Gahunda zirimo ‘Girinka’ zahagurukije abayobozi bo muri Afurika y’Epfo

Yanditswe na Rabbi Malo Umucunguzi
Kuya 21 Kamena 2017 saa 07:48
Yasuwe :
0 0

Minisitiri w’Intebe w’Intara ya Free State muri Afurika y’Epfo, Ace Magashule hamwe n’intumwa ayoboye, bari mu Rwanda aho bigira ku bintu igihugu cyageze ho mu kwishakamo ibisubizo no kureba uburyo abaturage b’u Rwanda bafatanya n’abatuye Free State mu nzego zitandukanye.

Elias Sekgobelo "Ace" Magashule hamwe n’intumwa ayoboye zirimo abayobozi muri guverinoma n’abikorera, bari mu ruzinduko mu Rwanda ruzamara icyumweru, kuri uyu wa Kabiri bakaba bagiranye ibiganiro n’Urwego rw’Igihugu rw’Imiyoborere, RGB.

Umuyobozi Mukuru wa RGB, Prof Shyaka Anastase, yavuze ko baje kuganira ku miyoborere muri iki gihugu, cyane cyane ibirebana n’uburyo u Rwanda rwiyubatse nyuma ya Jenoside yakorewe abatutsi mu 1994.

Yagize ati “Haba ari ibijyanye n’ubumwe n’ubwiyunge, haba ibijyanye no kwishakamo ibisubizo, haba ibijyanye na za politiki zitandukanye, haba ari uko twiyubaka, ariko cyane cyane politiki yacu ishingiye ku bwumvikane, ishingiye ku bwuzuzuzanye n’uruhare igenda igira mu kubaka iterambere rirambye.”

Yavuze ko u Rwanda rwishimiye kwakira aba bashyitsi bazagira n’umwanya wo gusura ibindi bigo bitandukanye.

Mu biganiro byahuje aba bayobozi n’abahagarariye RGB, abanyafurika y’Epfo bagaragaje inyota yo kumenya gahunda zitandukanye u Rwanda rwagiye rushyiraho rwishakamo ibisubizo, uko zagiye zitanga umusanzu n’uburyo nk’Abanyafurika y’Epfo bazibyaza umusaruro.

Prof Shyaka yakomeje agira ati “Harimo no kureba uko twafatanya nk’Abanyafurika, nk’ibihugu bifitanye amateka, bifite byinshi biziranyeho, ariko cyane cyane ni ukuvuga ngo niba hari nk’ibyakoze hano, iwabo ho byashoboka ko byakora?”

Muri ibyo biganiro, Abanyafurika y’Epfo babazaga cyane kuri gahunda nka Girinka, Imihigo, n’ibindi bikorwa bituma Abanyarwanda bibona muri gahunda z’igihugu.

Minisitiri w’Intebe, Ace Magashule, yavuze ko igikenewe ahanini ari ubufatanye hagati y’abaturage b’ibihugu byombi, by’umwihariko nk’Abanyafurika.

Yakomeje agira ati “Afurika yahejwe igihe kinini, ubu ni igihe cya Afurika ngo bakorane bya hafi kandi ibyiza u Rwanda rugezeho, nk’intara yo muri Afurika y’Epfo, byaduteye inyota yo kuza hano ngo twige ibintu bitandukanye cyane cyane ku birebana no kwigira, abantu bakikorera ibintu byabo ubwabo, nta wundi muntu ushobora kutubeshaho. Ndatekereza ko ariyo myumvire ikwiye Afurika yose, ngo twibesheho nk’Abanyafurika.”

“Hari ibintu twize, ku buryo nidusubira muri Afurika y’Epfo tuzabishyira mu bikorwa, tugakurikirana kandi tukabiha umwanya kugeza igihe bizabyara ikintu gikomeye. Nka gahunda ya Girinka twarayigerageje, ariko ntitwayikurikirana ku buryo iyo urebye impamvu hano byakunze ni ugukurikirana, ukabigenzura kandi ugasuzuma uko bikorwa.”

Magashule yavuze ko mu ruzinduko rwabo bashimishijwe n’uko bazagira umwanya wo kubona a na Perezida Kagame, bakaba banifuza gutumira Abanyarwanda kuzajya kureba ibyo bakwigira kuri Free State.

Free State ni imwe mu ntara icyenda zigize Afurika y’Epfo, arizo Eastern Cape, Free State, Gauteng, KwaZulu-Natal, Limpopo, Mpumalanga, Northern Cape, North West na Western Cape.

Ifite ubunini bwa km2 129 825, ni ukuvuga ko nibura ikubye urwanda inshuro 4.9, ikaba ituwe na miliyoni 2 861 600. Umurwa Mukuru wayo ni Bloemfontein ihabwa irindi zina ry’umurwa mukuru w’ubutabera.

Intara muri Afurika y’Epfo ziyoborwa na Minisitiri w’Intebe na guverinoma igizwe na ba minisitiri icumi n’Inteko Ishinga Amategeko. Abadepite nibo batora Minisitiri w’Intebe kuri manda y’imyaka itanu, nawe agashyiraho guverinoma ye.

Gahunda zishimangira ukwigira zirimo nka Girinka ni zimwe mu zatunguye aba bayobozi
Prof Shyaka Anastase ari kumwe na Minisitiri w’Intebe w’Intara ya Free State muri Afurika y’Epfo, Ace Magashule
Ambasaderi w'u Rwanda muri Afurika y'Epfo, Vincent Karega, yaherekeje aba bayobozi bari mu rugendo shuri mu Rwanda
Prof Shyaka aha Ace Magashule ibitabo bikubiyemo uko u Rwanda rwishatsemo ibisubizo
Umuyobozi Wungirije wa RGB, Dr Usta Kayitesi
Umwe mu baminisitiri bazanye na Ace Magashule

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza