Gen Kabarebe yagaragaje umwihariko wa Perezida Kagame mu kuyobora urugamba rwo Kwibohora

Yanditswe na IGIHE
Kuya 11 Nyakanga 2020 saa 08:47
Yasuwe :
0 0

Umujyanama wa Perezida wa Repubulika mu bya Gisirikare n’Umutekano, Gen James Kabarebe, yavuze ko ubuyobozi bwiza n’ubwitange by’abasirikare biri mu byatumye ingabo za RPA zitsinda urugamba, kuko zarwanaga n’umwanzi ufite ibikoresho n’abasirikare benshi, ariko akabura imiyoborere n’impamvu zifatika arwanira.

Yari mu kiganiro n’abanyarwanda batandukanye batuye ku mugabane wa Aziya, Uburasirazuba bwo hagati na Pasifika, cyabaye kuri uyu wa Gatandatu haganirwa ku rugendo rwo kwibohora rumaze imyaka 26.

Muri iki kiganiro, Gen Kabarebe yabajijwe bimwe mu bikorwa yibuka mu rugamba rwo kubohora igihugu. Icya mbere yakomoje ku bwitange buhebuhje urubyiruko rw’abasirikare rwari rufite.

Ku munsi wa kabiri w’urugamba nibwo uwari uruyoboye Maj Gen Fred Gisa Rwigema yishwe, hakurikiraho abandi bayobozi batandukanye b’ingabo, kugeza ubwo Paul Kagame wari mu ishuri rya gisirikare muri Amerika yasangaga abandi ku rugamba.

Mu minsi ya mbere y’urugamba kandi ingabo za leta y’icyo gihe zahawe ubufasha n’ibiguhugu birimo u Bufaransa, u Bubiligi na Zaire.

Kabarebe yakomeje ati "Mu ikubitiro ry’urugamba mu cyumweru cya mbere cy’Ukwakira kugeza nko mu matariki 14-15, mu by’ukuri ibyo urubyiruko rwahuye nabyo byari bihagije ko buri umwe wese yari gufata inzira agasubira iyo avuye. Abasirikare benshi barapfuye, abayobozi barapfuye, ibikoresho umwanzi akoresha haba mu kirere, haba hasi, za burende (blindés), haba n’imbunda, ntabwo tungana, haba mu bwinshi haba no mu bikoresho, byagaragaraga ko tunaniwe, ko urugamba runaniranye."

"Ariko no mu bihe bikomeye nk’ibyo, ntabwo urwo rubyiruko rwacitse intege, rwahoraga ruvuga ngo tuzatsinda, ukibaza icyo tuzatsindana ntukibone, ariko mu mutima, uwo uganiriye na we akavuga ati ’uko biteye uko ari ko kose tuzatsida."

Ikindi yavuze ku ruhare rw’ubuyobozi bwiza, atari mu rugamba gusa rwo kubohora igihugu, ahubwo no muri buri kintu cyose kirimo abantu benshi gifite n’intego.

Yakomeje avuga ubwo Kagame yabageragaho ku rugamba, ati "Aho nyakubahwa yadusanze hari hagoye cyane, wabonaga ko ari ibintu bitari bushoboke ariko kuba yarahadukuye, urugamba rukongera rugatangira bundi bushya, akongera akumvisha abantu ko bari burwane n’uko bahangana n’umwanzi, kandi adafite ibikoresho bihagije, ubona ko uruhare rw’ubuyobozi ari ikintu gikomeye cyane."

Mu byemezo Paul Kagame yafashe icyo gihe harimo gutangira kurwana mu buryo bw’ibitero shuma, ndetse abasirikare baza kujya kurwanira mu birunga.

Kabarebe yakomeje ati "Ibyabereye mu rugano ntabwo byari byoroshye, abarwanye urwo rugamba ntabwo bazabyibagirwa kuko nubwo umwanzi atabageragaho mu buryo bworoshye ngo abarase, ariko uko hateye ubwaho naho ntabwo ari ahantu hashobotse. Hari imbeho hakonje cyane, hari inzara, ariko nibura abantu bagiye hamwe, umuyobozi abwira abasirikare uko bagomba kurwana no kwitwara.”

Muri ibyo bihe hari ingofero Inkotanyi zambaraga, zifite uburyo umuntu ashobora kuzirambura zigapfuka ku matama n’amatwi.

Hakurikiyeho uburyo bwo kurwana nanone bafata ibirindiro, bava ku dutero shuma aho birukaga hirya no hino bihisha umwanzi bakamutera igihe bashakiye, bacukura imyobo aba ariyo batangira kwifashisha mu guhangana n’umwanzi barebana.

Ni ibikorwa byafatiye umurongo ahitwa Gikoba muri Nyagatare, ingabo za Habyarimana zigakora ibishoboka byose ngo zibakure muri iyo myobo bikananirana.

Yakomeje ati "Mu bikorwa bya gisirikare bizwi, abari babirimo barabyibuka, hari nka ‘operation’ bise ‘ratissage’ ngira ngo ni Igifaransa, bivuga gutsemba, yamaze igihe cy’amezi nk’atandatu, hari iyo bise Rukokoma, ibyo byose abantu barabizi."

"Inkotanyi zinanirana ahongaho, kandi ari ahantu hato cyane, ariko ingabo twarwanaga nazo zari zazanye ibikoresho byose bishoboka, umwanzi twaramunaniye, ariko ntitwagombaga kuguma mu myobo.”

Kabarebe avuga ko igitekerezo cyo kuva aho hantu cyari gifitwe n’umuntu umwe ari we Kagame, aza kubabwira ko bahava bagaba igitero i Byumba.

Ni igitekerezo ngo yagejeje ku bayobozi b’ingabo babanza gushidikanya, bibaza bati "turava aha hantu twafashe, turahata umwanzi n’ahafata turabura aha tubure n’i Byumba."

Yakomeje ati "Ariko nyine umuyobozi yagombaga gufata icyemezo. Ati ‘ese nitujya gutera i Byumba umwanzi hano araba ahashaka iki? Arabura kurwana kuri Byumba aze kuguma hano? Tubona kubyumva, ni uko twagiye dutera i Byumba, noneho turagura haba hanini, imishyikirano [ya Arusha] irakunda.”

Icyemezo cyo guhagarika Jenoside

Gen Kabarebe yavuze ko icyemezo cyo guhagarika Jenoside kiri mu byakomeje kugaragaza ubushishozi bwa Perezida Kagame guhera mu gihe cy’urugamba.

Ati "Buriya guhagarika Jenoside byasabye umuntu umwe gusa, gufata icyemezo, buriya iyo tutagira umuyobozi ufata icyemezo nka kiriya, Jenoside yari kuba tukaguma ku Mulindi, tukaguma mu birindiro byacu dutegereje Minuar, dutegereje iki. Ariko murabona Jenoside yatangiye ku itariki zirindwi, mu matariki umunani Inkotanyi zari zamanutse zaje, icyemezo cyafashwe."

Gen Kabarebe yavuze ko nyuma y’urugamba rwo kubohora igihugu, urubyiruko rw’igihugu rufite amahirwe akomeye yo kuba yakora n’ibiruta ibyo Inkotanyi zakoze, ariko bisaba izindi mbaraga.

Ati "Ubu bari mu gihugu kiri mu isi iyoborwa na internet n’ibindi byose, ku buryo ibyabarangaza nabyo ni byinshi, Inkotanyi ntabwo zari zifite ibizirangaza, ni ku rugamba, nibo n’umwanzi imbere yabo, nta mbere, nta nyuma, nta kindi."

"Uhereye ko ibihe barimo bitandukanye, n’ibishuko byinshi n’ibibarangaza byinshi, nibyo bagomba kwitaho cyane, kumenya ngo ibyabashuka birahari, ibyabarangaza birahari, ariko igihugu nicyo kiza mbere y’ibindi byose, nicyo bagomba gushyira imbere."

Itandukaniro rya RPA na FAR

Kabarebe yavuze ko mu rugamba Inkotanyi zari 12,000, mu gihe abasirikare ba leta ubariyemo n’abajandarume (gendarmes) bari 80 000, washyiraho n’Interahamwe imibare ikarushaho kuzamuka.

Yakomeje ati “Abo basirikare ariko bari no hejuru mu miyoborere mibi, mu buyobozi bubi, bari no hejuru mu mijinya, gukoresha umujinja mwinshi cyane udakoresha ubwenge, aho naho bari hejuru. RPF yo yari hejuru cyane ku rwego rw’ubuyobozi. Ubuyobozi bwa RPA n’ubuyobozi bwa leta twarwanaga ntaho bwari buhuriye, ubuyobozi bwa RPA bwari hejuru cyane.”

Ikindi ngo nubwo iyo leta yari ifite abasirikare benshi barwanaga, yaburaga impamvu zifatika irwanira ndetse ikabura ubuyobozi bufatika, ati “ni n’aho batsindiwe.”

Gen Kabarebe yavuze ko muri iki gihe nubwo igihugu cyabohowe, hari abagamije kugihungabanya, ariko wareba ugasanga nta mpamvu bafite barwanira, ashingiye no ku makuru ava mu bantu bafatwa bari mu mitwe irwanya leta. Ni kimwe n’abakomeza kuyiharabika bifashishije imbuga nkoranyambaga.

Ati “Rero urubyiruko rwacu ruri ku mbuga nkoranyambaga, rwo rufite ibyo bashingiraho kuba barwanya abo bantu, njye sinabyita kubarwanya ahubwo ni ukubahugura, kuko iyo ufite ubumenyi, ukagira ibyo uvuga bifatika, ushobora guhugura abandi.”

Yavuze ko benshi mu barwanya igihugu usanga ari ukubera kutagira ubumenyi ku gihugu, kuba hari abantu bakuru bababyobya, ku buryo mushoboye kuganira mukabereka ukuri, “abenshi bavayo, banabireka.”

Gen Kabarebe yavuze ko Perezida Kagame yagize uruhare rukomeye mu kubohora igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .