Gatsibo: Abaturage barashinja Gitifu n’abanyerondo kubaka amafaranga ngo basubizwe ingurube bibwe

Yanditswe na Hakizimana Jean Paul
Kuya 21 Ukwakira 2019 saa 07:36
Yasuwe :
0 0

Abaturage bo mu Kagari ka Bushobora mu Murenge wa Remera mu Karere ka Gatsibo, barashinja Umunyamabanga Nshingwabikorwa w’ako kagali n’abakora irondo ry’umwuga kubaka amafaranga ari hagati y’ibihumbi 1000 Frw na 5000 Frw yiswe ay’umusoro kugira ngo basubizwe ingurube zabo zari zibwe.

Kuva mu kwezi gushize muri aka Kagari habaye ubujura bw’ingurube bwasize abarenga 15 bari bazoroye bazibwe, ubuyobozi bwiyemeza gukora umukwabu waciye mu ngo zose bituma haboneka ingurube 12 zari zibwe.

Ba nyirazo ngo babwiwe ko buri wese ushaka kuyisubirana agomba kwishyura amafaranga ibihumbi bitanu nk’ishimwe ry’abanyerondo n’umuyobozi w’Akagari.

Abaturage bamwe ngo barayishyuye abandi baratakamba bagenda bishyura ayo bafite barimo abishyuye ibihumbi bitatu, bibiri n’umwana w’imyaka 15 wishyuye igihumbi.

Mushinzimana Emmanuel wishyuye ibihumbi bibiri avuga ko yabanje kubwirwa n’abanyerondo ko ari ukwishyura ibihumbi bitanu, yegera gitifu w’Akagari aramutakambira ngo undi amubwira ko niba ashaka ingurube ye yavugana n’abanyerondo akabishyura ngo we ntabwo bimureba, ngo yaje kubishyura ibihumbi 3000 abona barayemeye bamusubiza ingurube ye.

Mushinzimana akomeza avuga ko bitari bikwiye kubishyuza ngo kuko n’ubusanzwe buri kwezi bishyura amafaranga y’umutekano ahemba abakora irondo ry’umwuga.

Ati “ Njye mbona kariya ari akazi bakora bahemberwa, ntabwo bahembwa kuko bakoze igikorwa runaka kuko niko kazi bashinzwe ishimwe ryo ku ruhande numva ridakwiriye umuntu yakabaye akora inshingano ze biriya mbibara nka ruswa.”

Nyirangabo Seraphine we avuga ko yishyuye ibihumbi bitanu birimo bibiri yabanje kuguza, ngo yabwirwaga ko ari ayo kugurira inzoga abanyerondo ngo kuko babafatiye ingurube zabo gusa agahamya ko bitari bikwiriye ko babaka amafaranga.

Usabimana Margueritte wishyuye amafaranga ibihumbi bibiri bitewe n’uko yari afite ingurube nto, we yemeza ko gitifu w’Akagari yabashishikarizaga kubanza kwishyura abanyerondo mbere y’uko babaha ingurube zabo.

Habarugira Samuel w’imyaka 15 wishyuye amafaranga 1000 yagize ati “ Umuyobozi w’Akagari yadusabaga kuyatanga, njye kuko ndi umwana natanze 1000 ariko abandi batangaga 2000 hari n’abatangaga 5000 bavugaga ko baraye baziraririye.”

Umunyamabanga nshingwabikorwa w’Akagari ka Bushobora, Murwanashyaka Eugene, yabwiye IGIHE ko ibyo gutanga amafaranga atabizi ngo icyo azi ari uko abaturage bari bibwe ingurube bazisubijwe.

Yagize ati “Abaturage babonye ingurube zabo zari zaribwe barazishyikirijwe, ibyo rero byo gutanga amafaranga ntabwo nahamya ko ari ukuri kuko irondo ryafatanyaga n’abaturage bazibonye kuzikura aho bazibye bakazizana ku Kagari bakazisuhabwa, twafashe izigera kuri 12 abagera ku 10 barazihabwa izindi ebyiri ziracyahari, ibyo gutanga amafaranga ntacyo mbiziho.”

Umunyamabanga Nshingwabikorwa w’Umurenge wa Remera Mukamana Marcelline we avuga ko iki kibazo aribwo akikimenya gusa ngo bagiye gukora iperereza uwabigizemo uruhare wese abihanirwe.

Yagize ati “ Tugiye kubikurikirana, twari tuzi ko hari abaturage benshi bibwe ingurube hagakorwa umukwabu abenshi bakazibona, ibyo gusabwa amafaranga ntabwo byo twari tubizi, tugiye kubikurikirana abazagaragara ko babigizemo uruhare bazabihanirwa.”

Abaturage batswe amafaranga barifuza ko ubuyobozi bwabafasha bakayasubizwa ngo kuko ibyo abanyerondo bakoze ari akazi kabo bahemberwa buri kwezi kandi ngo bahembwa amafaranga yishyurwa nabo baturage.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza