoroshye, ryakumarira iki? Ibyo nibyo byatumye mvamo.”

Banze gutaha ku neza

Muri ibyo bikorwa byose, ngo bumvaga amakuru ko u Rwanda rwahindutse, ariko umuntu wumva amakuru agahitamo ayo ashaka, cyangwa rimwe na rimwe bakabona amakuru apfuye.

Mberabahizi ati “Nkanjye nakwivuga, nari nikeneye numva nabanza gushaka imibereho, nkazatahana […] numvaga bavuga ngo kanaka aho ari ngo hari ibirombe bya zahabu, undi nawe ngo hari uko ameze, ukavuga uti ‘nanjye ngiye korora ngiye kugira gute, ku buryo nazagera mu Rwanda mfite udufaranga runaka twazatuma nshobora kwibeshaho."

Ngo yabanje gukora ubworozi bw’ingurube, ubundi agahinga intoki yenga kanyanga ku buryo zamuhaga nibura amadolari $100 ku kwezi. Nyamara bari mu nzira bataha, abenshi barambuwe ku buryo bashyikirijwe u Rwanda nta n’iritoboye basigaranye.

Mberabahizi avuga ko bakiba muri Masisi mbere yo kwimukira Kalehe aho bafatiwe, yagiriye inama uwari umuyobozi wabo ko bakoresha uburyo bunyuranye mu kwibeshaho kandi bakabana neza n’abaturage.

Ati “Icya mbere nta kintu twagiraga, nta baturage bari batuzi kandi kubiba byagombaga kuba ikibazo, ubwo nibwo namubwiye nti icya mbere ni uko tugomba guhinga, kugira ngo imibanire myiza n’abaturage igaragare, batagira ngo tuje kubiba. Icya kabiri ni uko nta musirikare ugomba gutemberana imbunda, kugira ngo abaturage batamwikanga bakaduhunga.”

“Icya gatatu ni uko tugomba kwegera abanyamadini, tukabiyegereza cyane bakaza bakatubatiza badakaduha amasakaramentu, kugira ngo nibagera mu bayoboke babo bavuge ngo hariya hari abantu beza, ubwo nibicamo gutyo uwo mutekano uzaba ubonetse.”

Ibyo ngo byaranabahiriye kubera ko bagumanye n’abaturage kugeza ingabo za FARDC zibateye bwa nyuma, ndetse ngo bari bamaze kugira n’abaturage babaha amakuru ko batewe, bamwe bari baranabemereye kuzabahisha.

Yakomeje ati “Abo baturage basaga n’abaheze inyuma, ntibaryaga umunyu, ntibaryaga amavuta, tuhageze tuzana utuntu tw’ubucuruzi, ibyangombwa byose bibageraho, batangira kudukunda bati ‘ahubwo mutangiye kutuzanira n’amajyambere, ibyo tutabonaga ubu turimo kubibona’.”

Muri icyo gice cya Kelehe kandi ngo batungwaga no gutwika amakara bakagurisha, hamwe n’ubucukuzi bw’amabuye y’agaciro bwakorwaga mu ibanga.

Mberabagabo ati “Bayacukuraga mu ibanga, uyabonye ukumva ngo yohereje umugore i Kampala, undi ukumva ngo yujuje inzu ino mu Rwanda, undi ukumva ngo yohereje umugore i Burayi, abari hejuru y’ibyo birombe byo byarabakijije rwose.”

CNRD yararangiye

Mberabahizi avuga ko akurikije ibyabaye kuri uyu mutwe yayoboragamo, ibyawo byarangiye.

Ati “CNRD iri mu marembera, icyo nicyo navuga. Nibura twe twari muri zone ya Kalehe, nka 80% baraje, abandi barimo kuborera muri Kawuzi, Perezida wayo amakuru atugeraho, twumva ko yaba atakiriho. None se urugaga rubuze abaturage, rukabura abasirikare, umuyobozi akaba arahise, wavuga ko rusigaye ku ki?”

Mberabahizi avuga ko ku myaka 56 asigaje imyaka mike ariko nta kintu atunze, ku buryo, ibyo ateganya “ari ukureba umushinga wangirira akamaro vuba, kugira ngo mu gihe nsigaje ku Isi nibura mbe nazagira icyo nsigira abana banjeye.”

Aho bari i Mutobo, mu masomo bazatangira guhabwa mu minsi mike harimo kwihangira imirimo, ku buryo yiteze ko arimo azavana igitekerezo cy’icyerekezo gishya cy’ubuzima.

Yakomeje ati “Nta murima ngira, nta nzu ngira, nta mafaranga ngira, ubwo se navuga ngo ndakora umushinga nte ntabanje kubona icyo naheraho?”

Hari byinshi yicuza

Mberabahizi avuga na mbere hose yajyaga agerageza gutaha bikamupfana, yashaka no gutoroka, kuba afite ubumuga bigatuma atinya ko yafatirwa mu nzira.

Ati “Ntabwo nari gutinya ngo ubwongeze aha hari ukuntu nzakirwa, kuko byari bindimo ko ngomba gutaha. Nari nsanzwe mvugana n’umuryango, bantumaho, nanjye nkavuga ngo reka ndebe ko hari ukuntu nzaza meze, sinze ngo nsabirize.”

Agaruka ku byo yicuza, yakomeje ati “Icya mbere nicuza ni ukwizera abana b’abantu, ibyo bavuze ukumva ko ari ukuri, byatumye umuntu atinda gutya. Iyo mba nariyiziye kare nk’abandi, hari uko nanjye mba mpagaze, icyo ndacyicuza rwose.”

“Ikindi nicuza ni ubujiji, amakuru akaza nk’aho utayumvishe ayo ariyo, ugafata akunogeye, akaba ariyo ufata. Ibyo nabyo ndabyicuza. Mbese ubyinjiyemo ni byinshi.”

Uyu mugabo avuga ko nubwo imitwe mvamahanga muri Congo bayigereje, iyo mu gihugu yo bigoye kuyitsinsura kubera ko buri bwoko bugira ingabo, ugasanga igihe igisirikare cya leta kibagabyeho ibitero, intwaro bazihisha bakajya mu murima bagahinga, batirimuka gato, intwaro zabo bakazegura.

Ikindi ngo ni uko bajya no guhuza ingabo bagafata batandatu bakajya mu ngabo za Guverinoma, abandi bagasigara, nyuma y’icyumweru, za ntwaro bahawe muri guverinoma bakaziba bakagaruka iwabo.

Ati “Congo rero kugira ngo izabashobore, yego ku Mana nta kidashoboka, ariko mfite gushidikanya.”

Komiseri muri Komisiyo ishinzwe gusezerera no gusubiza mu buzima busanzwe abari abasirikare, Fred Nyamurangwa, avuga ko ikigo cya Mutobo kimaze kunyuzwamo abarenga ibihumbi 11, bahabwa masomo atuma basubira mu buzima busanzwe ndetse bakiteza imbere.

Mberabahizi ni umwe mu bari muri iki kigo batorezwa mu cyiciro cya 67, bafatiwe mu mitwe ya FLN na CNRD.

Barimo Brigadier General umwe ari we Mberabahizi, ba colonel bane, ba lieutenant colonel batatu, ba major babiri, ba captain bane, lieutenant umwe na ba sous-lieutenant icyenda.

Brigadier General Mberabahizi David yakoraga mu biro bya Perezida w’umutwe wa CNRD Ubwiyunge, Gen Wilson Irategeka
I Mutobo hari gutorezwa abafatiwe mu mashyamba ya Congo bari mu mitwe ya CNRD na FLN
Colonel Gatabazi wari ushinzwe ibikorwa muri FLN atanga ubuhamya bw'uburyo bahageze

Amafoto: Dushimimana Pacifique

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .