Dr Agnes Kalibata yagenewe ishimwe mpuzamahanga ku bwo guteza imbere ubuhinzi

Yanditswe na Ferdinand Maniraguha
Kuya 30 Mutarama 2019 saa 03:53
Yasuwe :
0 0

Umuryango nyamerika wita ku bumenyi (National Academy for Sciences, NAS), watoranyije umunyarwandakazi Dr Agnes Mathilde Kalibata, ngo ahabwe umudari w’ishimwe kubera guteza imbere abaturage abinyujije mu buhinzi bugezweho ku mugabane wa Afurika.

Uyu mudari uzwi nka The NAS Public Welfare Medal utangwa buri mwaka guhera mu 1914, ugahabwa abantu bifashishije siyansi bidasanzwe bateza imbere abaturage.

Dr Kalibata awuhawe kubera uruhare rwe mu guteza imbere ubuhinzi mu myaka itandatu yamaze ari Minisitiri w’ubuhinzi n’ubworozi mu Rwanda, ubwo yafashaga igihugu kuvana abagera kuri miliyoni mu bukene ndetse n’umuhate we mu guteza imbere ubuhinzi ku mugabane wa Afurika guhera mu 2014 ubwo yagirwaga Perezida w’umuryango Nyafurika uharanira guteza imbere ubuhinzi (AGRA).

AGRA yashizwe na Kofi Annan wahoze ari Umunyamabanga Mukuru wa Loni. Ikorana n’abikorera ndetse na za Guverinoma hagamijwe kugera ku buhinzi butanga umusaruro kandi butunga uwabukoze.

Uyu muryango ubinyuza mu korohereza abahinzi kubona imbuto z’indobanure, gushishikariza abahinzi gukoresha ifumbire, guharanira ivugururwa rya za politiki z’ubuhinzi ndetse no gushakira abahinzi isoko ry’umusaruro wabo.

Umunyamabanga wa NAS akaba n’umwe mu kanama katoranyije abahabwa umudari, Susan Wessler, yavuze ko bahisemo Dr Kalibata kubera ko ibikorwa bye byigaragaza.

Ati “Yaharaniye ko abahinzi bato baba ishingiro ry’iterambere ry’ubuhinzi kandi nibo yagiye yibandaho haba muri politiki n’ubundi bufasha bujyanye n’ubuhinzi. Mu gihe cy’ubuyobozi bwe, iterambere ridasanzwe ry’ubuhinzi muri Afurika riri kwigaragaza.”

Perezida wa NAS, Marcia McNutt, yavuze ko ibikorwa bya Kalibata ari urugero rw’uburyo siyansi ari inkingi ikomeye y’iterambere n’imibereho myiza.

Abinyujije kuri Twitter, Kalibata yashimye igihembo yahawe, ashimira abamufasha mu kazi ke.

Yagize ati "Ndashimira NAS n’abantanze nk’umwe mu bagomba gutoranywa. Ndashimira abantoje, Perezida Kagame, Strive Mayisiwa dufatanyije kuyobora n’inshuti zo muri AGRA dufatanyije inshingano zo kumenyekanisha siyansi mu kuzanira ibisubizo abahinzi b’abanyafurika.”

Muri AGRA, Kalibata ayoboye abakozi basaga 200 bari mu bihugu by’ibanze 11 bakoreramo muri Afurika. Nicyo kigo kinini gikora ku iterambere ry’ubuhinzi bushingiye ku bumenyi n’ubushakashatsi kiri muri Afurika.

Ku bufatanye n’abandi bafatanyabikorwa, AGRA, imaze gutera inkunga imishinga y’ubuhinzi ifite agaciro ka miliyoni zisaga 500 z’amadolari.

Intego ni ukongera ibiribwa n’imibereho y’ingo zigera kuri miliyoni 30 bitarenze umwaka wa 2021 mu bihugu 11 ikoreramo.

Dr Kalibata ni umwe mu bantu babaye abaminisitiri b’ubuhinzi b’icyitegererzo muri Afurika yo munsi y’ubutayu bwa Sahara. Kuva mu 2008 kugeza mu 2014 ubwo yari Minisitiri w’ubuhinzi mu Rwanda, ubukene bwagabanyutseho 50 % ahanini bitewe na politiki nziza y’ubuhinzi no kuzamura abahinzi bato.

Afite impamyabumenyi y’ikirenga (Phd) mu bijyanye n’udusimba duto (Entomology) yakuye muri Kaminuza ya Massachusetts mu mwaka wa 2005.

Yamaze imyaka igera mu icumi akora mu kigo gikora ubushakashatsi ku buhinzi, International Institute of Tropical Agriculture at the Kawanda Agricultural Research Institute gikorana na Kaminuza ya Makerere ndetse n’iya Massachusetts, avamo mu 2006 ajya muri Minisiteri y’ubuhinzi n’ubworozi.

Mu mwaka wa 2018, Kalibata yahawe impamyabumenyi y’ikirenga y’icyubahiro ayihabwa na Kaminuza ya Liège yo mu Bubiligi ku bw’imiyoborere ye idasanzwe.

Mu mwaka wa 2012 yahawe igihembo kitwaga Yara Prize ubu cyahindutse Africa Food Prize gihabwa umuntu cyangwa ikigo kiri kuzana impinduka mu iterambere ry’ubuhinzi bwa Afurika.

Igihembo The NAS Public Welfare Medal umwaka ushize cyahawe umunyamerika Dr Paul Farmer, inzobere mu buvuzi akaba n’Umuyobozi Mukuru w’Umuryango Partners in Health.

Yahembewe uruhare rwe mu guteza imbere ubuvuzi bugezweho mu bice by’icyaro hirya no hino ku Isi.

Agnes Kalibata yahawe ishimwe rigenerwa abakoze ibidasanzwe mu guteza imbere imibereho myiza y'abaturage hifashishijwe siyansi
Kalibata yashimiwe guteza imbere ubuhinzi muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza