Gicumbi: Miliyari zisaga 28Frw zigiye gushorwa mu guhangana n’imihindagurikire y’ibihe

Yanditswe na Akayezu Jean de Dieu
Kuya 26 Ukwakira 2019 saa 01:42
Yasuwe :
0 0

Minisiteri y’Ibidukikije yatangaje ko hagiye gukoreshwa miliyoni $32.8, ni ukuvuga miliyari zirenga 28 z’amafaranga y’u Rwanda, mu guhangana n’ibibazo by’imihindagurikire y’ibihe mu Karere ka Gicumbi.

Uyu mushinga uzabarizwa mu kigega gitera inkunga imishinga yita ku bidukikije mu Rwanda (Fonerwa), ugamije gutunganya igishanga cya Muvumba, kongera ubushobozi bw’abaturage mu gutunganya amashyamba no gufasha abahinzi bato gukora ubuhinzi buhangana n’ihindagurika ry’ibihe.

Uyu mushinga watangijwe kuri uyu wa Gatandatu tariki 26 Ukwakira 2019, witezweho guhangana n’ibibazo bijyanye n’imihandagurikire y’ibihe mu Mirenge ya Kaniga, Rubaya, Cyumba, Rushaki, Shangasha na Mukarange.

Umuyobozi Mukuru wa FONERWA, Hubert Ruzibiza yavuze ko “Hamwe n’abafatanyabikorwa bacu, Fonerwa yishimiye kuzashyira mu bikorwa uyu mushinga. Nta gushidikanya ko uzafasha mu kuzamura imibereho y’abatuye i Gicumbi kandi ukagira uruhare mu guhangana n’imihindagurikire y’ibihe.”

Uyu mushinga kandi uzafasha abatuye ahantu haba inkangu n’imyuzure gutura mu buryo buhangana n’imihindagurikire y’ibihe kandi wite ku baturage bakennye cyane badafite ubushobozi.

Abaturage bazigishwa uburyo burambye bwo kubungabunga amashyamba, imiturire igezweho, uburyo bwo gutunganya ibishanga n’ibindi, hanyuma buzajye no gukoreshwa mu gihugu hose.

Uretse izi miliyoni 32.8 z’amadolari, Ikigega cyo kubungabunga ibidukikije mu Rwanda (RGF), kizatangamo ibihumbi 147 z’amadolari ndetse n’Akarere ka Gicumbi gatange ibihumbi 107 $ naho umuryango ‘The Wood Foundation’ utange 105,964 $.

Umuyobozi Mukuru w’ikigega mpuzamahanga gitanga inkunga ku mishinga yo guhangana n’imihindagurikire y’ibihe, Ayaan Adam, yacyeje uyu mushinga avuga ko uzazana impunduka zikomeye.

Ati “U Rwanda ni kimwe mu bihugu duhanze amaso kandi narwo rwateje imbere uburyo bwo guhangana n’imihindagurikire y’ibihe. Umushinga wa Gicumbi urihariye kuko ni uwa mbere uhuza uburyo bwinshi bw’imihindagurikire y’ikirere.”

Biteganyijwe ko mu myaka itandatu uyu mushinga uzafasha abaturage kugabanya imyuka ya gaz carbonique (CO2) ingana na toni 273,720. Uzagera ku baturage 150,000 ugirire akamaro abarenga 380,000 muri rusange.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza