Gicumbi: Hafashwe ingamba nyuma y’amashuri yanenzwe ireme ry’uburezi riri hasi

Yanditswe na Baryaherezahe Léonce
Kuya 7 Ukwakira 2019 saa 02:17
Yasuwe :
0 0

Nyuma y’uruzinduko rw’abayobozi b’Ikigo cy’igihugu cy’uburezi mu Rwanda, REB bagiriye mu kigo cy’amashuri abanza cya Nyande ,Urwunge rw’Amashuri rwa Kibari n’ishuri ry’imyuga ryigenga ryitwa China Keitets byo mu karere ka Gicumbi, hakagaragara ibibazo by’abana bafite ubumenyi buke mubyo biga, hafashwe ingamba nshya.

Tariki ya 23 Nzeri, ubwo yasuraga ibyo bigo,umuyobozi mukuru wa REB, Dr Irene Ndayambaje yatangajwe n’uburyo yageze ku kigo cy’amashuri abanza cya Nyande, yinjira mu ishuri ryo mu mwaka wa Gatanu, ahaye umunyeshuri ngo amwandikire indamukanyo y’Icyongereza ‘Good Morning Sir’ umwana abyandika mu Kinyarwanda.

Ibibazo nk’ibyo byagiye bigaragara no mu yandi mashuri DR Ndayambaje yagiye asura muri ako karere, asaba ko hafatwa ingamba abanyeshuri bakigishwa neza.

Yagize ati” Bishoboka bite ko umwana atabasha kwandika interuro nto nka ‘Good morning’? Ibi ni ibintu umwana wo mu wa Mbere cyangwa ikiburamwaka yakabaye azi.”

Nyuma y’urwo ruzinduko, ubuyobozi bw’akarere ka Gicumbi bwafashe ingamba zigamije kongera ireme ry’uburezi mu mashuri.

Izi ngamba nshya zafafajwe zirimo guha umurongo mwiza ubufatanye hagati y’ibigo by’amashuri n’inzego z’ibanze mu gukangurira ababyeyi kwita ku burere n’uburezi buhabwa abanyeshuri, kuzuza inshingano ku barezi, kugaragaza urutonde rw’abatiga neza ngo bakurikiranwe n’izindi.

Umuyobozi ushinzwe uburezi mu karere ka Gicumbi Nsengimana Damascène, aganira na IGIHE yavuze ko hari gukorwa ubukangurambaga ku mikoranire ya hafi y’ ubuyobozi bw’inzego z’ibanze n’abashinzwe uburezi mu karere ngo bashishikarize ababyeyi kwita ku myigire y’abana babo.

Yagize ati “Ubu ingamba twafashe ni izo gufatanya n’inzego z’ibanze no kurushaho gukangurira ababyeyi ko bakwiye kugira uruhare mu burere n’uburezi bw’abana babo “

Kuba bamwe mu babyeyi usanga batita ku bana, aho bamwe babohereza ku ishuri ntibabahe ibikoresho nk’amakayi n’ibindi usanga bituma abanyeshuri basubira inyuma mu myigire.

Umuyobozi w’ishuri ribaza rya Nyande Mutuyeyezu Théophile yagize ati “Iyo umwana adatewe ishyaka n’umubyeyi we ngo amuhe uburere, amusure ku ishuri, amuhe ibikoresho akeneye, usanga atiga neza bikamutera gusubira inyuma mu myigire.Turasaba ababyeyi ubufatanye no kwita ku myigire y’abanyeshuri dufatanya nabo kurera”

Amakimbirane yo mu miryango,ubukene bwo kutabonera abana amafunguro,guca intege abanyeshuri bikozwe n’ababyeyi babo, kwimura abana batatsinse neza, ni bimwe mu bibazo abarezi bavuga ko bahura nabyo cyane mu bigo byo mu cyaro.

Mu biraje ishinga ubuyobozi bw’ibi bigo by’amashuri muri Gicumbi, ngo ni ukwigisha ababyeyi gukundisha abanyeshuri ibyo biga, kurangiza neza inshingano n’ubwitange mu kazi n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza