Gatsibo: Hari kubakwa urwibutso ruzahurizwamo imibiri y’Abatutsi bishwe muri Jenoside

Yanditswe na Hakizimana Jean Paul
Kuya 5 Kamena 2020 saa 08:39
Yasuwe :
0 0

Akarere ka Gatsibo katangiye umushinga wo kongera kubaka Urwibutso rwa Jenoside yakorewe Abatutsi rwa Kiziguro byitezwe ko nirwuzura arirwo ruzahurizwamo imibiri y’abazize Jenoside yakorewe Abatutsi mu 1994 iri hirya no hino muri aka Karere.

Urwibutso rwa Kiziguro rugizwe n’inyubako y’inzu y’amateka, ibyumba by’ubujyanama, ibiro by’abakorera ku rwibutso, ubwiherero, urukuta rwanditseho amazina, inzira abantu bagenderamo kugira ngo batanyagirwa, imva ebyiri nini ndetse na parking nini y’imodoka.

Umuyobozi w’Akarere ka Gatsibo, Gasana Richard, yabwiye IGIHE ko uru rwibutso ruzubakwa mu myaka ibiri, igice cya mbere kiri kubakwa muri uyu mwaka kingana na 40% naho icya kabiri kingana na 60% kizubakwa umwaka utaha.

Yagize ati “Ni urwibutso mu by’ukuri duteganya yuko ari rwo rwonyine tuzaba dufite mu karere, ubundi twari dusanzwe dufite urwa Kiziguro n’urwa Bugarura rushyinguwemo abarenga 1500. Turateganya rero ko nirwuzura abacitse ku icumu ba Bugarura twamaze kumvikana nabo ko tuzimura imibiri y’ababo tubazane Kiziguro ndetse n’abandi bagiye bashyingurwa mu mva rusange bazimurwa tukagira urwibutso rumwe rusange.”

Urwibutso rwa Kiziguro ruzuzura rutwaye miliyoni 629 Frw. Muri uyu mwaka, Akarere ka Gatsibo gafite ½ cy’amafaranga yose akaba ariyo mpamvu kiyemeje kurwubaka mu byiciro bibiri.

Imibiri iri mu rwobo i Kiziguro izakurwamo ryari?

Ubwo Jenoside yakorewe Abatutsi mu 1994 yabaga i Kiziguro hari abantu benshi bishwe batabwa mu rwobo runini ruhari, mu bihe bitandukanye byo kwibuka hari bamwe mu baharokokeye bagiye basaba ko abo bantu bakurwamo bagashyingurwa mu cyubahiro.

Gasana yavuze ko iki kibazo bakizi ndetse barimo kukivuganaho na Komisiyo y’Igihugu yo Kurwanya Jenoside (CNLG) n’Umuryango uharanira inyungu z’abacitse ku icumu rya Jenoside yakorewe Abatutsi mu 1994, IBUKA ku buryo bakurwamo, urwibutso rukazatahwa barashyinguwe neza.

Yakomeje avuga ko “Mu kubaka ruriya rwibutso no kuri uriya mwobo hazubakwa, hari inzu nto izubakwa nk’urwibutso kugira ngo dukomeze tubahe icyubahiro.”

Umuyobozi wa Ibuka mu Karere ka Gatsibo, Sibomana Jean Népomucène, yavuze ko bishimiye cyane kuba bagiye kugira urwibutso rwiza kandi runini rukubiyemo amateka bashobora no gusangiza abandi.

Ati “Kuba harimo kubakwa urwibutso ruzabikwamo amakuru kuri Jenoside yakorewe Abatutsi mu Karere ka Gatsibo hakanubakwa imva zubatse neza, ku muntu wese warokokeye Jenoside muri Gatsibo biranezeza kuko nibura hazaba hari ahantu dushobora gusoma amateka mu buryo bwanditse bwa gihanga ku buryo n’undi yayamenya mu buryo bumworoheye.”

Yavuze ko bizabafasha mu rugamba rwo gukomeza kurwanya abahakana n’abapfobya Jenoside yakorewe Abatutsi ndetse binabafashe kuhigishiriza abanyamahanga n’abandi Banyarwanda baturutse mu tundi turere amateka ya Jenoside muri Gatsibo cyane cyane ahahoze ari muri Murambi na Kiziguro.

Kuri ubu mu rwibutso rwa Kiziguro hashyinguwemo imibiri y’abazize Jenoside yakorewe Abatutsi 14 835.

Imirimo yo kubaka Urwibutso rwa Kiziguro irakomeje, muri uyu mwaka w'ingengo y'imari ngo hazubakwa igice cyarwo cya mbere
Ruzaba ari urwibutso rukubiyemo amateka yose yaranze Jenoside yakorewe Abatutsi mu Karere ka Gatsibo
Uru rwibutso nirwuzura ruzahurizwamo imibiri y'abazize Jenoside igiye ishyinguwe no mu mirenge itandukanye
Akarere ka Gatsibo katangiye umushinga wo kongera kubaka Urwibutso rwa Jenoside yakorewe Abatutsi rwa Kiziguro byitezwe ko nirwuzura arirwo ruzahurizwamo imibiri y’abazize Jenoside yakorewe Abatutsi mu 1994 iri hirya no hino muri aka karere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .