00:00:00 IGIHE NETWORK KN KINYARWANDA EN ENGLISH FR FRANCAIS

EU yahaye PAM Rwanda miliyoni 600 Frw yo gushyigikira gahunda yo kwihaza mu biribwa

Yanditswe na Ntabareshya Jean de Dieu
Kuya 10 Gicurasi 2021 saa 04:01
Yasuwe :
0 0

Ishami ry’Umuryango w’Abibimbye rishinzwe ibiribwa ryo mu Rwanda (PAM Rwanda) ryahawe inkunga ya € 500 000 angana na miliyoni zigera kuri 600 Frw yatanzwe n’Umuryango w’Ubumwe bw’u Burayi (EU) agamije gufasha u Rwanda kuzahura ubukungu bwazahajwe n’icyorezo cya Covid-19 no kwihaza mu biribwa.

Uyu muryango watangaje ko inkunga washyikirijwe izafasha Leta y’u Rwanda guhangana n’ikibazo cy’imibereho mibi y’abatishoboye, ikibazo cy’igabanuka ry’ibiribwa ndetse no gukemura ibindi bibazo byasembuwe na Covid-19.

Uhagarariye EU mu Rwanda, Ambasaderi Nicola Bellomo, yavuze ko inkunga batanze izafasha mu kugira uruhare mu kwihaza mu biribwa, amasoko no gushishikariza Leta n’abafatanyabikorwa gushora imari mu bikorwa byo kuzahura ubukungu bwazahajwe n’icyorezo.

Ati “Mu kuzahura ubukungu, ni ingenzi k’u Rwanda gushyiraho ingamba zigamije kongerera imbaraga imibereho myiza no kwihaza mu biribwa, mu rwego rwo kuzahura ubukungu bw’igihugu.”

Umuyobozi wa PAM Rwanda, Edith Heines, yavuze ko ashimishwa cyane n’umurongo Guverinoma yafashe wo gukangukira kwita ku mibereho myiza y’abaturage.

Ati “Igisubizo cya Guverinoma mu gukangukira guteza imbere imibereho myiza nk’urufunguzo rwo guhashya Covid-19 kirashimishije.”

Yakomeje agira ati “Hamwe n’iyi nkunga idasanzwe, PAM izafasha Guverinoma, gushyiraho gahunda igamije kurengera imibereho myiza y’abaturage no kurushaho guhangana n’ihungabana mu bukungu bishingiye ku masomo twigiye ku cyorezo.”

PAM imenyerewe cyane mu gufasha Leta gukora isesengura ryimbitse ku bijyanye n’ibiribwa ndetse n’imibereho myiza y’abaturage. Ivuga ko izakomeza gutera ingabo mu bitugu ikigo cy’iterambere ry’inzego z’ibanze, muri gahunda za Leta zo kwimakaza imibereho myiza, gutera inkunga, gukora isuzuma no kumva ibitekerezo by’abatishoboye bazahajwe na Covid-19.

Iyi nkunga kandi ni umusanzu ukomeye mu kwihaza mu biribwa, gukora isesengura ku batishoboye no ku isoko ry’ibiribwa no kugenzura amasoko mu kuzahura ubukungu bwadindijwe n’icyorezo.

Ni inkunga yashyizwemo 100 % by’amafaranga atanzwe n’Umuryango w’Ubumwe bw’u Burayi binyuze mu masezerano y’ubufatanye yo guteza imbere ubuhinzi no gukoresha ubutaka n’amazi mu buryo bunoze, kwihaza mu biribwa, binyuze mu ngengo y’imari y’ibikorwa bigamije gufasha abazahajwe n’ingaruka za Covid-19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .