00:00:00 IGIHE NETWORK KN KINYARWANDA EN ENGLISH FR FRANCAIS

Haracyari icyuho mu bushakashatsi bwo mu Rwanda

Yanditswe na

Ezechiel Mbananabo

Kuya 17 May 2016 saa 06:57
Yasuwe :

Nubwo Minisiteri y’Uburezi(Mineduc) itagaragaza imibare y’uko ubushakashatsi buhagaze mu Rwanda, yemeza ko muri rusange hakigaragara icyuho kinini mu ikorwa ryabwo kandi ko Abanyarwanda aribo bakwiye gufata iya mbere mu kuziba icyo cyuho, uretse ko no gukorana n’abandi byagira uruhare rukomeye mu guteza imbere ubushakashatsi mu gihugu.

Byatangajwe kuri uyu wa Mbere mu nama yigaga ku guteza imbere ubushakashatsi mu Rwanda, inama yahuje iyi Minisiteri, Kaminuza y’u Rwanda n’abaturuka mu kigo Mpuzamahanga cy’Iterambere cy’Abanyasuwede (Sida).

Umuyobozi Mukuru ushinzwe ubumenyi, ikoranabuhanga n’ ubushakashatsi muri Mineduc, Dr. Marie Christine Gasingirwa yavuze ko u Rwanda rugifite byinshi byo gukora urebye aho ubushakashatsi buhagaze, asaba Abanyarwanda gufata iya mbere mu kubukora dore ko ari nabo bazi neza ibibazo bafite ubushakashatsi bwafasha gushakira ibisubizo.

Yagize ati″Tuvugishije ukuri ntaho turagera mu bushakashatsi.Turakangurira Abanyarwanda kubukora hagamijwe no kugabanya amafaranga igihugu gitakaza ku banyamahanga baza gukora ubushakashatsi mu gihugu kandi bataba banasobanukiwe neza ibibazo abenegihugu bafite.”

Muri iyi nama hagaragajwe ko ubumenyi buke, amikoro make, n’imyumvire ari zo mpamvu z’ icyuho mu bushakashatsi mu Rwanda bituma na bumwe bukorwa ari uko hitabajwe abanyamahanga.

Dr. Gasingirwa ati″ Ubu turashaka ko abanyamahanga bajya baza bagasangiza ubumenyi Abanyarwanda, tukabaha n’amahugurwa.Icy’igenzi n’ubufatanye ku buryo umunyamahanga wese uje mu Rwanda yajya akorana n’Abanyarwanda kandi turizera ko ubufatanye n’ Ikigo Mpuzamahanga cy’Iterambere cy’Abanyasuwede bwubatse umusingi.

Iki kigo cyatangiye gukorana n’iyahoze ari Kaminuza y’uRwanda kuva muri 2003 mu bijyanye no guteza imbere ubushakashatsi.

Anna Maria Oltorp uturuka muri iki kigo, yavuze ko mu masezerano bafitanye n’u Rwanda y’imyaka itanu, bazatanga miliyoni 40 z’amadolari mu guteza imbere ubushakashatsi n’uburezi muri Kaminuza muri rusange kugera muri 2018, kandi ngo bizeye gukomeza gukorana n’u Rwanda.

Kuri we ngo ni ingenzi guteza imbere ubushakashatsi kuko ari bwo bushingirwaho hashyirwaho gahunda runaka zafasha abaturage no gukora iteganyabikorwa rinoze kandi riva mu bitekerezo by’abaturage.

Muri Mutarama uyu mwaka, Komisiyo y’igihugu ishinzwe ubumenyi n’ikoranabuhanga (National Commission of Science and Technology-NCST),yatangaje ko hagiye gushyirwaho ikigega cyihariye gitera inkunga abakora ubushakashatsi mu Rwanda, nyuma yo kubona ko ikibazo cy’amikoro adahagije ari imwe mu nzitizi z’ubushakashatsi mu gihugu.

Umuyobozi w’iyi Komisiyo, Dr Ignace Gatare yavuze ko biteganyijwe ko iki kigega kizashyirwaho mu ngengo y’imari y’umwaka utaha.

Umuyobozi wungirije wa Kaminuza y’u Rwanda Philip Cotton, yavuze ko bashaka kwigisha abanyeshuri ku buryo bajya barangiza bafite ubushobozi bwo kugira icyo bakora ku bibazo bihari mu gihugu kuko iterambere rishingira ku bushakashatsi.

Bamwe mu bari bitabiriye inama
Dr Gasingirwa avuga ko hakiri icyuho mu gukora ubushakashatsi mu Rwanda
Philip Cotton Umuyobozi wungirije wa Kaminuza y'u Rwanda
Anna Maria Oltorp umwe mu bagize ikigo SIDA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .